ەلوردالىق كوماندا بۇعان دەيىنگى ءۇش تۋردا جاقسى ويىن ورنەگىن كورسەتىپ, قاتارىنان ءۇش مارتە جەڭىسكە جەتتى. بۇل جەڭىستى سەريانىڭ كەزدەيسوق ەمەس ەكەنىن سىرت الاڭدا دالەلدەۋ وڭاي بولماعانىمەن, «بارىس» بارىن سالاتىنى تۇسىنىكتى ەدى. «لوكوموتيۆ» وڭاي شاعىلاتىن جاڭعاق ەمەس. رەسەيلىك كلۋب 44 ويىننان كەيىن 63 ۇپايمەن 2-ورىندا كەلەدى. ال «بارىس» تۋرنير كەستەسىندە 45 ويىننان كەيىن 37 ۇپايمەن 19-ورىنعا جايعاسقان.
سونىمەن بۇل ويىن وتە تارتىستى بولدى. رەسەيلىك كلۋبتان الەكساندر پولۋنين, الەكساندر ەلەسين, الەكساندر ۆولكوۆ, رۋشان رافيكوۆ مەرگەندىك تانىتتى. ال ەلوردالىق كوماندادان ەنتوني كامارا ەكى رەت كوزگە ءتۇستى. ول قاتارىنان جەتى ويىندا شايبا سوعىپ, ۇزدىك ويىنىمەن كوزگە ءتۇستى. سونداي-اق «بارىستىڭ» پايداسىنا داۆيد سكلەنيچكا, دجوزەف لابەيت شايبا سوقتى. وسىلايشا, نەگىزگى كەزەڭ 4:4 ەسەبىمەن تەڭ اياقتالىپ, ويىن وۆەرتايمعا ۇلاستى. وۆەرتايمدا جەڭىمپاز انىقتالعان جوق. بۋلليتتە ەلوردالىق كلۋبتىڭ جولى بولدى. ناتيجەسىندە, «بارىس» قارسىلاسىن 5:4 ەسەبىمەن جەڭىپ كەتتى. بۇل – ەلوردالىق كلۋبتىڭ قاتارىنان ءتورتىنشى جەڭىسى.
