«2024-2026 جىلدارعا ارنالعان رەسپۋبليكالىق بيۋدجەت تۋرالى» زاڭدا 2024 جىلدىڭ 1 قاڭتارىنان باستاپ قولدانىسقا ەنەتىن قارجىلىق كورسەتكىشتەردىڭ جاڭا مولشەرى بەكىتىلگەن.
ماسەلەن, 2024 جىلدىڭ 1 قاڭتارىنان باستاپ ايلىق ەسەپتىك كورسەتكىش مولشەرى بىلتىرعى باعادان 7 پايىزعا ارتادى. ياعني, كەلەر جىلى اەك 3692 تەڭگەنى قۇرايدى. وسىعان بايلانىستى مەملەكەتتەن بەرىلەتىن الەۋمەتتىك جاردەماقىلار, كوپبالالى وتباسىعا بەرىلەتىن كومەك مولشەرى كوبەيەدى.
سونداي-اق ەڭ تومەنگى كۇنكورىس مولشەرىندەگى بازالىق كورسەتكىش - 40 567 تەڭگەدەن - 43 407 تەڭگەگە ارتادى. وسى نەگىز بويىنشا مۇگەدەكتىك جانە اسىراۋشىسىنان ايىرىلۋ بويىنشا تاعايىندالاتىن تولەم ۇلعايادى.
1 قاڭتاردان باستاپ ەڭ تومەنگى جالاقى (ەتج) سوماسى - 70 000 تەڭگەنى قۇرايدى.
بالا تۋعانى ءۇشىن بەرىلەتىن جاردەماقى مولشەرى: ءبىرىنشى, ەكىنشى جانە ءۇشىنشى بالا تۋعاندا – 38 اەك-كە كوتەرىلەدى. بۇل 2023 جىلى 131 100 تەڭگە بولسا, جاڭا جىلدىڭ 1 قاڭتارىنان باستاپ 140 296 تەڭگە بولادى. ءتورتىنشى جانە ودان دا كوپ بالاعا – 63 اەك جاردەماقى بەرىلەدى. بيىل بۇل سوما 217 350 تەڭگە بولسا, 2024 جىلدىڭ 1 قاڭتارىنان باستاپ 232 596 تەڭگە بولادى.
كەلەر جىلدان باستاپ العاش رەت ۇلتتىق قورعا ينۆەستيتسيالىق تابىستان تۇسكەن 50 پايىز قارجى ەلىمىزدەگى 18 جاسقا تولماعان بالالاردىڭ ەسەپشوتىنا اۋدارىلىپ وتىرادى. باستاما «ۇلتتىق قور - بالالارعا» جوباسى اياسىندا جۇزەگە اسادى. 1 قاڭتاردان باستاپ بالاعا اقشا ءتۇسىپ وتىرۋ ءۇشىن اتا -انا ىستەۋ كەرەك ارەكەتتەردى مىنا جەردەن بىلە الاسىز.
2024 جىلدان باستاپ جۇمىس بەرۋشىنىڭ مىندەتتى زەينەتاقى جارنالارى ەنگىزىلەدى. جۇمىس بەرۋشىنىڭ مىندەتتى زەينەتاقى جارنالارىن ءوز قاراجاتى ەسەبىنەن 2024-2028 جىل ارالىعىندا 1,5%-دان 5%-عا دەيىن كەزەڭ-كەزەڭىمەن جۇمىسكەرلەرىنىڭ پايداسىنا اۋدارۋ باستالادى. وسىلايشا, زەينەتكەرلىككە شىققان كەزدە بۇل جۇمىسكەرلەر قوسىمشا جيناقتاۋشى زەينەتاقى تولەمىمەن قامتاماسىز ەتىلەدى.
بازالىق زەينەتاقى مولشەرىنىڭ ەڭ تومەنگى مولشەرى - 28 215 تەڭگەگە, زەينەتاقى - 57 853 تەڭگەگە كوتەرىلەدى.
«2024-2026 جىلدارعا ارنالعان رەسپۋبليكالىق بيۋدجەت» تۋرالى زاڭ جوباسىندا «جاسىنا بايلانىستى زەينەتاقى تولەمدەرىنە جانە ەڭبەك سىڭىرگەن جىلدارى ءۇشىن زەينەتاقى تولەمدەرىنە باعىتتالعان قاراجات ولاردىڭ مولشەرىن 2024 جىلعى 1 قاڭتاردان باستاپ 9,0 پايىزعا ارتتىرۋدى ەسكەرە وتىرىپ كوزدەلگەنى بەلگىلەنسىن» دەپ كورسەتىلگەن.
