كولىك ءمينيسترى مارات قاراباەۆ قازىرگى ۋاقىتتا بارلىق اۋەجاي شتاتتىق رەجىمدە جۇمىس ىستەپ تۇرعانىن ايتتى. اۋە كەمەلەرىن قابىلداۋعا جانە شىعارۋعا ەشقانداي شەكتەۋلەر جوق. سونىمەن قاتار 29-31 جەلتوقسان ارالىعىندا استانادا اۋا رايى كۇرت بۇزىلدى: قالىڭ قار جاۋىپ, بوران سوقتى, جەلدىڭ جىلدامدىعى سەكۋندىنا 26 مەترگە جەتتى. سونىڭ سالدارىنان 100-دەن استام رەيس كەشىكتىرىلدى. قاجەتتى شارالاردى قابىلداۋ ءۇشىن اۋەجاي, اۆياكومپانيا جانە مەتەورولوگيالىق قىزمەت وكىلدەرىنىڭ قاتىسۋىمەن جەدەل شتاب جۇمىس ىستەدى.
اتاپ ايتقاندا, جولاۋشىلار ىستىق تاماقپەن قامتاماسىز ەتىلدى, قاجەت بولعان جاعدايدا مەديتسينالىق قىزمەت كورسەتىلدى, ولاردىڭ ءبىر بولىگى (بالالار, قارتتار, مۇگەدەكتىگى بار ادامدار) قوناقۇيلەرگە ورنالاستىرىلدى, بالالارعا انيماتورلاردىڭ قاتىسۋىمەن جاڭاجىلدىق سىيلىقتار مەن تاتتىلەر تاراتىلدى. بۇل رەتتە اۋەكومپانيالار 29 جەلتوقسان مەن 2 قاڭتار ارالىعىندا كەشىكتىرىلگەن جانە توقتاتىلعان رەيستەرگە بيلەتتەر قۇنىن 100% قايتارادى.
الداعى ۋاقىتتا رەيستەردىڭ ۇزاقمەرزىمدى كەشىگۋ قاۋپىن ازايتۋ ءۇشىن اۋەكومپانيالار مەن اۋەجايلار اراسىنداعى ۇيلەستىرۋ كۇشەيتىلەدى, اتاپ ايتقاندا, كۇردەلى مەتەوجاعدايلاردا جولاۋشىلاردى تاسىمالداۋ ءۇشىن ءىس-قيمىل الگوريتمىن ازىرلەۋ جوسپارلانىپ وتىر. بۇدان باسقا اۋەجايلاردى ارنايى تەحنيكامەن جانە قۇرال-جابدىقتارمەن قوسىمشا جاراقتاندىرۋ, سونداي-اق جولاۋشىلارعا حابارلامالار تاراتۋدى كۇشەيتۋ ماسەلەلەرى پىسىقتالادى.
مەرەكە قارساڭىندا اۆتوموبيل كولىگىنە جۇكتەمە ايتارلىقتاي ءوستى. 28 جەلتوقسان مەن 2 قاڭتار ارالىعىندا ەلىمىزدىڭ سولتۇستىك-شىعىس جانە ورتالىق بولىگىندە قار ارالاس جاڭبىر جاۋىپ, جەلدىڭ ەكپىنى سەكۋندىنا 30 مەترگە دەيىن جەتتى. جول قوزعالىسى قيىنداپ, 13 وبلىستا 107 قىسقامەرزىمدى جول قوزعالىسىنا شەكتەۋ قويىلدى.
جاعدايدى تاۋلىك بويى باقىلاپ, قاجەتتى شارالاردى قابىلداۋ ماقساتىندا جەدەل شتاب جۇمىس ىستەدى. جول قىزمەتتەرى اكىمدىكتەرمەن جانە پوليتسيامەن بىرلەسىپ, استانا مەن قاراعاندى, استانا مەن كوكشەتاۋ اراسىندا 47 اۆتوكولوننانى الىپ ءجۇرۋدى ۇيىمداستىردى. بۇل قولايسىز اۋا رايى جاعدايىندا 42 مىڭ كولىكتىڭ ءوتۋىن قامتاماسىز ەتۋگە مۇمكىندىك بەردى. بۇل رەتتە جابىلعان جولداردى تاۋلىك بويى تازالاۋعا 422 بىرلىك جول-پايدالانۋ تەحنيكاسى جانە 700-دەن استام ادام جۇمىلدىرىلدى.
