اليۋميني ءوندىرىسى تەحنولوگياسىندا الدىن الا كۇيدىرىلگەن انودتىڭ ءمانى ايرىقشا. انود وندىرىسىندەگى ەڭ اۋقىمدى جابدىق – انودتى كۇيدىرۋ پەشى. 50 كامەرادان تۇراتىن جابدىقتىڭ ۇزىندىعى – 200, ال ەنى 30 مەتردەن اسادى. پەش جوباسىن نەمىستىڭ «Riedhammer» كومپانياسىنىڭ ماماندارى ازىرلەپ, وزدەرى ورناتىپ بەرگەن. كەيىن ونى شەتەلدىك مامانداردىڭ باقىلاۋىمەن وتاندىق «سترويمونتاج» كومپانياسىنىڭ وكىلدەرى ىسكە قوستى.
كۇردەلى جوندەۋ جۇمىستارىنا دايارلىق – وتە جاۋاپتى ءارى ۇزاق ۋاقىتتى تالاپ ەتەتىن كۇردەلى ۇدەرىس. اۋقىمدى جۇمىستىڭ تياناقتى كەستەسى جاسالىپ, جوندەۋ جۇمىستارى باستالماس بۇرىن قاجەتتى جابدىقتار, قوسالقى بولشەكتەر مەن ماتەريالدار تۇگەل جەتكىزىلگەن. انود كۇيدىرۋ پەشى تامىز ايىندا تولىق توقتاتىلىپ, جوندەۋ جۇمىستارى جوسپارلى ۋاقىتتان 2 اپتا بۇرىن اياقتالدى.
جاڭعىرتۋ بارىسىندا الەمدىك انود ءوندىرىسى ونەركاسىبىندەگى قازىرگى ەڭ وزىق جەتىستىكتەر ەسكەرىلدى. 14 مىڭ توننا جالىنعا ءتوزىمدى قاپتاما ارشىلىپ, نيدەرلاند, ءۇندىستان مەن گەرمانيادا وندىرىلگەن زاماناۋي جوعارى ساپالى ماتەريالداردى قولدانا وتىرىپ, قايتا ورناتىلدى. ودان بولەك, شىعارىندى گازدارعا ارنالعان 4 كوللەكتور الماستىرىلعان. سوڭعى بۋىننىڭ جاڭا جابدىقتارىنىڭ سەنىمدىلىگى جوعارى ءارى ولار پەش جۇمىسىن ايتارلىقتاي جاقسارتا الادى. كۇردەلى جوندەۋدەن سوڭ, انود كۇيدىرۋ كولەمى جىلىنا 138,4 مىڭ تونناعا جەتەدى دەپ جوسپارلانعان. جاڭعىرتۋدىڭ ەكىنشى كەزەڭى – جالىن-جاعۋ جابدىقتارىن الماستىرعان سوڭ, بۇل كورسەتكىش 153 مىڭ توننا جەتەدى دەگەن ءۇمىت بار.
«بۇل ينۆەستيتسيالىق جوبا تەك كاسىپورىننىڭ ءوندىرىس كولەمىن ۇلعايتىپ قانا قويماي, ونەركاسىپتىڭ ەنەرگيا تيىمدىلىگىن ارتتىرۋ, قورشاعان ورتاعا ەكولوگيالىق جۇكتەمەنى تومەندەتۋ سىندى بىرقاتار كەشەندى مىندەتتەردى شەشۋگە باعىتتالعان. پەشپەن قاتار ءبىز گاز تازارتۋ جۇيەلەرىن دە كۇردەلى جوندەۋدەن وتكىزدىك. الداعى 10 جىلدا ولاردىڭ جۇمىس تيىمدىلىگى 99,5% بولادى», دەدى ERG-ءدىڭ قازاقستانداعى باس ديرەكتورى سەرىك شاحاجانوۆ.
قازاقستان ەلەكتروليز زاۋىتى جاڭا 16 ەلەكتروليزدى ىسكە قوسىپ, ءوندىرىس قۋاتىن ۇلعايتۋدى كوزدەپ وتىر. ناتيجەسىندە, باستاپقى اليۋميني توتىعى ءوندىرىسىنىڭ كولەمىن جىلىنا 14 مىڭ تونناعا ارتتىرۋعا مۇمكىندىك تۋادى. كۇيدىرۋ پەشتەرىن كۇردەلى جوندەۋ جۇمىستارى الداعى ۋاقىتتا كاسىپورىندى ءوز انودتارىمەن قامتاماسىز ەتۋگە سەپتەسەدى.
