فوتو: senate_kz
سەنات وتىرىسىندا دەپۋتات سوۆەتبەك مەدەباەۆ ديۆيدەندتەر تولەۋ ماسەلەسىن كوتەرىپ, ساۋدا جانە ينتەگراتسيا ۆيتسە-ءمينيسترى قايرات تورەباەۆقا سۇراق قويدى. سەناتور ءوز ساۋالىندا ديۆيدەنتتەردى ولشەۋ جانە ەسەپتەۋ ءۇشىن قانداي تەتىكتەر قولدانىلاتىنىن ناقتىلاعان ەدى. دەگەنمەن, ق. تورەباەۆ بۇل ماسەلە ءوز مينيسترلىگىنىڭ قۇزىرىنا جاتپايتىنىن ايتىپ, جاۋاپتى جازباشا تۇردە بەرەتىنىن جەتكىزدى.
الايدا, پالاتا توراعاسى ۆيتسە-ءمينيستردىڭ جۇمىسقا مۇنداي سالعىرت بولماۋ كەرەگىن ەسكەرتىپ, سەنات وتىرىستارىنا دايىندىقسىز كەلۋگە بولمايتىنىن ايتتى.
«سەناتور سالىققا عانا ەمەس, ديۆيدەندتەرگە دە قاتىستى سۇراق قويدى. سوندىقتان الداعى ۋاقىتتا وسىنداي كەزدەسۋلەرگە دايىندالىپ كەلىڭىزدەر. بۇعان دەيىن سۇراق قويعان اليشەر ساتۆالديەۆتىڭ ساۋالىنا دا جازباشا جاۋاپ بەرەمىن دەدىڭىز. ەندى وسى ماسەلەنىڭ دە ءوز مينيسترلىگىڭىزگە ەش قاتىسى جوق ەكەنىن ايتىپ وتىرسىز. ءسىز بۇگىنگى وتىرىسقا ۇكىمەتتەن باس سپيكەر رەتىندە شاقىرىلدىڭىز. سوندىقتان ارىپتەستەرىڭىزبەن ماسەلەلەردى الدىن-الا تالقىلاپ, تسيفرلاردى تالداپ, تىڭعىلىقتى دايىندالىپ كەلۋىڭىز كەرەك ەدى», دەدى ماۋلەن اشىمباەۆ.
