سۋرەتتى تۇسىرگەن – ەرلان ومار, «EQ»
قازاقستان پرەزيدەنتى قاسىم-جومارت توقاەۆ بىلتىر قىتايعا رەسمي ءىسساپارى بارىسىندا وسىناۋ اتاۋلى جىلدىڭ تۋريزم سالاسىنا تيگىزەتىن سەپتىگى مول ەكەنىن اتاپ ءوتتى.
«تۋريزم سالاسىنداعى ىنتىماقتاستىقتىڭ كەلەشەگى زور. قازاقستاننىڭ بۇل باعىتتاعى مول الەۋەتىن ەسكەرە وتىرىپ, جاقىندا تۋريزم جانە سپورت مينيسترلىگىن قۇردىم. ءبىز قازاقستانعا ساياحاتتايتىن قىتايلىق تۋريستەر سانى ارتادى دەپ ۇمىتتەنەمىز. ۇكىمەتىمىز ەلدەگى تۋريزم سالاسىن دامىتۋعا بار كۇش-جىگەرىن جۇمسايدى. 2024 جىل – قىتايدا قازاقستان ءتۋريزمى جىلى بولىپ جاريالاندى. بۇل وسى سالا ءۇشىن مول مۇمكىندىكتەرگە جول اشادى. ءوزارا مادەني-گۋمانيتارلىق بايلانىستار ءۇشىن قولايلى جاعداي جاسالىپ جاتىر. مەملەكەتارالىق قارىم-قاتىناستاردى مۇلدەم جاڭا دەڭگەيگە شىعارۋ ءۇشىن قازاقستاننىڭ دا, قىتايدىڭ دا وراسان زور الەۋەتى بار دەپ سانايمىن. ارينە, ءبىز وتانداستارىمىزدىڭ دوستاس ەلمەن جانە ونىڭ اسەم تابيعاتىمەن, الەۋمەتتىك-ەكونوميكالىق دامۋ جەتىستىكتەرىمەن تانىسۋى ءۇشىن قىتايعا ءجيى ساياحاتتاپ بارۋىن قولدايمىز», دەدى ق.توقاەۆ.
راسىندا, بۇل جىل كورشىمىزگە ەلىمىزدىڭ كورىكتى جەرلەرىن بارىنشا كەڭىنەن كورسەتۋگە, تۋريستىك الەۋەتىمىزدى جاقسى قىرىنان تانىستىرۋعا زور ىقپال ەتەدى. وسى ماقساتتا تۋريزم جانە سپورت مينيسترلىگى ارناۋلى تۇجىرىمداما ازىرلەپ, قىتاي مەملەكەتىندە اۋقىمدى ءىس-شارالار ۇيىمداستىرۋدى جوسپارلاپ وتىر.
«تۋريزم سالاسىنداعى 2024 جىلدىڭ ەڭ باستى وقيعالارىنىڭ ءبىرى – قىتايداعى قازاقستان ءتۋريزمى جىلى بولماق. ءىس-شارانىڭ نەگىزگى ماقساتى – ەلىمىزدىڭ تۋريستىك الەۋەتىن ىلگەرىلەتۋ, مادەني تاجىريبە الماسۋ, ەكى ەل حالىقتارى اراسىنداعى ءوزارا تۇسىنىستىك پەن دوستىقتى نىعايتۋ. قىتايداعى تۋريزم جىلى اياسىندا بەيجىڭ قالاسىندا اشىلۋ ءراسىمى, تۋريزم تۇرلەرى (ەكولوگيالىق, مەديتسينالىق, اگروتۋريزم, قالالىق, MICE جانە عارىشتىق تۋريزم) بويىنشا تاقىرىپتىق اپتالار وتكىزۋ, قىتايدىڭ 7 ءىرى قالاسىندا توپ-20 وتاندىق دەستيناتسيالاردىڭ تۇساۋكەسەرىن جاساۋ جوسپارلانىپ وتىر. ەلىمىز ەرەكشە تابيعاتى, باي مادەني مۇراسى جانە باعا قولجەتىمدىلىگى سياقتى كورسەتكىشتەرىمەن الەمدىك رەيتينگتە جاقسى ورىن الادى. ءبىز قولدا بار وراسان زور تۋريستىك مۇمكىندىكتەرىمىزدى تولىق پايدالانۋىمىز كەرەك. بۇل سوزىمىزگە دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىنە سايكەس, تۋريزم رەيتينگىندە 117 ەلدەن 66-ورىنعا تۇراقتاۋىمىز دالەل بولا الادى», دەپ اتاپ ءوتتى تۋريزم جانە سپورت ءمينيسترى ەرمەك مارجىقپاەۆ.
جالپى, قازاقستاندا تۋريزم سالاسىنىڭ نەگىزگى كورسەتكىشتەرى بويىنشا ورتاشا ءوسىم بايقالادى. 2023 جىلدىڭ 9 ايىنىڭ قورىتىندىسى بويىنشا ىشكى تۋريستەر سانى 5,4 ملن ادامدى قۇرادى. بۇل – وتكەن جىلمەن سالىستىرعاندا 552 مىڭعا ارتىق. ال شەتەلدىك تۋريستەر سانى 225 مىڭ ادامعا ارتىپ, 835 مىڭ ادامدى قۇرادى. ەلىمىزدە 2019 جىلدان باستاپ توپ-10 باسىم تۋريستىك اۋماقتى دامىتۋ بويىنشا جۇمىستار بەلسەندى جۇرگىزىلدى.
