مەملەكەت باسشىسىنىڭ تاپسىرماسىنا سايكەس بيىل دا تەڭىزدىڭ قۇرعاعان ۇلتانىندا 250 مىڭ گەكتارعا فيتو ورمان مەليوراتسيالىق جۇمىستار جۇرگىزۋ جوسپارلانعان. جىل سايىن جالعاسىپ كەلە جاتقان بۇل تىنىمسىز تىرلىكتەن بولەك تەڭىزدىڭ قۇرعاعان ۇلتانىنداعى 150 مىڭ گەكتاردىڭ توپىراعى زەرتتەلمەك. بۇل الدا وسى ماڭعا ەگىلەر وسكىن تۇرلەرىنىڭ تەز تامىر جايۋى ءۇشىن قاجەت.
جالپى اۋماعى 158 گەكتارعا ورمان مولىقتىرۋ جانە كوگالداندىرۋ جۇمىستارىنا قاجەتتى سەكسەۋىل مەن سايالى اعاش كوشەتتەرىن وسىرەتىن ۋاقىتشا ورمان تۇقىمباقتارىنىڭ ۇيىمداستىرىلاتىنى دا سىر القابىنداعى تىرشىلىكتى تۇلەتە تۇسەدى دەگەن سەنىم بار. الدا ءورتتى بولدىرماۋ جانە الدىن الۋ ءۇشىن قاۋىپتى ۋچاسكەلەردە 542 شاقىرىمعا جاڭادان ءورت جولاقتارىن سالىپ, 5 918 شاقىرىمدىق ەسكى ءورت جولاقتارىن قالپىنا كەلتىرۋ جوسپاردا بار. 2025 جىلعا دەيىن ارال تەڭىزىنىڭ قۇرعاپ قالعان 1 ملن 100 مىڭ گەكتار القابىنا سەكسەۋىل ەگىلۋگە ءتيىس بولسا, قازىر بۇل جوسپاردىڭ جارتىسى ورىندالىپ تۇر.
وبلىس اۋماعىنىڭ 7 ملن گەكتارىن ورمان القاپتارى الىپ جاتىر. ونىڭ دەنى – كوپ كۇي تالعاي بەرمەيتىن وسى سەكسەۋىل. بۇگىندە شولەيتكە شىدامدى اعاش قورىن مولايتۋ ءۇشىن سەكسەۋىل تەڭىز ۇلتانىنان بولەك جەزقازعان باعىتىنداعى جول بويىنا دا ەگىلىپ جاتىر. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ دەرەگىنشە, الدىڭعى جىلدارى 100 مىڭ, بىلتىر 250 مىڭ گەكتار سەكسەۋىل ەگىلگەن. جالپى, 1 گەكتار القاپقا 3,5 كيلوداي سەكسەۋىل تۇقىمى سەبىلەدى ەكەن.
وسى كۇنى ارالدىڭ قۇرعاعان ۇلتانىنىڭ كولەمى 4,5 ملن گەكتاردان اسىپ كەتتى. ونىڭ جارتىسى ءبىزدىڭ ەل اۋماعىنا كىرەدى. ۇزدىكسىز جۇرگىزىلگەن ەكولوگيالىق ءىس-شارالار ناتيجەسىندە ونىڭ ءبىراز بولىگى سەكسەۋىلدى ورمانعا اينالدى. ورمانشىلار قۇرعاعان تەڭىز تابانىن كوگالداندىرۋ وزبەكستان مەملەكەتىنە قاراستى اۋماقتا دا جۇرگىزىلىپ جاتقانىن ايتادى.
وسى توعايلى القاپتى قورعاۋ, ورتتەن ساقتاۋ شارالارىنا جەرگىلىكتى قازىنادان قوماقتى قارجى ءبولىنىپ, وعان ورمان شارۋاشىلىعى مەكەمەلەرىنىڭ ماتەريالدىق-تەحنيكالىق بازاسىن نىعايتۋ ماقساتىندا 2 ءورت ءسوندىرۋ تەحنيكاسى, 2 تراكتور, 4 پاترۋلدىك اۆتوكولىك پەن 60-قا جۋىق موتوتسيكل الىنعان. بۇل ورمان ءورتىنىڭ الدىن الىپ, جالىن بايقالعان ساتتە جىلدام جەتىپ, ءورتتى اۋىزدىقتاۋ ءۇشىن اسا قاجەت.
ورمانشىلار سەكسەۋىل, سارسازان, بارقىن, تۇزگىننەن بولەك شولەيتتى كليماتقا بەيىمدەلگەن سىر تالى, قاراعاش پەن ۇيەڭكى تالدارىن دا كوپتەپ ەگۋدى جوسپارلاپ وتىر.
قىزىلوردا
