سۋرەتتى تۇسىرگەن – نۇربەك يحسان
المالى اۋىلدىق وكرۋگىنە قاراستى اتامەكەن اۋىلى – اتىراۋ – ورال تاسجولى بويىندا ورنالاسقان, 120 وتباسى, التى جۇزدەي حالقى بار ەلدى مەكەن. كوگىلدىر وتىنى, تازا سۋى, ەلەكتر جەلىسى تارتىلعان, مالىن باعىپ, باۋ-باقشاسىن سالىپ وتىرعان ەل. تانىمال تايپاق قاربىزى وسى اۋىلدا وسەدى. اۋىل تۇرعىندارىنىڭ 60 پايىزى باۋ-باقشا وسىرۋمەن اينالىسادى. مۇندا جىل سايىن جاڭا ءۇي سالىنىپ, اۋىل تەز ءوسىپ كەلەدى. بەلگىلى ولكەتانۋشى جانىبەك ابىلپەيىسوۆ اشقان «جەرۇيىق» مۋزەيى دە وسى جەردە. اتامەكەننىڭ باستى مۇقتاجى – مەكتەپ عيماراتى ەدى. سوناۋ 1965 جىلى اۋىل تۇرعىندارى اسار جاساپ بالشىق يلەپ سالعان مەكتەپ ابدەن توزىپ, قۇلاعالى تۇرعان. ءاۋ باستا بالا سانىنا بايلانىستى باسىندا باستاۋىش بولسا, 1989 جىلدان ورتالاۋ مەكتەپكە اينالىپ, ال 2017 جىلدان بەرى جالپى ورتا ءبىلىم بەرەتىن مەكتەپ دارەجەسىنە كوتەرىلگەن ماحامبەت وتەمىس ۇلى اتىنداعى ءبىلىم ورداسىنا جاڭا عيمارات اۋاداي قاجەت ەدى. بۇل جونىندە «اتامەكەن وقۋشىلارى مەكتەپ سۇرايدى» دەگەن ماقالامىز گازەتكە سوناۋ 2021 جىلى شىققان ەكەن.
مىنە, اۋىل حالقى تاعاتسىزدانا كۇتكەن كۇن جەتتى. اتامەكەندىكتەر ءۇشىن اق تۇيەنىڭ قارنى جارىلدى دەسەك تە بولار. حالىقتىڭ قۋانىشىنا ورتاقتاسۋعا باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ ارنايى كەلدى. «ەل پرەزيدەنتىنىڭ جولداۋداعى تاپسىرمالارىنا سايكەس, وبلىس كولەمىندە 27 مەكتەپتىڭ قۇرىلىسى باستالعان بولاتىن. سونىمەن قاتار «جايلى مەكتەپ» ۇلتتىق جوباسى اياسىندا 18 ءبىلىم نىسانىنىڭ قۇرىلىسى جوسپارلانىپ, ونىڭ 9-ى بويىنشا بيىل جۇمىس باستاۋ الدى», دەدى ق.ايتمۇحامبەتوۆ.
جاڭا عيماراتتىڭ لەنتاسىن ارداگەر-ۇستازدار امانگەلدى جانايىسوۆ پەن قىمبات ورازوۆا قيدى. وسى مەكتەپتە 20 جىلعا جۋىق ديرەكتور بولعان ا.جانايىسوۆ ءبىر جىل ىشىندە قۇرىلىستى ساپالى اياقتاعان «جايىقسەلستروي» سەرىكتەستىگىنىڭ جۇمىسشىلارىنا العىس ايتتى. مەردىگەر كومپانيا ديرەكتورىنىڭ ورىنباسارى ەرلان وزبەكوۆ ءسوز سويلەپ, م.وتەمىسوۆ اتىنداعى ورتا مەكتەپتىڭ ديرەكتورى بولات وتەشەۆكە سيمۆولدىق كىلتتى تابىستادى.
چاپاەۆ اۋىلدىق وكرۋگىنە قاراستى جايىق اۋىلىنداعى نەگىزگى مەكتەپتىڭ اشىلۋ سالتاناتىنا دا اۋىل حالقى قۋانىشپەن جينالدى. ءبىر اۋىسىمدا 60 وقۋشى ءبىلىم الاتىن بۇل مەكتەپتىڭ جوبالىق قۇنى – 606,2 ملن تەڭگە. «قاراشىعاناق پەترولەۋم وپەرەيتينگ ب.ۆ.» كومپانياسىنىڭ تاپسىرىسىمەن قۇرىلىستى قولعا العان «اقسايسترويسەرۆيس ي ك» سەرىكتەستىگى ءوز مىندەتىن ءبىر جىلعا جەتكىزبەي ورىنداپ شىقتى. سالتاناتتى جيىن ۇستىندە كومپانيا باسشىسى ورىنباسار قۇشەۆ سيمۆولدىق كىلتتى مەكتەپ ديرەكتورى مەرۋەرت ەرمەنتاەۆاعا تابىس ەتتى.
ايتا كەتەيىك, 2022 جىلعى قارالى قاڭتار وقيعاسى كەزىندە الماتى قالاسىندا قازا تاپقان ساندىبەك حايىروۆ وسى اۋىلدىڭ تۋماسى بولاتىن. جايىق نەگىزگى ورتا مەكتەبىنىڭ جاڭا عيماراتىندا ساندىبەك عاليموللا ۇلى اتىنداعى «ەرلىك سىنىبى» اشىلدى. ەرلىك سىنىبىنىڭ لەنتاسىن باتىردىڭ اكەسى عاليموللا نۇرسايىن ۇلى مەن ۇستازى ساۋلە عالىمقىزى قيدى. جاڭا كابينەتتە جايىقتىق وفيتسەر, ءىى دارەجەلى «ايبىن» وردەنىنىڭ يەگەرى ساندىبەك قايىروۆ اتىنداعى پاتريوتتىق كلۋب جۇمىس ىستەيتىن بولادى.
جاڭا مەكتەپتە بۇدان بولەك 8 وقۋ كابينەتى, ۇلدار جانە قىزدار شەبەرحاناسى, سپورتزال, كىتاپحانا, اسحانا, مەديتسينا كابينەتى بار.
باتىس قازاقستان وبلىسى
