ءوز سوزىندە ماۋلەن اشىمباەۆ ەلىمىزدە مەملەكەت باسشىسىنىڭ باستاماسىمەن كەشەندى رەفورمالار ىسكە اسىرىلىپ جاتقانىن اتاپ ءوتتى. ولاردىڭ نەگىزگى ماقساتى – قازاقستاندى ادىلەتتى, دەموكراتيالىق, ينكليۋزيۆتى مەملەكەت رەتىندە قالىپتاستىرۋ. رەفورمالاردىڭ تيىمدىلىگى جانە ولاردىڭ دۇرىس جۇزەگە اسىرىلۋى نەگىزىنەن قابىلدانعان زاڭدارعا بايلانىستى. وسىعان وراي عىلىمي-ساراپتامالىق قوعامداستىقتى وڭتايلى زاڭنامالىق شەشىمدەردى تابۋعا جۇمىلدىرۋدىڭ ماڭىزى ارتىپ كەلەدى. بۇل رەتتە پارلامەنت سەناتىنىڭ جوبالىق كەڭسەسى مەن Maqsut Narikbayev University زاڭ دايىنداۋ ۇدەرىسىنە اكادەميالىق ورتانى تارتا وتىرىپ, ساراپتامالىق ديالوگتىڭ نەگىزگى الاڭىنا اينالۋدى كوزدەيدى.
«پرەزيدەنتىمىزدىڭ بارلىق باستامالارىن ءساتتى ىسكە اسىرىپ, ادىلەتتى قازاقستان باعدارلاماسىن ءتيىستى دەڭگەيدە ورىنداۋ ءۇشىن زاڭدارىمىزدىڭ ساپاسى وتە جوعارى بولۋعا ءتيىس. سوندىقتان بىزگە, ەڭ الدىمەن, جاڭا فورماتسياداعى زاڭدار قاجەت. ەكىنشىدەن, ادىلەتتى قازاقستاندى ءبارىمىز بىرگە قالىپتاستىرامىز. ال ادىلەتتى قازاقستان دەگەنىمىز – ينكليۋزيۆتى قازاقستان. وسىعان بايلانىستى زاڭداردى ازىرلەۋ كەزىندە الەۋمەتتىك توپتاردىڭ پىكىرلەرى دە ەسكەرىلۋى كەرەك. ۇشىنشىدەن, زاڭنامالىق جۇمىستارعا جاڭا تاسىلدەر مەن تەتىكتەردى ەنگىزۋ قاجەت. بۇل رەتتە جوبالىق باسقارۋدىڭ ماڭىزى زور. ول ارقىلى ءبىز زاڭ جوبالارىن ازىرلەۋگە قۇزىرەتتى مامانداردى جۇمىلدىرا الامىز. سول ارقىلى زاڭداردىڭ وزەكتىلىگى مەن ساپاسى ارتادى. جالپى, مۇنداي جوبالىق كەڭسەنى تاۋەلسىز الاڭنىڭ نەگىزىندە قالىپتاستىرعان ءجون», دەگەن پالاتا سپيكەرى مۇددەلى تاراپتاردى وسى باعىتتا بىرلەسىپ جۇمىس ىستەۋگە شاقىردى.
سونداي-اق ول سوڭعى ەكى جىلدا پارلامەنت 170-تەن استام زاڭ قابىلداعانىن تىلگە تيەك ەتتى. الداعى ۋاقىتتا سالىق, بيۋدجەت جانە سۋ كودەكستەرى قابىلدانادى. بارلىق قۇجات ساياسي جۇيەنى جاڭعىرتۋعا, ەكونوميكامىزدى جانداندىرۋعا جانە حالىقتىڭ ءال-اۋقاتىن ارتتىرۋعا ارنالعان.
ءوز كەزەگىندە اتالعان ۋنيۆەرسيتەتتىڭ باسقارما توراعاسى تالعات نارىكباەۆ وقۋ ورنىنىڭ نورمالار شىعارۋعا قاتىستى جۇمىسى مەن تاجىريبەسىنە توقتالىپ, جوبالىق كەڭسە قىزمەتىنىڭ كەلەشەگىنە نازار اۋداردى.
ء«بىز بىرنەشە جىل بويى زاڭ جوبالارىنا عىلىمي جانە سىبايلاس جەمقورلىققا قارسى ساراپتاما جۇرگىزدىك. عالىمدارىمىز پارلامەنت پەن ۇكىمەتتىڭ شاقىرۋلارى بويىنشا جاڭا نورمالاردى تالقىلاۋعا ارنالعان جۇمىس وتىرىستارىنا بەلسەندى قاتىسىپ كەلەدى. قازىرگى تاڭدا ۋنيۆەرسيتەتىمىزدىڭ «think tank» فورماتىندا ءارتۇرلى سالاداعى قولدانبالى عىلىمي زەرتتەۋلەردى گەنەراتسيالاۋعا ارنالعان جەكە زەرتتەۋ جانە تالداۋ ورتالىعىن قۇرىپ جاتىرمىز. بۇل حاب جاس عالىمدارعا قولايلى جاعداي تۋعىزىپ, موتيۆاتسيا بەرەدى دەپ سەنەمىز. پارلامەنت سەناتىندا وسىنداي ماڭىزدى ماقساتتى كوزدەيتىن جوبالىق كەڭسەنىڭ جۇمىس ىستەيتىنى قۋانتادى. الداعى ۋاقىتتا سەنات پەن MNU-ءدىڭ مۇمكىندىكتەرى جانە الەۋەتى قازاقستان حالقىنىڭ يگىلىگىن كوزدەيتىن ساپالى زاڭ جوبالارىن ازىرلەۋگە تىڭ سەرپىن بەرەدى دەپ سەنەمىن», دەدى ت.نارىكباەۆ.
وتىرىستىڭ ناتيجەسىندە ىنتىماقتاستىق جونىندەگى مەموراندۋمعا قول قويىلدى. قۇجاتتا زاڭنامالىق باستامالاردى ازىرلەۋ جانە ىلگەرىلەتۋدە, بىرلەسكەن ساراپتامالىق كەزدەسۋلەر مەن تالقىلاۋلار وتكىزۋدە, سونداي-اق باسقا دا ءوزارا ءىس-قيمىل بارىسىندا تاراپتاردىڭ ءبىر-بىرىنە كونسۋلتاتسيالىق جانە ساراپتامالىق قولداۋ كورسەتۋىنە قاتىستى ەرەجەلەر قاراستىرىلعان.
سونىمەن قاتار ءىس-شارادا MNU قىلمىستىق سوت تورەلىگى جانە عىلىمي ساراپتاما ماسەلەلەرى جونىندەگى عىلىمي-زەرتتەۋ جوبالارىنىڭ جەتەكشىسى مارات قوعاموۆ, زاڭ عىلىمدارىنىڭ دوكتورى, پروفەسسور يسيدور بورچاشۆيلي, دەپۋتاتتار, سەنات جانىنداعى جاس ساراپشىلار كلۋبىنىڭ مۇشەلەرى, باسقا دا قاتىسۋشىلار ءسوز الىپ, قوزعالعان تاقىرىپ بويىنشا ءوز پىكىرلەرىن ءبىلدىردى.
