بيىلعى قىس ەرتىس-بايان وڭىرىندە ەرەكشە جىلى. جۋىرداعى ۇسكىرىك ايازداردىڭ سوڭى جىلىمىققا ۇلاسىپ, قازىرگى ۋاقىتتا كۇندىزگى تەمپەراتۋرا +3 گرادۋستى كورسەتىپ تۇر. ونىڭ ۇستىنە وسى اپتانىڭ سەيسەنبىسىندە جاۋعان جاڭبىر ءوزى از عانا تۇسكەن اق ۇلپانى ەرىتىپ جىبەردى. اۋا رايىنىڭ بۇلايشا قۇبىلۋى قىزىق بولعاندا ەرتىس وزەنى جاعالاۋىندا سالىنىپ جاتقان مۇز قالاشىقتاردى ەرىتىپ جىبەردى. پاۆلودار قالاسىنىڭ بيلىگى جاڭا جىل مەيرامىن ۇلان-اسىر ەتىپ تويلاۋدى ءجون دەپ شەشىپ, بيۋدجەتتەن باقانداي 185 ملن تەڭگە بولگەن. ونىڭ 52 ملن تەڭگەسى جاڭادان ورناتىلعان جاساندى شىرشانىڭ قۇرىلىسىنا بولىنسە, 53 ملن تەڭگە مۇزدان قالاشىقتار مەن سىرعاناقتار, جاڭا جىلدىق ەرتەگىلەردىڭ كەيىپكەرلەرىن كەسكىندەۋگە باعىتتالعان.
قازىنا قاراجاتىن جاراتۋشى قۇزىرلى مەكەمەلەر مەن كونكۋرستى ۇتىپ العان مەردىگەرلەر اۋا رايىن ەسكەرمەگەن بە, جۋىقتا عانا قالانعان مۇز قالاشىقتىڭ دەنى ءبىر كۇننىڭ ىشىندە ەرىدى دە كەتتى. ال ورتالىق جاعالاۋدىڭ تومەنگى تۇسىندا تۇرعىزىلىپ جاتقان قالاشىققا قاراۋدىڭ ءوزى ايانىشتى ەدى. ۋسولكا وزەنىنىڭ مۇزىنان ويىلىپ الىنعان مۇز كەسەكتەرى جىلى اۋا رايىنا شىداس بەرمەي ەرىپ, اينالاسى ءبىر-ەكى ساعاتتىڭ ىشىندە كولشىككە اينالدى.
قالا حالقى وسىنشاما قىرۋار قارجى بولىنگەن مۇز قالاشىقتىڭ ءبىر كۇندە ەرىپ كەتكەنىن تۇسىنە الماي دال. ميلليونداردى سۋعا اعىزعانشا, وزگە يگىلىكتى ىستەرگە جۇمساۋعا بولماس پا ەدى؟ ونىڭ ۇستىنە بۇعان دەيىن قالا اكىمىنىڭ ورىنباسارى سۆەتلانا گلادىشەۆا جاۋاپتى فيرما قالاشىققا مۇز عانا ەمەس, پلاستيك پەن اعاش ماتەريالداردى پايدالانىپ جاتقانىن, اۋا رايى جىلى بولعان جاعدايدا قالاشىقتى شاھار تۇرعىندارى مەن قوناقتارى ەمىن-ەركىن قىزىقتاي الادى دەپ سەندىرگەن. سايىپ كەلگەندە, مەملەكەتتىڭ قارجىسى جەلگە ۇشقان جاعدايمەن تەڭ بۇل.
«مۇز قالاشىعىنىڭ ەرىپ جاتقانى جۇرتتىڭ جاڭا جىل مەيرامى الدىنداعى جاقسى كوڭىل كۇيىنە كادىمگىدەي اسەر ەتىپ وتىر. اۋىلدان نەمەرەلەرىمىز كەلىپ, ولاردى مەرەكە كۇندەرى قىدىرتامىز دەپ جوسپارلاپ قويىپ ەدىك. ەستۋىمشە, 50 ميلليون تەڭگەدەن استام اقشا جۇمسالىپتى. ءبىزدىڭ تۇسىمىزگە كىرمەيتىن قاراجات قوي بۇل. ەسىل كەتكەن قايران اقشا؟ ودان دا بۇل قاراجات جوق-جىتىككە, مۇمكىندىگى شەكتەۋلى جاندارعا كومەك رەتىندە تاراتىلسا بولماس پا ەدى؟ مەيرام الدىندا قامكوڭىل جانداردى قۋانتار ەدىك دەپ ويلايمىن», دەيدى قالا تۇرعىنى ەرجان سەرىكوۆ.
قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ باس مامانى عيزات سمايىلوۆتىڭ ايتۋىنشا, مۇز قالاشىق پەن سىرعاناقتارعا مەردىگەر فيرما كەپىلدىك بەرگەن. الداعى كۇندەرى قۇلاپ, ەرىپ كەتكەن بولىكتەرىن قايتا قالپىنا كەلتىرەدى دەپ سەندىرىپ وتىر. الايدا كوپ بولىگى سۋ بولىپ اعىپ كەتكەن كەسكىندەردى قايتا قالپىنا كەلتىرۋ ءۇشىن جاۋاپتى فيرما قوسىمشا قاراجات شىعىنداي قويار ما ەكەن؟
بۇعان دەيىن وڭىرلىك ەكونوميكالىق تەرگەپ-تەكسەرۋ دەپارتامەنتى مەن انتيكور قىزمەتىنىڭ وكىلدەرى قالا بيلىگىنىڭ جاڭاجىلدىق مەيرامعا وسىنشاما مول قارجى شىعىنداعانىنا تەكسەرۋ جۇرگىزىلەدى دەپ مالىمدەگەن. ەندەشە, ەرىپ جاتقان ميلليونداردىڭ سۇراۋى بولادى دەپ ۇمىتتەنەمىز.
پاۆلودار