مەرەكە كۇندەرى جولاۋشىلاردى تەمىرجول كولىگىمەن تاسىمالداۋ تۇراقتىلىعىن قامتاماسىز ەتۋ ماقساتىندا جوعارى سۇرانىسقا يە پويىزداردا ورىن سانى ۇلعايتىلدى. 12 باعىت بويىنشا قوسىمشا 296 تىركەمە ۆاگون جىبەرىلدى. استانا – الماتى – استانا جانە استانا – شىمكەنت – استانا باعىتتارى بويىنشا قوسىمشا پويىزدار جۇمىس ىستەپ جاتىر. استانا – كوكشەتاۋ, استانا – بۋراباي, استانا – اتباسار جانە پاۆلودار – استانا باعىتتارى بويىنشا 6 قوسىمشا قالا ماڭىنداعى پويىز ىسكە قوسىلدى.
وڭىرلەردە قابىلدانعان شارالار تۋرالى قاراعاندى وبلىسىنىڭ اكىمى ەرماعانبەت بولەكپاەۆ, جامبىل وبلىسىنىڭ اكىمى ەربول قاراشوكەەۆ جانە اقمولا وبلىسىنىڭ اكىمى مارات احمەتجانوۆ باياندادى.
پرەمەر-مينيستر 25 جەلتوقساننان باستاپ ەلىمىزدىڭ بارلىق وڭىرىندە اۋا رايى كۇرت بۇزىلعانىن اتاپ ءوتتى. اۋا رايىنا بايلانىستى 150-گە جۋىق ەسكەرتۋ جاريالانىپ, كولىك جولدارىندا قوزعالىس توقتادى جانە شەكتەلدى.
«جالپى, ورتالىق جانە جەرگىلىكتى مەملەكەتتىك ورگاندار ۇيلەسىمدى جۇمىس جۇرگىزدى. سونداي-اق قايعىلى وقيعالاردىڭ الدىن الۋ ءۇشىن جەكەلەگەن ۆەدومستۆولار مەن ۇيىمداردىڭ ءوزارا ءىس-قيمىلىن كۇشەيتۋ كەرەك», دەدى ءاليحان سمايىلوۆ.
ۇكىمەت باسشىسى بارلىق ۇيلەستىرۋ شتابىنىڭ جۇمىسىن جانداندىرۋدى, كولىك جولدارى مەن ەلدى مەكەندەردەگى كوشەلەردى قاردان تاۋلىك بويى تازارتىپ وتىرۋدى, سونداي-اق جولاۋشىلاردى جىلىتۋ بەكەتتەرىنە شۇعىل ەۆاكۋاتسيالاۋ ءۇشىن كولىك قۇرالدارىنىڭ قورىن قالىپتاستىرۋدى تالاپ ەتتى.
«كولىك مينيسترلىگى مەن «قازاۆتوجول» كومپانياسى رەسپۋبليكالىق جانە حالىقارالىق ماڭىزى بار اۆتوجولداردا قاۋىپسىز جول قوزعالىسىن قامتاماسىز ەتۋدى ەرەكشە باقىلاۋعا الۋى كەرەك. تجم مادەنيەت جانە اقپارات مينيسترلىگىمەن بىرلەسىپ, قولايسىز اۋا رايى تۋرالى حالىقتى الدىن الا حاباردار ەتۋى ءتيىس», دەدى پرەمەر-مينيستر.
سونىمەن قاتار ءاليحان سمايىلوۆ شەكتەۋلەر كەزىندە كولىك قۇرالدارىنىڭ قوزعالىسىنا جول بەرمەۋ جونىندەگى جۇمىستى كۇشەيتۋدى جانە قاجەت بولعان جاعدايدا ارنايى تەحنيكانى كۇردەلى جول ۋچاسكەلەرىنە جەدەل جىبەرۋدى تاپسىردى.
