سونىڭ ءبىرى – الماتى قالاسى باسقارماسىنىڭ مەملەكەتتىك قۋىرشاق تەاترى. ءارتۇرلى قۋىرشاقتارعا جان ءبىتىرىپ, شەبەر ويناتا بىلگەن ارتىستەردىڭ ونەرى بۋرسا كورەرمەندەرىنە ۇلكەن مەرەكە بولدى. الماتى قۋىرشاق تەاترىنىڭ رەجيسسەرلەرى سۇلتانعالي شۇكىروۆ پەن قۇرالاي ەشمۇراتوۆا جازعان شىعارمانى ساحنالاۋدا تروستى, پلانشەتتى, ماريونەتكا ء(جىپتى) جانە تۇتاس تۇلعالى قۋىرشاقتار قولدانىلدى.
بار كورگەن-بىلگەنى سمارتفون, ەرتەگىگە سەنبەيتىن, قۋىرشاقپەن كوپ ويناي قويمايتىن بۇگىنگىنىڭ بالاسى ءۇشىن تەاتر – سوڭعى ايالداما. ەم-دومى دا وسى جەردە. تەاتر – سۇلۋلىق پەن ەستەتيكا باسپالداعى دەسەك, ءدال وسى تالاپ ۇددەسىنە الماتىلىق تەاتردىڭ قويىلىمى ابدەن لايىق. 23 جىلدان بەرى ونەگەلى ونەر ورداسىندا ەڭبەك ەتىپ كەلە جاتقان مادەنيەت سالاسىنىڭ ۇزدىگى التاي تاۋەكەلوۆتىڭ ايتۋىنشا, ءاربىر اتا-انا بالاسىنىڭ ىزگىلىككە قۇشتار ءارى مەيىرىمدى بولىپ وسكەنىن قالاسا, ولاردى قۋىرشاق تەاترىنىڭ قويىلىمدارىنا اكەلگەنى دۇرىس.
تۇركيا تاراپى ۇيىمداستىرعان ايتۋلى فەستيۆالعا ەكىنشى رەت قاتىسىپ وتىرعان الماتى قۋىرشاق تەاترىنىڭ قورجىنىندا وتاندىق جانە شەتەلدىك اۆتورلاردىڭ شىعارمالارى بار. بۇگىندە جاس رەجيسسەرلەردىڭ تىنىمسىز ىزدەنىسى ناتيجەسىندە قۋىرشاق تەاترىنىڭ رەپەرتۋارى بالانىڭ وي-ءورىسىن كەڭەيتىپ, ەرتەگى الەمىنە قۇمار, تەاترعا دەگەن قىزىعۋشىلىعىن وياتاتىن قويىلىمدارعا تولى. دارىندى ءارتىس التاي باتىربەك ۇلىنىڭ ايتۋىنشا, قۋىرشاق تەاترى ماۋسىماشاردان سوڭ بىردەن ەلىمىزدىڭ اۋىل-ايماقتارىنا گاسترولدىك ساپارعا اتتانادى. ەلىمىزدىڭ تۇكپىر-تۇكپىرىندە ورنالاسقان مادەنيەت ۇيلەرىندە الەمگە تانىمال, بالانى قىزىقتىراتىن تاربيەلىك ءمانى زور شىعارمالاردى ساحنالايدى.
الماتى قۋىرشاق تەاترى ەلىمىزدىڭ كىشكەنتاي كورەرمەندەرىن عانا ەمەس, تۇركيالىق بالالاردى دا ۇلكەن قۋانىشقا بولەدى. ەندى بۋرسالىق بالدىرعاندار دا قازاق ەرتەگىلەرى كەيىپكەرلەرىنىڭ ساحناداعى ارەكەتىن تالاي مارتە اڭگىمەگە ارقاۋ ەتەتىنى ءسوزسىز.
قۇندىز ەرالى,
جۋرناليست
تۇركيا,
بۋرسا قالاسى
