تاۋەلسىزدىك كۇنىنە ورايلاستىرىلعان كونتسەرتتى اتىراۋ وبلىسى اكىمدىگىنىڭ قولداۋىمەن قازاقستان رەسپۋبليكاسىنىڭ ماجارستانداعى ەلشىلىگى ۇيىمداستىردى. ەلشى جانىبەك ءابدىراشوۆتىڭ ايتۋىنشا, ەكى ەل اراسىنداعى ىنتىماقتاستىقتى, مادەني بايلانىستى نىعايتۋ كوزدەلگەن.
كونتسەرتتىك زال ساحناسىندا وركەستر ۇجىمى قازاق جانە الەم كلاسسيكتەرى – قۇرمانعازى ساعىرباي ۇلى, دينا نۇرپەيىسوۆا, جاياۋ مۇسا, احمەت جۇبانوۆ, نۇرعيسا تىلەنديەۆ, ەۆگەني برۋسيلوۆسكي, سونداي-اق يوگان شتراۋستىڭ شىعارمالارىن ورىندادى. ماجار كورەرمەندەرى قازاقتىڭ ۇلتتىق اسپاپتارىنان توگىلگەن سيقىرلى سازدى تىڭداپ, باي شىعارماشىلىق رەپەرتۋارعا ىقىلاسىن ءبىلدىردى. اسىرەسە «بالبىراۋىن», «اداي» كۇيلەرى مەن «قورقىت» كومپوزيتسياسى ەرەكشە قىزىقتىردى. جەرگىلىكتى كورەرمەن يوگاننەس برامستىڭ «ماجار بيلەرى №5» كومپوزيتسياسىن توسىن سىي رەتىندە قابىلدادى.
«اۋەن مەن ءاندى تىڭداعاندا ەرەكشە سەزىم پايدا بولدى. حالىق مۋزىكاسى ارقاشان كونە زاماننان كەلە جاتقان وقيعالاردى بەينەلەيدى. كوشپەلى حالىقتاردى دۇنيەگە اكەلگەن ۇلى دالانىڭ مۋزىكالىق مۇراسىن ەستىدىك. قازاق جاراتىلىسىنان وتە دارىندى, مادەنيەتى باي, ادەمى داۋىسى بار حالىق ەكەن», دەپ پىكىر ءبىلدىردى ماجارلىق كورەرمەننىڭ ءبىرى.
كورەرمەندى «كۇي تارتىستىڭ» ەنەرگەتيكاسى ءدۇر سىلكىندىردى. كۇيشىلەردىڭ ورىنداۋ شەبەرلىگى مەن دومبىرانىڭ قۋاتتى ۇنىنە ىقىلاسپەن قول سوقتى.
اتىراۋ وبلىسى
