دۇلەي بوران 4 تۇرعىن ءۇي مەن 15 مەكتەپتىڭ شاتىرىن ج ۇلىپ اكەتكەن. اتالعان عيماراتتارعا كەلگەن ماتەريالدىق شىعىن كولەمى انىقتالىپ جاتىر.
وڭىردەگى جاعدايعا بايلانىستى وبلىس اكىمىنىڭ ورىنباسارى ارمان ابەنوۆ حالىقپەن بايلانىسقا شىعىپ, ارنايى مالىمدەمە جاسادى.
«توتەنشە جاعداي دەپارتامەنتى مەن پوليتسيا, سونداي-اق, جەرگىلىكتى اتقارۋشى ورگانداردىڭ قىزمەتكەرلەرى تۇرعىنداردىڭ اماندىعى ءۇشىن بارىنشا كۇش-قايرات جۇمساپ جاتىر. اۋا رايىنىڭ قولايسىزدىعىنا قاراماستان, كۇرە جولدىڭ بويىندا قار قۇرساۋىندا قالعان اۆتوكولىكتەر مەن ادامداردى قۇتقارۋ جۇمىستارىن جۇرگىزىپ جاتىرمىز.
بۇگىن وبلىستا 14 اۆاريالىق-قۇتقارۋ جۇمىسى جۇرگىزىلدى. 20 ادام قۇتقارىلدى. ونىڭ ىشىندە 1 جۇكتى ايەل جانە 1 بالا بار.
قوستاناي وبلىسى بويىنشا ءموبيلدى بەكەتتەرگە بارلىعى 166 پوليتسيا قىزمەتكەرى جانە 83 قىزمەتتىك اۆتوكولىك, 68 توتەنشە جاعداي قىزمەتكەرى جانە 14 تەحنيكا, 78 جەدەل مەديتسينالىق جاردەم بريگاداسى, ەنەرگەتيكا سالاسىنداعى 38 بريگادا جۇمىلدىرىلدى.
وبلىس بويىنشا 257 جىلىتۋ پۋنكتى دايىندالدى. ورىنداردىڭ جالپى سانى 11 255.
وكىنىشكە قاراي داۋىل كوتەرىلەتىنى تۋرالى ەسكەرتۋلەرگە قاراماستان, جولعا شىعىپ كەتىپ جاتقان اۆتوكولىك جۇرگىزۋشىلەرى ازايار ەمەس», دەدى ا.ابەنوۆ.
قوستاناي وبلىسى
