فوتو: ۆەدومستۆو. تەلەگرام
ازيا ويىندارىندا كوركەم گيمناستيكادان ەل قۇراماسى ۇزدىك ناتيجە كورسەتىپ, اتالعان دودا الدىنداعى مىندەتتەمەلەرىن تولىق ورىنداعان, ياعني 2 كۇمىس پەن 1 قولا مەدال جەڭىپ العان. ولارعا ازيادادا جاقسى ناتيجە كورسەتكەنى ءۇشىن العىس بىلدىرگەن ەرمەك مارجىقپاەۆتىڭ ايتۋىنشا, فەدەراتسيا باسشىلىعى قىتايداعى جارىس الدىندا ءبىر كۇمىس جۇلدە الۋدى جوسپارلاعانىمەن, كۇتكەننەن دە جوعارى ناتيجەگە قول جەتكىزىپ, ازيا الامانىندا ەل قورجىنىنا 3 مەدال سالدى.
«ارينە, گيمناستيكادا تورەشىلەردىڭ سۋبەكتيۆتى باعالاۋى ءجيى كەزدەسەتىنى بارىنە ءمالىم. ءبىزدىڭ سپورتشىلاردىڭ بۇدان دا جاقسى ناتيجە كورسەتۋىنە مۇمكىندىگى بولعان ەدى. الايدا ءبارى ءبىز ويلاعانداي بولا بەرمەيدى. سوندىقتان حالىقارالىق جارىستاردا جۇمىس ىستەيتىن وتانداس تورەشىلەردىڭ سانىن ارتتىرۋ بويىنشا جۇمىستى كۇشەيتۋ قاجەت», دەدى مينيستر.
ال سپورتتىق گيمناستيكادان ەلىمىزدىڭ ەرلەر قۇراماسى قىتايدا 1 كۇمىس پەن 1 قولا جوسپارلاعانىمەن, ءبىر قولانى ۇتتى. ايتسە دە, ۇلتتىق قۇراما وكىلدەرى جەكەلەي كوپسايىستا وليمپيادا جولداماسىن جەڭىپ العانىن ايتا كەتكەن ءجون. قىزدار قۇراماسى حانچجوۋدا جەڭىس تۇعىرلارىنان كورىنە المادى.
كەزدەسۋ سوڭىندا ۆەدومستۆو باسشىسى سپورتتىق گيمناستيكا بويىنشا ەرلەر مەن قىزدار قۇراماسىنىڭ دايىندىق جۇمىستارىن قايتا قاراۋدى تاپسىردى. سپورتتىڭ اتالعان تۇرىنەن ۇلتتىق قۇراما وكىلدەرىنىڭ سوڭعى جىلدارداعى ناتيجەلەرى سپورتشىلاردى جاڭا جۇيە بويىنشا جاتتىقتىرۋدى قاجەت ەتەدى.
