امانگەلدى بەكساريەۆ بالىق شارۋاشىلىعىمەن جاستايىنان اينالىسادى. ول ءتورت اي بۇرىن اتىراۋدان بەكىرە تۇقىمداس بالىقتاردىڭ شاباقتارىن ارنايى الىپ كەلىپ, ماڭعىستاۋدا ءوسىرۋدى كوزدەگەن ەكەن.
– قاراقيا اۋدانىنىڭ قۇرىق اۋىلى ماڭىنداعى سارشا جەرىندە بالىق شارۋاشىلىعىن باستاپ جاتقان جايىم بار. تۇششى سۋدا تىرشىلىك ەتكەن بالىقتاردىڭ كاسپي تەڭىزىنىڭ سۋىنا بەيىمدەلۋىن باعامداۋ ءۇشىن 100 داناسىن اكەلدىم. وسى باعىتتا ءىسىمدى جالعاستىرۋعا نيەتتىمىن – دەدى ول.
سونداي-اق باسقوسۋدا بالىق شارۋاشىلىعى سالاسىن جەتىك مەڭگەرگەن بىلىكتى مامانداردىڭ ازدىعى ءسوز بولدى. ءبىلىم مەن اقپاراتتىڭ جەتىمسىزدىگىنەن وڭىردەگى 800-دەن استام بالىقشى مەملەكەتتەن بەرىلەتىن سۋبسيدياعا قول جەتكىزە المادى. سوندىقتان 30 جىلدىق تاجىريبەسى بار بالىقشى ا.نيماتوۆ ارىپتەستەرىن ءۇش كۇن وقىتۋعا كەلدى.
– گرانتتار بالىق شارۋاشىلىعى ماماندىقتارىنا ءبولىنىپ جاتقانىمەن, بالىقشى ماماندىعىنا سۇرانىس از. سول سەبەپتى, كوپ گرانت كەرى قايتارىلدى. ءبىز سەمينارلار, كۋرستار ۇيىمداستىرىپ, ينستيتۋتتاردىڭ جانىنان قىسقا كۋرستار اشىپ, مامان دايارلاۋىمىز كەرەك. كادرسىز بالىق شارۋاشىلىعى دامىمايدى, – دەپ اتاپ ءوتتى ا.نيماتوۆ.
ماڭعىستاۋدا كاسپي تەڭىزىنەن 100 مىڭ توننا بالىق اۋلاۋ جوسپارلاندى.
ماڭعىستاۋ وبلىسى كاسىپكەرلەر پالاتاسىنىڭ ديرەكتورى راشيت مۇستاپاەۆتىڭ ايتۋىنشا, 2021-2030 جىلدارعا ارنالعان بالىق وسىرۋگە ارنالعان ۇكىمەت قاۋلىسى نەگىزىندە اۋقىمدى شارالار قولعا الىنىپ وتىر. بالىقشىلارعا شارۋاشىلىقتىڭ قىر-سىرى ۇيرەتىلەدى. پالاتاداعىلاردىڭ ايتۋىنشا, بالىق ءۇش جىلدا ۋىلدىرىق بەرە باستايدى دەسەك, بالىق كاسىپشىلىگىنەن دە مول قارجى تاۋىپ, شىعىندى وتەۋگە بولادى.
ماڭعىستاۋ وبلىسى