وسى باعىتتاعى جۇمىستار جاڭا جىلدا ودان سايىن جاندانا تۇسەدى دەگەن سەنىم زور. بۇل ءوز كەزەگىندە ەلدىڭ اتىن تانىتىپ, ساپارلاپ كەلۋشىلەردىڭ دە قاتارىن ارتتىرا تۇسەدى. بۇعان, ارينە, قىتايداعى قازاق ءتۋريزمىنىڭ جىلى دا زور ۇلەسىن قوساتىنى ءسوزسىز. سونداي-اق شانحاي ىنتىماقتاستىعى ۇيىمى (شىۇ) اياسىندا الماتى قالاسىنا مادەني جانە تۋريستىك استانا مارتەبەسى بەرىلگەنىن دە ەرەكشە اتاپ وتۋگە بولادى. بۇل مارتەبە 2023 جىلدىڭ قاراشاسىندا ۇرىمجىدە وتكەن «تۋريزم جىلى – 2023» فورۋمىندا بەرىلدى. شىۇ-عا مۇشە مەملەكەتتەر باسشىلارى كەڭەسىنىڭ بۇل وتىرىسىندا 2023-2024 جىلدارعا ارنالعان توراعالىق ءۇندىستاننان قازاقستانعا اۋىسقانى دا بەلگىلى.
وسى ورايدا وتكەن جىلى الماتىعا جولى تۇسكەن شەتەلدىك تۋريستەردىڭ 70%-عا جۋىعى شىۇ-عا مۇشە ەلدەردەن ەكەنىن ايتا كەتكەن ءجون. بۇل كورسەتكىش بيىل كوتەرىلە ءتۇسۋى ابدەن مۇمكىن. سەبەبى بۇعان العىشارتتار جەتكىلىكتى. الماتى كورىكتى مەكەنگە باي, تاۋ كلاستەرىنە 20 مينۋتتا جەتىپ باراتىن ەرەكشەلىگىمەن قوسا ىسكەرلىك, مادەني جانە سپورتتىق ءتۋريزمدى دامىتۋدا ۇلكەن الەۋەتكە يە. بۇگىندە الماتىنىڭ 77 ەلمەن 45 تىكەلەي اۋە قاتىناسى مەن ۆيزاسىز رەجىمى جولعا قويىلعان.
بۇل رەتتە قازاقستان مەن قىتاي مەملەكەتتەرى اراسىنداعى ۆيزاسىز رەجىم تۋرالى مالىمەت بەرە كەتەيىك. 2023 جىلدىڭ 10 قاراشاسىن ەكى ەلدىڭ ۇكىمەتتەرى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم كۇشىنە ەندى. وسى كەلىسىمنىڭ 1-بابىنا سايكەس ەكى ەلدىڭ ازاماتتارى جەكە ىستەردى, ءتۋريزمدى, ەم قابىلداۋدى, حالىقارالىق تاسىمالداردى, ترانزيتتىك, سونداي-اق ىسكەرلىك ماقساتتاردى جۇزەگە اسىرۋ ءۇشىن ۆيزالىق تالاپتاردان بوساتىلادى.
وسىلايشا, ەكى ەلدىڭ ازاماتتارى شەكارادان وتكەننەن كەيىن كورشى ەلدە 30 كۇن ساپارلاي الادى. جالپى, 6 اي ىشىندە (180 كۇن) كۇنتىزبەلىك 90 كۇن ۆيزاسىز رەجىمسىز جۇرۋگە رۇقسات ەتىلەدى. ال ازاماتتارعا 30 كۇننەن ارتىق بولۋ قاجەتتىلىگى تۋىنداسا, ءتيىستى ساناتتاعى كىرۋ ۆيزاسىن الدىن الا راسىمدەۋ قاجەت. سونداي-اق ۆيزاسىز رەجىم جۇمىسقا ورنالاسۋعا, وقۋعا جانە ميسسيونەرلىك قىزمەت جاساۋعا قۇقىق بەرمەيدى. جوعارىدا اتالعان كەلىسىم قحر گونكونگ جانە ماكاو ارنايى اكىمشىلىك اۋداندارىنىڭ اۋماعىنا بارۋعا قولدانىلمايتىنىن اتاپ ءوتۋ كەرەك. قازاقستان ازاماتتارى گونكونگقا ۆيزاسىز 14 (ون ءتورت) كۇننەن اسپايتىن مەرزىمگە بارا الادى, ال ماكاوعا بارۋ ءۇشىن ۆيزا راسىمدەۋ قاجەت.
جالپى, بۇگىنگى تاڭدا قازاقستاندا 80 باعىت بويىنشا حالىقارالىق اۋە قاتىناسى قالپىنا كەلتىرىلدى. 74 ەل ءۇشىن ۆيزاسىز رەجىم جاڭارتىلدى. بۇل ءتىزىمدى 100-گە دەيىن ارتتىرۋ جوسپارلانىپ وتىر.
