بۇل ماسەلە پرەزيدەنتتىڭ ۇدايى نازارىندا ەكەنى بارشاعا بەلگىلى. بۇعان دەيىنگى باعدارلامالىق باياندامالارىندا دا اتالعان باعىت جۇيەلى ءارى دايەكتى ايتىلىپ كەلەدى. وسى جولعى سۇحباتىندا دا «مەملەكەتتىك قىزمەتشى قانداي بولۋى كەرەك؟» دەگەن ماسەلەگە اشىق ءارى ايقىن كوزقاراسىن ءبىلدىردى. پرەزيدەنتتىڭ پىكىرىنشە, مەملەكەتتىك قىزمەتشىلەر وزىنە جۇكتەلگەن مىندەتتى ءمىنسىز اتقاراتىن كاسىبي مامان عانا بولماۋى كەرەك. ولار ءاردايىم باستاماشىل, ناقتى ىسىمەن ەلگە پايدا اكەلەتىن جانە وزگەرىستەردىڭ ومىرشەڭدىگىن حالىققا كورسەتە الاتىن ازامات بولۋى قاجەت. سونداي-اق ولار ءبىلىمدى-بىلىكتى عانا ەمەس, ءسوزى مەن ءىسى ۇيلەسەتىن, تياناقتى, ءتارتىپتى جانە ارلى ادام بولۋى شارت. ياعني پرەزيدەنت مەملەكەتتىك قىزمەتشىلەر تەك ورىنداۋشىلار بولماۋى كەرەك, ولار وزگەرىستەردىڭ باستاۋىندا تۇراتىن, جاۋاپكەرشىلىكتى الا الاتىن باستاماشىل تۇلعالار بولۋى كەرەك دەپ وتىر. ءسوزى مەن ءىسى ۇيلەسەتىن ارلى ادام بولۋ تۋرالى ويى دا ەرەكشە ماڭىزعا يە. سەبەبى مەملەكەتتىك قىزمەت ادامعا ۇلكەن جاۋاپكەرشىلىك جۇكتەيدى. مانساپ دارەجەسىنە قاراماستان ءاربىر مەملەكەتتىك قىزمەتشى ەل دامۋىنا وزىندىك ۇلەس قوساتىن تاريحي ميسسيانى ارقالاپ جۇرگەنىن شىنايى سەزىنە ءبىلۋى كەرەك.
سونىمەن بىرگە, مەملەكەت باسشىسى ءوز سۇحباتىندا «ەڭبەكقورلىق پەن جاسامپازدىق جوعارى باعالانۋعا, بىلىمپازدىق پەن جاڭاشىلدىق سالتانات قۇرۋعا ءتيىس ەكەنىن» ايتا كەلە, بىلىمپازدىق, كاسىبيلىك, بىرلىك, ىنتىماق, جاناشىرلىق, ىسكەرلىك, باستاماشىلدىق, ادالدىق, قاراپايىمدىلىق جانە ۇنەمشىلدىك – ناعىز وتانشىل, ادال ازاماتقا ءتان قاسيەتتەر مەن قۇندىلىقتار ەكەنىن ناقتى كورسەتىپ بەردى. بۇل ەلدىكتى نىعايتۋدىڭ العى شەبىندە جۇرگەن مەملەكەتتىك قىزمەتشىلەرگە دە قويىلار ەرەكشە تالاپ ەكەنى انىق. «بارلىق دەڭگەيدەگى شەنەۋنىكتەر مەن باسشىلار قوعامنىڭ تامىرىن تاپ باسا بىلۋگە, ازاماتتاردىڭ مۇڭ-مۇقتاجىن تىڭداپ-تۇسىنۋگە, سوعان سايكەس دەر كەزىندە ناتيجەلى شارالار قابىلداۋعا جانە دۇرىس شەشىم شىعارۋعا قابىلەتتى بولۋعا ءتيىس. مەملەكەت باسشىسى مەملەكەتتىك قىزمەتكەرلەردىڭ تۇلعالىق بولمىسىنا ءتان باستى تالاپ – «ادام مەملەكەت ءۇشىن ەمەس, مەملەكەت ادام ءۇشىن» دەگەن قاعيداتتى بەرىك ۇستانۋ ەكەنىن ايتتى. ەڭ باستىسى, ولاردىڭ حالىققا جاقىن بولۋى كەرەكتىگىنە نازار اۋدارتادى.
پرەزيدەنتتىڭ «ادام مەملەكەت ءۇشىن ەمەس, مەملەكەت ادام ءۇشىن» دەگەن قاعيداسى جاڭا فورماتسياداعى مەملەكەتتىك قىزمەتشىلەردىڭ نەگىزگى ۇستانىمىنا اينالۋعا ءتيىس. سەبەبى ەلىمىزدە قالىپتاسىپ جاتقان جاڭا باسقارۋ مادەنيەتى «ەڭ الدىمەن ادامدار» قاعيداتىنا نەگىزدەلەدى. بۇل رەتتە مەملەكەتتىك قىزمەت ىستەرى اگەنتتىگى مەملەكەتتىك قىزمەتشىلەردىڭ كاسىبي-تۇلعالىق جەتىلۋى باعىتىنداعى جۇمىستاردى تۇراقتى جۇرگىزىپ كەلەدى. الداعى ۋاقىتتا پرەزيدەنتتىڭ مەملەكەتتىك قىزمەتشىلەرگە قاتىستى ايتقان تۇجىرىمدى باعىتتارىن قىزمەتكەرلەردى وقىتۋ, قايتا دايارلاۋ, بىلىكتىلىكتەرىن ارتتىرۋ بارىسىندا جان-جاقتى قولداناتىن بولامىز.
مەملەكەت باسشىسى سۇحباتىندا اتقارۋشى جانە زاڭ شىعارۋشى بيلىك تارماقتارىندا جاستاردىڭ قىزمەت ەتۋىنە جول اشاتىن كەشەندى شارالار قابىلدانعانىنا توقتالعان. بيىل پرەزيدەنتتىڭ تىكەلەي باستاماسىمەن قولعا الىنعان پرەزيدەنتتىك جاستار كادر رەزەرۆىنە ءۇشىنشى ىرىكتەۋ وتكىزىلدى. پرەزيدەنتتىك جاستار كادر رەزەرۆى مەملەكەتتىك قىزمەتكە تالانتتى جاستاردى تارتۋدى كوزدەيدى. مەملەكەت باسشىسى بەلگىلەپ بەرگەندەي, دارىندى, بىلىكتى جاستاردى ەلگە قىزمەت ەتۋگە تارتۋ, جۇمىلدىرۋ, اتسالىستىرۋ. وسى جولى مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرىپ, ماقساتتى ىرىكتەۋ وتكىزىلدى. ناتيجەسىندە, 50 ادام رەزەرۆكە الىندى. بۇل – ەلىمىزدە كادر ساياساتى اشىق ءارى ءادىل جۇرگىزىلىپ وتىرعانىنىڭ كورىنىسى.
ءبىر سوزبەن ايتقاندا, سۇحبات قوعامدا قالىپتاسقان تۇيتكىلدى سۇراقتارعا نۇكتە قويىپ, وعان قوسا, ەلىمىز دامۋىنىڭ الداعى جوسپارلارىنا دا قاتىستى باعىت-باعداردى ايقىنداۋىمەن قۇندى بولىپ وتىر.
دارحان جازىقباي,
مەملەكەتتىك قىزمەت ىستەرى اگەنتتىگىنىڭ توراعاسى
