قۇرىلىس جۇمىستارى ءبىراز جىلعا سوزىلىپ, تالاي جىرعا اينالىپ, سىنعا ىلىككەن ديسپانسەر عيماراتى قۇرىلىسى تولىق بىتپەسە دە 2019 جىلى جارتىلاي پايدالانۋعا بەرىلگەن ەدى. بىلىكتى مامان, تاجىريبەلى دارىگەر نۇرلان جاريەۆ 2015 جىلى ديسپانسەر باسشىلىعىنا كەلىسىمەن بىردەن ونىڭ جۇمىسىن جان-جاقتى جولعا قويىپ, زاماناۋي اپپاراتتارمەن جاراقتاندىرۋدى قولعا العان ەدى. الدىمەن ماڭعىستاۋدا وپەراتسيا جاساۋدى باستادى. ودان كەيىنگى شەشىمىن تاپپاي كەلگەن جايتتىڭ ءبىرى – گيستولوگيالىق زەرتتەۋ ماسەلەسى. ماتەريالدار استانا, الماتى قالالارىنا جىبەرىلىپ, جاۋابى 30-50 كۇندەپ كۇتتىرەتىن. ن.جاريەۆ وسى ماسەلەنى شەشۋدى باستى نازارعا قويىپ, قۇزىرلى ورىندار الدىندا قورعاپ, 2016 جىلى وڭىردە جەكە زاماناۋي گيستولوگيا, يممۋنوگيستوفيانى انىقتايتىن اپپاراتتار ىسكە قوسىلدى.
وبلىستا بۇدان 6-7 جىل بۇرىن اتالعان سالا بويىنشا نەبارى 5-6 مامان دارىگەر بولسا, بۇگىندە ديسپانسەردە 54 دارىگەر, ونىڭ ىشىندە 4 مەديتسينا عىلىمدارىنىڭ دوكتورى جانە 4 مەديتسينا عىلىمدارىنىڭ كانديداتى, 21 ونكولوگ, 131 ورتا بۋىندى قىزمەتكەر جۇمىس ىستەيدى. 2020 جىلدان باستاپ قوسىمشا 152 جۇمىس ورنى قۇرىلدى, بارلىعى 413 قىزمەتكەر شتاتتىق جۇمىسپەن قامتىلعان. شاقىرىلعان جوعارى بىلىكتى ماماندار مەن جاس ماماندار ديسپانسەردىڭ ەسەبىنەن جالدامالى تۇرعىن ۇيمەن قامتاماسىز ەتىلگەن. ديسپانسەرگە ونكوۋرولوگيا, باس-مويىن, ونكولوگيالىق ناۋقاستاردى وڭالتۋ سياقتى شاقىرىلعان مامانداردىڭ ەسەبىنەن جاڭا باعىتتار ەنگىزىلگەن.
– 2017-2018 جىلدارى دارىلەر ەسەبىن ءوزىمىز جاساپ, گوسپيتالدىق فارماتسەۆتىك ءبولىم اشىلدى. ءدارى-دارمەك كەلۋى ەسەپكە ءتۇستى, ەكونوميا بولدى. كرەديتورلىق قارىزدار جابىلدى. وسى جىلدارى رەسپۋبليكادا جۇمىسىمىز جاقسارۋ ديناميكاسىمەن ءجۇردى. جاڭا عيماراتقا كوشۋ جۇمىسىمىزعا وڭ سەرپىن بەردى, جاڭارۋ-جاڭعىرۋ قاجەتتىگىن ۇقتىق. قوماقتى جالاقىمەن ماماندار شاقىرتتىق, جاستاردى رەزيدەنتسياعا وقىتا باستادىق. 5 جاس مامان وقۋىن ءبىتىرىپ كەلدى, 6 مامان وقىپ ءجۇر. زاماناۋي اپپاراتتار الۋ, جوعارى ءبىلىمدى, تاجىريبەلى مامانداردى جيناۋ ناتيجەسىندە اۋرۋدى ەرتە انىقتاۋعا, اقتاۋدان-اق كۇردەلى وپەراتسيا جاساۋعا قول جەتكىزدىك. ماڭعىستاۋ وبلىسىندا بيىل 10 اي ىشىندە ونكولوگيالىق ديسپانسەر قىزمەتىنە 862 ادام جۇگىنىپ, تاجىريبەلى دارىگەرلەر 862 ادامنىڭ ىشىنەن 700-گە جۋىعىنىڭ دەرتىنەن ايىعۋىنا سەپتەستى. جىل باسىنان بەرى 180 مىڭعا جۋىق ادام سكرينينگتىك تەكسەرۋدەن ءوتتى. بۇل – وتكەن جىلدارمەن سالىستىرعاندا وتە جوعارعى كورسەتكىش, – دەيدى ماڭعىستاۋ وبلىستىق ونكولوگيالىق ديسپانسەردىڭ باسشىسى نۇرلان جاريەۆ.
