ءشوبى شۇيگىن, توپىراعى قۇنارلى, تابيعاتى جايلى وڭىردە مال باسىنىڭ سانى ارتىپ كەلەدى. وتكەن جىلدىڭ 11 ايىندا الماتى وبلىسىندا 697 مىڭ ءىرى قارا مالى ەسەپكە كىرسە, ونىڭ 20 پايىزى نەمەسە 137 مىڭ باسى جامبىل اۋدانىنىڭ ەنشىسىندە. قوي مەن ەشكىنىڭ 42 پايىزى نەمەسە 1 ملن 088 مىڭ باسى, 233 مىڭ باس جىلقىنىڭ 49 مىڭ باسى, 7 597 باس تۇيەنىڭ 1752 باسى نەمەسە 23 پايىزى وسى اۋدانعا تيەسىلى. ءتىرى سالماقتاعى مال مەن قۇس ەتى بويىنشا 11 ايدا 20468 توننا ەت ءوندىرىلىپ, الدىڭعى جىلمەن سالىستىرعاندا 1,1 پايىزعا ارتقان.
مال ءوسىرىپ, ەگىن ورىپ وتىرعان اۋداندا سۋ ۇنەمدەۋ تەحنولوگياسىن كەڭىنەن ەنگىزۋگە ءجىتى كوڭىل ءبولىنىپ وتىر. مال باسىن جەتكىلىكتى مولشەردە جەمشوپپەن قامتاماسىز ەتۋدە اۋدانداعى ەسەپتە تۇرعان 26 مىڭ گەكتار سۋارمالى ەگىستىكتىڭ تەك 4,3 مىڭ گەكتارى عانا جاڭبىرلاتىپ سۋارۋ ادىستەرىن پايدالانادى, بۇل سۋارمالى ەگىستىك جەردىڭ 16 پايىزىن عانا قۇرايدى. سوندىقتان الداعى جىلدارى بۇل كورسەتكىشتى ۇلعايتۋ ماسەلەسى كۇن تارتىبىندە تۇرعانىن جامبىل اۋدانىنىڭ اكىمى نۇرلان ەرتاس ۇلى ايرىقشا اتاپ ءوتتى.
بۇعان قوسا, جايىلىمدىق جەرلەردى كەڭەيتۋ, وسىرىلگەن ءونىمدى قايتا وڭدەۋ مەن وتكىزۋ, اۋىل اراسىن قوعامدىق كولىكتەرمەن قامتاماسىز ەتۋ, «جايلى مەكتەپ» جوباسىنىڭ جۇزەگە اسىرىلۋى سىندى الەۋمەتتىڭ الەۋەتىن جاقسارتۋ جولىندا اتقارىلىپ جاتقان جۇمىستار جايىن باياندادى.
«اۋىل – ەل بەسىگى» دەگەندى حالقىمىز بەكەر ايتقان جوق. اۋىل شارۋاشىلىعى سالاسىنىڭ الەۋەتى وراسان زور. سوندىقتان اۋىلداعى جاعدايدى جاقسارتا الماساق, بارىمىزگە سىن», دەگەن مەملەكەت باسشىسى اگرارلىق سالا جەتەكشىلەرىنە ۇلكەن مىندەت جۇكتەگەنى بەلگىلى. وسى ورايدا اگروونەركاسىپ كەشەنىندە ناقتى سەرپىلىسكە قول جەتكىزۋ ورتاق ءىس ەكەندىگىن اتاپ ايتقان سەناتور سۇلتان دۇيسەمبيەۆ ءىسساپار بارىسىندا اگرارلىق ايماق سانالاتىن الماتى وبلىسىندا بىرقاتار وزەكتى ماسەلەنىڭ بارىن العا تارتتى.
ء«بىزدىڭ وڭىرلەرگە شىعىپ, ەل-جۇرتپەن كەزدەسۋدەگى باستى ماقساتىمىز – حالىقتىڭ جاي-كۇيىن ءبىلۋ, قوردالانعان ماسەلەلەرمەن تانىسىپ, ونىڭ شەشىم تابۋىنا ىقپال ەتۋ. ەل ىشىندە كاسىبىن اشىپ, تۇرمىسىن تۇزەۋگە بەتبۇرىس جاساپ وتىرعان ازاماتتار از ەمەس. سونىڭ ءبىرى ءوز قارجىسىنا بالىق شارۋاشىلىعىن اشىپ, ۇلكەن ءىستى باستاپ وتىرعان باعلان كەنجەباەۆ سىندى ىسكەر ازاماتتاردىڭ ءىسى كوپكە ۇلگى. وسىنداي شاعىن ونەركاسىپتەر كوپ بولسا, ءبىزدىڭ ەلىمىز ءوسىپ-وركەندەيدى. اۋىل شارۋاشىلىعى ەڭبەككەرلەرىمەن كەزدەسۋلەردە سۋبسيدياعا قول جەتكىزۋ, سۋارمالى ەگىستىك جەرلەر مەن جايىلىم تاپشىلىعى سىندى بىرقاتار پروبلەمانىڭ بارى ايتىلدى. بىلتىر سەناتتا 92 زاڭ قابىلدانسا, سونىڭ 10-ى اۋىل شارۋاشىلىعى بويىنشا قابىلداندى. سول سەبەپتى تۇرعىندار تاراپىنان ايتىلعان ۇسىنىس-پىكىرلەردىڭ اياقسىز قالماۋى باستى نازارعا الىنادى», دەدى س.دۇيسەمبيەۆ.
وڭىردە ءتورت ت ۇلىكتى ءوسىرۋ, وعان كۇتىم جاساۋ, شالعاي اۋىلدارعا قاجەتتى ماماندار تارتۋ, الەۋمەتتىك وسال توپتاعى وتباسىلارعا قولداۋ كورسەتۋ اياسىندا اتقارىلىپ جاتقان جۇمىستار جايىن تولعاعان ماجىلىسمەن د.قاسقاراۋوۆ تۇرعىندار تاراپىنان تۇسكەن ساۋالدارعا جان-جاقتى جاۋاپ قايىردى.
ءىسساپار سوڭىندا حالىق قالاۋلىلارى جىلىنا 45 توننا بالىق ەتىن ءوندىرۋدى كوزدەپ, قالىپتى جۇمىس ىستەپ تۇرعان «Almaty balyk 2050» جشس-نىڭ جۇمىس ىرعاعىمەن تانىستى. جالپى اۋماعى 8 گەكتار جەردە ورنالاسقان 20 باسسەينى اشىق اسپان استىندا, 38 باسسەينى جابىق نىساندا جانە 1 ينكۋباتسيالىق تسەحتا سازان, امۋر, شاباق وسىرۋمەن اينالىساتىن بالىق شارۋاشىلىعىندا 15 ادام ەڭبەك ەتەدى. الداعى ۋاقىتتا وندىرىستىك قۋاتتى ارتتىرۋدى كوزدەگەن سەرىكتەستىك باسشىسى باعلان ءورازالى ۇلى وتكەن جىلى 20 توننا بالىق ەتى وندىرىلگەنىن تىلگە تيەك ەتتى.
الماتى وبلىسى
