جىل توعىسىندا جاڭاقورعان, شيەلى اۋداندارىنداعى 5 ەلدى مەكەنگە تابيعي گاز جەتىپ, تۇرعىندار قۋانىشى ەسەلەنە ءتۇستى. قوس اۋدانعا جاساعان ساپارىندا وبلىس اكىمى نۇرلىبەك نالىباەۆ شيەلىدەگى ەڭبەكشى, جيدەلىارىق اۋىلدارىندا ۇيىمداستىرىلعان سالتاناتقا قاتىستى.
بيىل اۋدانداعى 40 مىڭنان اسا تۇرعىن تابيعي گاز تۇتىنۋعا قول جەتكىزىپتى. اۋدانداعى 6 ەلدى مەكەنگە گاز تاراتۋ جەلىلەرىن ورناتۋ ءۇشىن رەسپۋبليكالىق بيۋدجەتتەن 1,5 ملرد تەڭگە ءبولىنىپ, ءبىراز جۇمىس اتقارىلعان. كەلەر جىلعا قارالىپ وتىرعان 4 ملرد تەڭگەگە 12 ەلدى مەكەندى گازبەن قامتاماسىز ەتۋ جوسپاردا تۇر. وسىلايشا, 2024 جىلدىڭ سوڭىندا وبلىستى گازداندىرۋ دەڭگەيى 78 پايىزعا جەتپەك.
اۋىلداعىلار قۋانىشىنا وراي ۇيىمداستىرىلعان ءىس-شارادا «اۋىل – ەل بەسىگى» ۇلتتىق جوباسى اياسىندا گاز جۇرگىزۋگە ۇلەس قوسقان ازاماتتار مەن اۋدان ارداگەرلەرى ماراپات تورىنەن كورىندى.
جاڭا جىلعا ساناۋلى كۇندەر قالعان وسى ءبىر ءساتتى تالاپتان اۋىلدىق وكرۋگى تۇرعىندارى دا كوپكە دەيىن ۇمىتا قويماس. ولاي دەيتىنىمىز, وسى كۇنى بۇل اۋىلدىق وكرۋگتە دارىگەرلىك امبۋلاتوريا قولدانىسقا بەرىلدى. وبلىستاعى بەلدى كومپانيانىڭ ءبىرى – «باق-بەرەكە» جشس سالعان امبۋلاتوريا عيماراتى جەكە بۋ قازاندىعى ارقىلى ديزەل وتىنىمەن جىلىتىلادى. تۇرعىندار بارلىق قاجەتتى جابدىعى جەتكىلىكتى جاڭا نىساننىڭ ىڭعايلى, ساپالى سالىنعانىنا ريزاشىلىقتارىن ءبىلدىردى. وسى كۇنى ءدال وسىنداي امبۋلاتوريا اۋدانداعى اقتوعان اۋىلدىق وكرۋگىندە دە اشىلدى.
بيىل كوكتەمدە شيەلىمەن اۋىلى ارالاس جاڭاقورعان اۋدانىنداعى بىرلىك, قىراش ەلدى مەكەندەرىنە «كوگىلدىر وتىن» جەتىپ, قاراتاۋدىڭ ەتەگىندەگى قوس اۋىلدىڭ قۋانىشىنا كۋا بولعانبىز.
ال وسى دۇيسەنبى كۇنى اۋدانداعى جايىلما, شالقيا, قۇتتىقوجا اۋىلدارىنىڭ تۇرعىندارى ۇيلەرىنە تارتىلعان تابيعي گازدى العاش رەت تۇتاتتى. كەلەر جىلى وسى اۋدانداعى كەيدەن, تومەنارىق ەلدى مەكەندەرى تۇرعىندارى دا «كوگىلدىر وتىن» يگىلىگىن كورە باستايدى.
ساپار اياسىندا وبلىس اكىمى جاڭاقورعان اۋدانىنىڭ وزگەنت اۋىلدىق وكرۋگىندەگى 150 ورىندىق كلۋبتىڭ اشىلۋ سالتاناتىنا دا قاتىستى.
– مەملەكەت باسشىسى اۋىل جاعدايىن جاقسارتۋعا باسا ءمان بەرىپ كەلەدى. مەملەكەتتىڭ اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىنا سايكەس مادەنيەت سالاسىن وركەندەتۋگە قاجەتتى جاعدايلار جاسالىپ تا جاتىر. وركەنيەتتى ۇلت, ەڭ الدىمەن, تاريحىمەن, ونەرىمەن, الەمدىك مادەنيەتتىڭ التىن قورىنا قوسقان ۇلەسىمەن باعالانادى. ەلىمىزدىڭ, تۋعان جەرىمىزدىڭ اتىن الەمگە تانىتىپ جۇرگەن تالاي ونەرپازدار اۋىلدان شىققان. سوندىقتان مادەنيەت ۇيلەرىن, كلۋبتاردى بۇگىنگى زاماننىڭ سۇرانىسىنا ساي ەتۋ اسا ماڭىزدى. بۇگىن ەسىگىن ايقارا اشقان 150 ورىندىق جاڭا مادەنيەت وشاعى وسكەلەڭ ۇرپاقتى ونەرگە باۋلۋ ورتالىعىنا اينالادى دەپ سەنەمىن, – دەدى ايماق باسشىسى.
اۋىلداعىلاردىڭ قۋانىشىنا ورتاقتاسقان قوعام قايراتكەرى, قارجى سالاسىنىڭ ارداگەرى قالقازبەك اجىبەكوۆ جەرلەستەرىن قۇتتىقتاپ, اۋىل ارداگەرى قۇدايبەرگەن بازارباەۆ باتا بەردى.
بيىل وبلىستا 150 ورىندىق ءتورت كلۋب سالىنىپ پايدالانۋعا بەرىلدى. اقجول اۋىلىندا سپورت كەشەنى, جايىلمادا 150 ورىندىق كلۋب اشىلسا, قىزىلوردا قالاسىندا وتباسىلىق قۇندىلىقتار مەن سالت-ءداستۇردى دارىپتەيتىن «اناعا تاعزىم», «وتباسى» ورتالىقتارى جۇمىسىن باستادى. وبلىس ورتالىعىنداعى 1000 ورىندىق «ونەر» ورتالىعىنىڭ قۇرىلىسى جۋىردا اياقتالىپ, پايدالانۋعا بەرىلمەك. كەلەر جىلى 7 اۋداندا سالتانات سارايى, كىتاپحانا, مۋزەي, ارحيۆ جانە جاستار, ارداگەرلەر مەن انالار باس قوساتىن «رۋحانيات» ورتالىقتارى سالىنا باستايدى.
قىزىلوردا وبلىسى