ماڭعىستاۋ وبلىسىنىڭ ونكولوگيالىق ديسپانسەرى 31 باستاپقى مەديتسينالىق-سانيتارلىق كومەك كورسەتەتىن مەديتسينالىق ۇيىممەن حالىققا ونكولوگيالىق كومەك كورسەتۋ ءۇشىن بىرلەسىپ جۇمىس ىستەيدى. ونكولوگيالىق ديسپانسەر 135 تاۋلىكتىك جانە 25 كۇندىزگى توسەكتىك ورىنمەن قامتىلعان, سونداي-اق اۋىسىمىنا 150 كەلۋشىگە ارنالعان كونسۋلتاتسيالىق-دياگنوستيكالىق ەمحانا قىزمەتى جولعا قويىلعان.
2022 جىلى تولىقتاي پايدالانۋعا بەرىلگەن جالپى قۇنى 10,345 ملرد تەڭگەنى قۇرايتىن, اۋدانى 14 مىڭ شارشى مەتر ونكولوگيالىق ديسپانسەردىڭ جاڭا عيماراتى ىشىندە جەلىلىك ۇدەتكىش, براحيوتەراپياعا ارنالعان اپپارات, س-دۋگا, جوسپارلى جۇيەسى بار كت, مرت, ستەرەوتاكتيكالىق جۇيەسى جانە توموسينتەزى بار تسيفرلىق مامموگراف, ەندوۋزي, ارلەۋ وپەراتسيالىق بولمەلەرى جانە جەدەل قىزمەتتى اشىق جانە از ءينۆازيۆتى تاسىلدەرمەن جۇرگىزۋ ءۇشىن بارلىق قاجەتتى جابدىقپەن رەانيماتسيا بولىمشەسى بار, سونداي-اق ەمدەۋ-دياگنوستيكالىق قىزمەتكە ارنالعان باسقا دا جابدىقتارمەن قامتاماسىز ەتىلدى. 2022 جىلمەن سالىستىرعاندا وبلىستا قىزمەتتى باعالاۋدىڭ بارلىق ينديكاتورى بويىنشا جوسپارلار ورىندالىپ جاتىر. وبلىس بويىنشا بيىل د-ەسەپتە – 5 267 ناۋقاس تۇرسا, 2022 جىلى 4 801 ناۋقاس بولعان.
– بۇرىنعىداي ەمەس, وبلىستا ونكولوگيالىق ديسپانسەر جۇمىسىنىڭ دۇرىس جولعا قويىلۋى ءوڭىر تۇرعىندارىنىڭ ۋاقىتتان ۇتىلىپ, وزگە جاقتارعا بارۋىن ازايتتى. جاڭا عيماراتتا ناۋقاستار ءار پالاتادا 1-2 ادامنان جاتادى, ولار ءۇشىن بارلىق جاعداي جاسالعان. كەزىندە تاعدىرى باراكتان باستالعان ديسپانسەر بۇگىندە زاماناۋي اپپاراتتارمەن جابدىقتالعان پاتولوگيالىق ورتالىققا اينالدى. ميدان باسقا ورگانعا وپەراتسيا جاساۋ مۇمكىندىگىمىز بار. ءسۇت بەزى, جاتىر موينى, ىشەك جولدارىنان سكرينينگتەن وتەدى. وتكەن جىلى 103 مىڭ ادامدى سكرينينگپەن قامتىدىق, بيىل جىل سوڭىنا دەيىن 120 مىڭ ادامدى قامتاماسىز ەتەمىز دەپ وتىرمىز. ينۆەستورلارمەن جۇمىس ىستەۋ – باستى باعىتتىڭ ءبىرى. عيماراتتىڭ جان-جاعىن اباتتاندىرۋ ماسەلەسى شەشىمىن تاپتى. ەندى ەمدەۋ كەشەندى بولۋ ءۇشىن مەديتسينالىق يادرولىق ورتالىق سالۋ ويىمىزدا بار, – دەيدى ن.نۇريتدين ۇلى.
ديسپانسەر باسشىسىنىڭ ايتۋىنشا, جىلىنا 500-600 ناۋقاس قوسىلادى ەكەن. باق-تا, الەۋمەتتىك جەلىلەرىندە تۇرعىندارعا تۇسىنىك جۇمىستارى جۇرگىزىلىپ, ءار اي سايىن وتكىزىلگەن اشىق ەسىك كۇنى ناتيجەسىندە انىقتالعان ناۋقاستارعا ءتيىستى شارالار قابىلدانعان.
اۋرۋ بار جەردە وعان قارسى تۇرا الاتىن, ناۋقاستىڭ جانىنا اراشا بولاتىن بىلىكتى دارىگەر مەن زاماناۋي ورتالىقتىڭ بولعانى دۇرىس. كەزىندە شاعىن ادامدى قابىلداپ, ورتالىق اۋرۋحانانىڭ بولمەلەرىن جالعا الىپ وتىرعان ماڭعىستاۋ ونكولوگيالىق ديسپانسەرى قازىر جاڭا عيماراتتا ناۋقاستارعا قىزمەت كورسەتىپ جاتىر.
ماڭعىستاۋ وبلىسى
