فوتو: primeminister.kz
«وسى جىلى ستاتسيونارلاردا 3 ملن-عا جۋىق ادام كومەك الدى, العاشقى مەديتسينالىق-سانيتاريالىق كومەك جەلىسى 90 ميلليوننان استام ادامدى قابىلدادى, 360 مىڭنان استام نارەستە دۇنيەگە كەلدى (11 ايدىڭ قورىتىندىسى بويىنشا), جەدەل مەديتسينالىق جاردەم كۇشتەرىمەن 8 ملن شاقىرتۋ بويىنشا كومەك كورسەتىلدى.
وتكەن جىلعى كورسەتكىشپەن سالىستىرعاندا 10 اي ىشىندە حالىقتىڭ جالپى ءولىم-ءجىتىمىنىڭ كورسەتكىشى 5,7%-عا, قان اينالىمى جۇيەسى اۋرۋلارىنان ءولىم-ءجىتىم – 6,9%-عا, قاتەرلى ىسىكتەردەن – 0,6%-عا, تىنىس الۋ ورگاندارى اۋرۋلارىنان – 4,7%-عا, تۋبەركۋلەزدەن 22,1%-عا تومەندەدى. 11 ايدا نارەستە ءولىمى 9,6%-عا, انا ءولىمى 24,4%-عا ازايعان.
وسى جىلى دەنساۋلىق ساقتاۋ جۇيەسىن قارجىلاندىرۋعا 2,5 ترلن تەڭگە ءبولىندى. امبۋلاتوريالىق دەڭگەيدەگى شىعىندار ۇلعايتىلىپ, جالپى كولەمنىڭ 56%-ىن قۇرادى. بۇل رەتتە مەديتسينالىق وڭالتۋدى قارجىلاندىرۋ 13 ەسەگە – 2019 جىلعى 6 ملرد تەڭگەدەن 2023 جىلى 78,1 ملرد تەڭگەگە دەيىن ۇلعايدى. جالپى قازاقستان 2027 جىلعا قاراي مەديتسيناعا جۇمسالاتىن شىعىستاردىڭ ۇلەسىن ءىجو-ءنىڭ 5%-نا دەيىن جەتكىزۋ جونىندەگى ماقساتقا جەتۋ ءۇشىن سەنىمدى تۇردە قادام باسىپ كەلەدى.
امبۋلاتوريالىق ءدارى-دارمەكپەن قامتاماسىز ەتۋ كولەمى 2019 جىلمەن سالىستىرعاندا 2 ەسەدەن استام ۇلعايدى جانە 237 ملرد تەڭگەنى, ونىڭ ىشىندە ورفاندىق اۋرۋلاردى ەمدەۋ 51,8 ملرد تەڭگەنى قۇرادى. بارلىعى 3,9 ملن پاتسيەنت ءدارى-دارمەكپەن قامتاماسىز ەتىلدى.
رەسپۋبليكانىڭ 20 مەديتسينالىق ۇيىمىندا دارىلىك زاتتاردىڭ پاتسيەنتكە دەيىن (تاڭبالاۋ, كودتاۋ) جەتۋىن قاداعالاۋعا مۇمكىندىك بەرەتىن دارىلىك زاتتاردى ءبولۋدىڭ تولىق تسيكلى ىسكە قوسىلدى.
مەديتسينالىق مەكەمەلەر ءۇشىن 58,8 ملرد تەڭگەگە 514 بىرلىك مەديتسينالىق تەحنيكا ساتىپ الىندى. مەديتسينالىق ۇيىمداردىڭ مەديتسينالىق جابدىقتارمەن جاراقتاندىرىلۋى 2023 جىلى 2022 جىلمەن سالىستىرعاندا 2,5%-عا ۇلعايىپ, 84,15%-عا دەيىن جەتتى. 2023 جىلى كورسەتىلگەن كونسۋلتاتسيالىق-دياگنوستيكالىق قىزمەتتەردىڭ سانى 2,5 ەسەگە ارتىپ, 324 ملن-نان استى. بيىل 1,1 ملن ادام قىمبات دياگنوستيكالىق قىزمەت تۇرلەرىن (كت/مرت) الدى», دەلىنگەن حابارلامادا.
فارماتسەۆتيكالىق جانە مەديتسينالىق ونەركاسىپتى دامىتۋ باعىتىندا دا اۋقىمدى ىستەر اتقارىلدى. الماتى وبلىسىندا وڭتۇستىك كورەيانىڭ SGP فيرماسىمەن بىرلەسىپ شپريتستەر ءوندىرۋ جوباسى ىسكە اسىرىلدى. الماتىدا وڭتۇستىك كورەيانىڭ Samsung Madison كومپانياسىنىڭ جوعارى جانە ساراپتامالىق كلاستارىنىڭ ۋلترادىبىستىق ستاتسيونارلىق دياگنوستيكالىق جۇيەلەرىن شىعارۋ جولعا قويىلدى. ماڭعىستاۋ وبلىسىندا ەستۋ اپپاراتتارىنىڭ ءوندىرىسى, سولتۇستىك قازاقستان وبلىسىندا ساۋلەلەندىرگىشتەر مەن باكتەريتسيدتىك اۋا رەتسيركۋلياتورلارىنىڭ ءوندىرىسى, شىمكەنتتە سۇزگىش جارتىلاي ماسكالار ءوندىرىسى, قاراعاندىدا كلاپانى بار KN95 مەديتسينالىق رەسپيراتور ماسكالارىن ءوندىرۋ جەلىسى, جامبىل وبلىسىندا قۋاتتىلىعى جىلىنا 270 ملن بىرلىككە دەيىن ءبىر رەت قولدانىلاتىن ستەريلدى شپريتستەر ءوندىرىسى ىسكە قوسىلدى.
