الدىمەن ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ پرەزيدەنت قاسىم-جومارت توقاەۆتىڭ «التىن تۇعىر» سىيلىعىمەن ماراپاتتاۋ راسىمىنە قاتىسۋشىلارعا جولداعان قۇتتىقتاۋ ءسوزىن وقىپ بەردى.
«بۇل – ۇلتتىڭ كەلەشەگى, ۇرپاقتىڭ تاربيەسى ءۇشىن ايرىقشا ءمانى بار وقيعا. ءتول ونەرىمىزدە قازاقتىڭ تاريحى, مادەنيەتى, ادەت-عۇرپى مەن سالت-ءداستۇرى تۇگەل كورىنىس تاپقان. ۇلتتىق ويىندارىمىز حالقىمىزدىڭ وتانشىلدىق, ادالدىق, جاۋاپكەرشىلىك, قايسارلىق, ەپتىلىك سياقتى قاسيەتتەرىنىڭ ۇرپاقتان-ۇرپاققا جالعاسۋىنا سەپتىگىن تيگىزىپ كەلەدى. ۇلى دالانى دۇبىرلەتكەن كوشپەلىلەر مادەنيەتىن زامان تالابىنا ساي بەيىمدەپ, جاڭعىرتۋ ۇلتىمىزدىڭ بولمىسىن جانە بىرەگەيلىگىن ساقتاۋعا ىقپال ەتەدى. وسى ورايدا ۇلتتىق ويىندارعا جاناشىرلىق تانىتىپ, ونى دارىپتەپ جۇرگەن ازاماتتارعا شىنايى ريزاشىلىعىمدى بىلدىرەمىن», دەلىنگەن مەملەكەت باسشىسىنىڭ قۇتتىقتاۋىندا.
ءوز سوزىندە پارتيا توراعاسى مەملەكەت سپورت سالاسىن وركەندەتۋگە مەيلىنشە نازار اۋدارىپ, قامقورلىق تانىتىپ كەلە جاتقانىن اتاپ ءوتتى.
«Amanat» پارتياسى دا ۇلتتىق قۇندىلىقتارىمىزدى, ۇلتتىق سپورتىمىزدى جاڭعىرتىپ, دامىتۋعا بارىنشا قولداۋ كورسەتىپ كەلەدى. ءتىپتى پارتيانىڭ تۇعىرناماسى مەن سايلاۋالدى باعدارلاماسىندا بۇل سالا نەگىزگى باسىمدىق رەتىندە كورسەتىلگەن. بۇگىنگى «التىن تۇعىر» بايقاۋى دا ءبىزدىڭ پارتيامىزدىڭ قولداۋىمەن ۇيىمداستىرىلىپ وتىر. ۇلتتىق سپورت دەگەنىمىز – قازاقتىڭ جانى, قازاقتىڭ رۋحى. ال وعان قامقورلىق جاساۋ حالقىمىزدىڭ الدىنداعى پەرزەنتتىك بورىشىمىز دەپ بىلەمىن», دەدى ەرلان قوشانوۆ.
سونداي-اق ول كەلەسى جىلى ەلىمىزدە وتەتىن بەسىنشى دۇنيەجۇزىلىك كوشپەلىلەر وينىن ۇلتتىق رۋحىمىزدى كوتەرەتىن تاريحي وقيعا ەكەنىن ايتىپ, 100-دەن اسا مەملەكەتتىڭ سپورتشىلارى باس قوساتىن الەمدىك دودانىڭ تابىستى وتەتىنىنە سەنىم ءبىلدىردى.
ماراپاتتاۋ راسىمىندە تۋريزم جانە سپورت ءمينيسترى ەرمەك مارجىقپاەۆ, استانا قالاسىنىڭ اكىمى جەڭىس قاسىمبەك, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ءسوز سويلەپ, جەڭىمپازدارعا ۇلتتىق سىيلىقتى تابىس ەتتى.
وسىلايشا, «التىن تۇعىر» ۇلتتىق سىيلىعى «كوكپار», «بايگە», ء«داستۇرلى ساداق اتۋ», «اۋدارىسپاق», «جامبى اتۋ», «تەڭگە ءىلۋ», «اسىق اتۋ», «توعىزقۇمالاق», «قۇسبەگى» جانە «Joryq» سىندى 10 اتالىم بويىنشا ۇزدىك سپورت ساڭلاقتارىنا بەرىلدى.
اتاپ ايتقاندا, «كوكپار» اتالىمى بويىنشا سىيلىقتى قازاقستاننىڭ 13 دۇركىن چەمپيونى, حالىقارالىق تۋرنيرلەردىڭ جەڭىمپازى «اۋليە اتا» كوكپار كومانداسى يەلەندى. «اۋدارىسپاق» اتالىمىندا سىيلىققا 70 كگ سالماقتا تۇڭعىش الەم چەمپيونى مۇحامەتجان سايلاۋ لايىق دەپ تانىلدى. «جامبى اتۋ» اتالىمىندا قازاقستان چەمپيونى, الەم كۋبوگىنىڭ كۇمىس جۇلدەگەرى, جاستار اراسىنداعى الەم چەمپيونى باتىر بەكساۋىت ماراپاتتالدى. «تەڭگە ءىلۋ» اتالىمى بويىنشا سىيلىق ازيا جانە قازاقستان چەمپيونى بەكنۇر سەرىكوۆكە بۇيىردى. «اسىق اتۋ» اتالىمىندا سىيلىقتى قازاقستان جانە ەۋروپا كۋبوگىنىڭ يەگەرى, ۇلتتىق سپورت تۇرلەرى فەستيۆالىنىڭ جەڭىمپازى پاۆلودار وبلىسىنىڭ قۇراما كومانداسى الدى. ء«داستۇرلى ساداق اتۋ» اتالىمى بويىنشا الەم كۋبوگىنىڭ ەكى دۇركىن, قازاقستاننىڭ ءۇش دۇركىن چەمپيونى اياۋلىم اپپازوۆا ماراپاتتالدى. «توعىزقۇمالاق» اتالىمى بويىنشا سىيلىق ازيا چەمپيونى جانات قايمولدينگە تابىستالدى. «Joryq» اتالىمى بويىنشا سىيلىقتى « ۇلى دالا جورىعى – 2023» مارافون-بايگەسىنىڭ جەڭىمپازى جەتىسۋ وبلىسىنىڭ كومانداسى يەلەندى. «قۇسبەگى» اتالىمى بويىنشا سىيلىق حالىقارالىق ءتۋرنيردىڭ جەڭىمپازى ارمانبەك كۇنتۋعانعا بۇيىردى. «بايگە» اتالىمى بويىنشا سىيلىق رەسپۋبليكالىق تۋرنيرلەردىڭ بىرنەشە دۇركىن جەڭىمپازى بەكزات ءدىلداحان جانە «سەكرەت» ەسىمدى تۇلپارعا بەرىلدى.