جاڭا جىلدان باستاپ شاكىرتاقى دا ارتادى. جاۋاپتى مەكەمە پايىزدىق مولشەر 2024 جىلى مىناداي اقشا جيىنتىعىن كورسەتەتىنىن ايتتى:
- باكالاۆريات – 47 135 تەڭگە (پەداگوگيكالىق باعىتتا – 75 600 تەڭگە);
- ماگيستراتۋرا – 107 061 تەڭگە;
- دوكتورانتۋرا – 240 000 تەڭگە.
2024 جىلى بالاباقشا تاربيەشىلەرىنىڭ جالاقىسىن 30 پايىزعا كوتەرۋ كوزدەلگەن. ول ءۇشىن بيۋدجەتتەن 96 ميلليارد تەڭگە بولىنگەن. 242 ميلليارد تەڭگە عىلىمدى قارجىلاندىرۋعا باعىتتالماق. بۇل 616 ازامات جەتەكشى عالىمنىڭ جالاقىسىن ارتاتىنىن اڭعارتادى.
سونداي-اق باق وكىلدەرىنىڭ دە جالاقاسى 30 پايىزعا كوبەيەدى. بۇل ءۇردىس 2025 جىلعا دەيىن جالعاسادى.
كەلەر جىلعى 1 قاڭتاردان باستاپ سۋ سالاسىنداعى قىزمەتكەرلەردىڭ جالاقىسى 25 پايىزعا كوبەيەدى. بيىل قۇرىلعان سۋ رەسۋرستارى جانە يرريگاتسيا مينيسترلىگى وسى باعىتتا ءتيىستى شارالاردى قولعا العان.
2024 جىلى جاڭا تۇرعىن ءۇي باعدارلاماسى «9-20-25» ىسكە قوسىلادى. باعدارلاما بويىنشا جىل سايىن 8 مىڭ وتباسىنى باسپانامەن قامتۋ جوسپارلانعان. باعدارلاما نەگىزىندە ءۇي بەرۋدە جاستارعا باسىمدىق بەرىلمەك.
سىياقى مولشەرلەمەسى – 9%, باستاپقى جارنا – 20% جانە نەسيە مەرزىمى 25 جىلعا دەيىن. وسى شارتتار بويىنشا كەلەسى جىلدان باستاپ تۇرعىن ءۇيدى يپوتەكاعا الۋعا بولادى. جوبانى جۇزەگە اسىرۋعا 100 ملرد تەڭگە بولىنبەك.
2024 جىلدان باستاپ قازاقستاندا اۆتوكولىكتەردى ساقتاندىرۋ قۇنى وزگەرەدى. ەندى اۆتوكولىكتى ساقتاندىرۋ باعاسى وڭىرگە قاراي بەكىتىلەدى. كومپانيالار جىلىنا ءبىر مارتە ساقتاندىرۋ قۇنىن تۇزەتىپ وتىرۋعا قۇقىلى.
كولىكتىڭ جىلدامدىعىن ساعاتىنا 10-20 شاقىرىمعا اسىرعانى ءۇشىن ايىپپۇل 5 اەك قۇرايدى. 2023 جىلى 17250 تەڭگە بولسا, كەلەسى جىلى 18460 تەڭگە بولادى.
ءبىلىم بەرۋ سالاسىندا دا ءبىرشاما وزگەرىستەر بولادى. وقۋ-اعارتۋ مينيسترلىگى 2024 جىلى مەكتەپ باعدارلامالارىن جاڭارتۋدى جوسپارلاپ وتىر. مينيسترلىك جالپى ءبىلىم بەرەتىن پاندەر مەن باستاۋىش, نەگىزگى ورتا جانە جالپى ورتا ءبىلىم دەڭگەيلەرىن تاڭداۋ كۋرستارى بويىنشا ۇلگىلىك وقۋ باعدارلامالارىنا وزگەرىستەر مەن تولىقتىرۋلار ازىرلەدى. وسىلايشا, جاڭا تيپتىك وقىتۋ باعدارلامالارى قابىلدانباق.
