كورمەگە كىلەم وندىرىسىندە الدىڭعى قاتارلى قولونەر بۇيىمدارىن دايىندايتىن «Nasim Nayman Qazaq Karpet» كومپانياسىنىڭ كىلەمدەرى قويىلدى.
60-جۋىق ءتۇرلى كومپوزيتسيالىق سيۋجەتتى بەينەلەگەن كىلەمدەر وزگەشە مانەرىمەن, اسەمدىگىمەن, ءار ءتۇستى بوياۋىمەن كوز تارتادى. شىعىس ۇلگىلەرىنە ءتان ورنەكتەرگە وتە باي. قازاقى ويۋلاردىڭ دا بەدەرى بايقالادى. كومپانيا باسشىسى ناسيم نايمان بالا كۇنىنەن كىلەم توقۋمەن اينالىسىپ, وسى سالادا ءبىراز جەتىستىككە قول جەتكىزگەن. اۋعانستاندا كىلەمدى قولمەن توقۋ ونەركاسىبىنىڭ دامۋىنا زور ۇلەس قوسقان.
ءىس-شارانىڭ اشىلۋىندا ۇلتتىق مۋزەيدىڭ عىلىمي حاتشىسى سايالبەك عيزاتوۆ مازمۇنعا باي كورمەنىڭ ماڭىزى تۋرالى سالماقتى وي ساباقتادى.
ء«بىزدىڭ مۋزەي حالقىمىزدىڭ سان عاسىردان بەرى جالعاسىپ كەلە جاتقان قولونەرىن دامىتۋعا وتە ىقىلاستى. ونىڭ ءبىر مىسالى رەتىندە بيىل اشىلعان «قولونەرشىلەر ورتالىعىن» ايتا الامىز. بۇگىنگى ءىس-شارا دا سونىڭ ءبىر دالەلى. كورمەنىڭ ەرەكشەلىگى – اۋعانستاندا تۇراتىن باۋىرلارىمىز وزدەرى توقىعان كىلەمدەرىن ەل نازارىنا ۇسىنىپ وتىر. ولار بۇل ونەردى ايتارلىقتاي دامىتىپ قانا قويماي, ونى الەمدىك دەڭگەيدە ناسيحاتتاپ, دارىپتەپ جۇرگەنىنە كوز جەتكىزدىك», دەدى ول.
ودان كەيىن ءسوز العان «وتانداستار قورى» كوممەرتسيالىق ەمەس اكتسيونەرلىك قوعامىنىڭ اتقارۋشى ديرەكتورى نۇرحان جاليەۆ جينالعانداردى كورمەنىڭ اشىلۋىمەن قۇتتىقتاپ, اتالعان قوردىڭ شەتەلدە تۇراتىن قانداستارعا بايلانىستى جىل بويى وتكىزگەن ءىس-شارالارى جايىندا باياندادى. «Nasim Nayman Qazaq Karpet» كومپانياسىنىڭ باسشىسى ناسيم نايمان كورمەنى وتكىزۋگە ۇيىتقى بولعان بارشا ازاماتقا ريزاشىلىعىن ءبىلدىرىپ, كىلەم توقۋدىڭ قىر-سىرى تۋرالى وي ءبولىسىپ, وسى كاسىپتى ودان ءارى دامىتا بەرەتىنىن جەتكىزدى. ال «Elsana Amanat» قوعامدىق قورىنىڭ پرەزيدەنتى سەرىك ەرعالي بۇل كورمەدە ەلىمىزدىڭ مەملەكەتتىك تۋىن بەينەلەگەن كىلەمنەن باستاپ, رەسەيدىڭ سانكت-پەتەربۋرگ قالاسىنداعى ەرميتاجدا ساقتالعان پازىرىق كىلەمىنىڭ كوشىرمەسىن تاماشالاۋعا بولاتىنىن اتاپ ءوتتى.
