كورمەگە وتاندىق جانە شەتەلدىك قىلقالام شەبەرلەرىنىڭ 270-تەن اسا جۇمىستارى قويىلدى. ولاردىڭ دەنى: كەسكىندەمەلىك, گرافيكالىق, ءمۇسىن, گوبەلەن, كەراميكا جانە كيىزدەن جاسالعان بۇيىمدار. اسىرەسە ۇلتتىق بەينەلەۋ ونەرىنىڭ بارلىق بۋىنىنىڭ كارتينالارىندا حالقىمىزدىڭ تاريحى, ءومىرى, تۇرمىسى شىنايى بەينەلەنگەن. ءبىر جاعىنان, مۇندا سۋرەتشىلەر وداعىنىڭ 90 جىلدىق تاريحى تۇنىپ تۇر. سونداي-اق باسقا دا سۋرەتشىلەردىڭ تۋىندىلارىندا تابيعاتتىڭ سۇلۋلىعى, ۇيلەسىمدىلىگى, اڭىزدار مەن ەجەلگى قۇپيالار, قازىرگى دالا مەن قالا ءومىرى بارىنشا كورىنىس تاپقان.
ءىس-شارانىڭ اشىلۋىندا مادەنيەت جانە اقپارات ۆيتسە-ءمينيسترى دانيار قادىروۆ سۋرەتشىلەر وداعىنىڭ 90 جىلدىق مەرەيتويى تۋرالى جىلى لەبىزىن ءبىلدىرىپ, مينيستر ايدا بالاەۆانىڭ قۇتتىقتاۋىن وقىپ بەردى. ودان كەيىن ءسوز العان قازاقستان سۋرەتشىلەر وداعىنىڭ توراعاسى ومىربەك جۇبانيازوۆ: «بيىل – ءبىز ءۇشىن ەرەكشە جىل. ءبىزدىڭ وداقتىڭ قۇرىلعانىنا 90 جىل تولدى. سوعان وراي ءوتىپ وتىرعان كورمەنىڭ ەرەكشەلىگى – وعان وتاندىق قانا ەمەس, 10 ەلدىڭ سۋرەتشىلەرى دە قاتىسىپ, قولداۋ كورسەتتى. وسىندا قويىلعان شەتەلدىك قىلقالام شەبەرلەرىنىڭ تۋىندىلارى ۇلتتىق مۋزەي مەن ءا.قاستەەۆ اتىنداعى ونەر مۇراجايىنىڭ قورىنا تاپسىرىلادى. وسى ءىس-شارانى وتكىزۋگە مۇرىندىق بولعان بارشا ۇيىمعا العىسىمدى ايتامىن», دەدى ول.
سونىمەن قاتار ءىس-شارا اياسىندا دوڭگەلەك ۇستەل ءماجىلىسى ءوتىپ, وندا قازاقستان سۋرەتشىلەر وداعىنىڭ تاريحى, ونىڭ ىرگەسىن قالاعان تۇلعالار تۋرالى جانە وداقتىڭ بۇگىنگى حال-احۋالى جايىندا تىڭ ويلار, پاراساتتى پىكىرلەر ايتىلدى.
