«كۇنشىعىس ەلدەرىنە ساياسات كىندىگى, جول كوسەمى, ءىس كوسەمى, ەل تاربيەشىسى بولىپ تۇراتىن ادەبيەتكە نەگىز سالاتىن, ەلگە ءبىلىم كىلتىن اشاتىن جۋرنالدىڭ كەرەكتىگى كوپتەپ سەزىلەتىن. ەل جوعىن بىلەتىن, ەل تىلەگىنە, ەل مۇڭىنا قۇلاق سالاتىن جۋرنال ەلگە تۋرا جول سىلتەيتىن, تەرىسىن, قيسىعىن تەرگەيتىن جۋرنال ەلدىڭ شىن قامقورى, شىن دوسى بولىپ كورىنبەك», دەگەن تىلەك ءسوزىن «تەمىرقازىققا» ارناعان ءنازىر تورەقۇلوۆ سول باسىلىمنىڭ دۇنيەگە كەلۋىنە ايانباي تەر توگىپ, ەڭبەك ەتتى.
بار-جوعى ءۇش-اق ءنومىرى شىققان «تەمىرقازىق» جۋرنالى ءوز وقىرماندارىنىڭ كوزايىمىنا اينالىپ, سول تۇستاعى بەلگىلى قالام يەلەرى وسى جۋرنالعا قوعامدا بولىپ جاتقان وزەكتى ماسەلەلەرگە بايلانىستى ماقالالار جازدى.
«تەمىرقازىقتىڭ» العاشقى ءنومىرى شىققاندا اۋىل قازاعى ءوزىنىڭ تىلەگىن ولەڭ شۋماقتارىمەن جولداعان. مىنە, سونداي ەل قازاعىنىڭ ءبىرى ەسكەندىر شىنتاس ۇلىنىڭ جۇرەكجاردى ولەڭى جۋرنالعا ارنالعانى – سونىڭ ايعاعى. ولەڭ جولدارىندا اۋىل ازاماتى:
«قايىرلى, قۇتتى بولسىن, «تەمىرقازىق»,
سانالى اڭساعانعا بۇل ءبىر ازىق.
ەتەدى جولباسشىلىق, ءجون كورسەتىپ,
اداسساق باعىت اۋىپ, جولدان ازىپ.
قازاقتىڭ كەمدىكتە وسكەن ايناسى بۇل,
وزىمنەن وزىڭە ايتار تەرگەپ-قازىپ.
از سوزبەن ەلدەن كوڭىل بىلدىرەمىن
سۇيەلدى قولدارىممەن ولەڭ جازىپ»,
– دەپ قۋانا جولداعان ولەڭى اۋىل قازاعىنىڭ جۋرنالعا تىلەكشى ەكەنىن كورسەتەدى.
Cول كەزەڭدە ماسكەۋدەگى الاش زيالىلارى «كۇنشىعىس باسپاسى» اينالاسىندا توپتاسقان ەدى. باسپا تۋرالى حح عاسىردىڭ 20-جىلدارى باسپاسوزدە ءجيى ايتىلعان. قازاقشا رەسمي اتى – «كسرو حالىقتارى كىندىك باسپاسىنىڭ قازاق-قىرعىز ءبولىمى». ونىڭ تاريحى 1922 جىلدان باستالادى. ءدال سول جىلى اۆتونوميالىق رەسپۋبليكالار مەن وبلىستارعا ارنالعان كىتاپتار, مەرزىمدى باسىلىمدار شىعاراتىن كسرو ورتالىق اتقارۋ كوميتەتىنىڭ شىعىس باسپاسى نەگىزىندە اشىلدى. 1922-1928 جىلدارى ءنازىر تورەقۇلوۆ كسرو ورتالىق اتقارۋ كوميتەتى جانىنداعى ورتالىق باسپا باسقارماسىنىڭ توراعاسى, قازاق سەكتسياسىنىڭ باسشىسى قىزمەتىن اتقارعان. 1924 جىلى كسرو حالىقتارىنىڭ ورتالىق باسپاسى رەتىندە قايتا قۇرىلعان. 50 تىلدە كىتاپ, اۋدارما, ساياسي ادەبيەت, 12 تىلدە گازەت-جۋرنال شىعارعان. باسپا سانى از ۇلتتاردىڭ ەڭ العاشقى ءالىپبيىن جاساپ, وقۋلىقتارىن جاريالاعان. حالىق اراسىندا «كۇنشىعىس باسپاسى» دەپ ايتىلىپ كەتكەن. تەگەۋرىندى «تەمىرقازىق» جۋرنالى دا وسى باسپادان شىققان.
«تەمىرقازىق» جۋرنالىنىڭ 2-3 سانى بۇگىندە الماتى قالاسىنداعى قۇجاتتانۋ جانە مۇراعات ءىسى جونىندەگى عىلىمي-تەحنيكالىق اقپارات ورتالىعى سيرەك كەزدەسەتىن كىتاپتار مەن ماتەريالدار قورىندا ساقتاۋلى.
ماسكەۋدە جارىق كورگەن «تەمىرقازىق» جۋرنالى ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ PhD التىن اقىنبەكوۆانىڭ ىزدەنىسىنىڭ ناتيجەسىندە اراب قارپىنەن كيريلليتساعا اۋىستىرىلىپ, عىلىمي اينالىمعا ەنىپ وتىر.
ءابدىجاپار ساپارباەۆ,
حالىقارالىق ء«نازىر تورەقۇلوۆ» قايىرىمدىلىق قورىنىڭ پرەزيدەنتى, ەكونوميكا عىلىمدارىنىڭ دوكتورى, پروفەسسور
