وتاندىق قالامگەرلەردى مەملەكەت تاراپىنان ىنتالاندىرۋ, جاڭا قازاق ادەبيەتىنە سۇبەلى دە سۇيەكتى شىعارمالاردىڭ مولىنان قوسىلۋىنا ىقپال ەتۋ ماقساتىندا ۇيىمداستىرىلعان «ايبوز» ۇلتتىق ادەبي سىيلىعى – مادەنيەت جانە اقپارات مينيسترلىگىنىڭ تىكەلەي ۇيىتقى بولۋىمەن قولعا الىنعان بىرەگەي جوبا. ۇلتتىق بايقاۋدىڭ ماقساتى – قالامگەرلەر مەن باسپاگەرلەرگە مەملەكەت تاراپىنان جان-جاقتى قولداۋ كورسەتۋ, قازاق ادەبيەتىنىڭ تۇعىرىن نىقتاپ, جاڭا بەلەسكە كوتەرىلۋىنە جاعداي جاساۋ, قالامگەرلەردىڭ ەڭبەگىن ناسيحاتتاپ, باعىت-باعدار بەرۋ جانە ولاردىڭ شىعارماشىلىق جۇمىستارىنىڭ جارىق كورۋىنە ىقپال ەتۋ.
ادەبي ورتانى عانا ەمەس, تۇتاس قوعامداعى رۋحانيات جاناشىرلارىن ەلەڭدەتكەن بيىلعى بايقاۋعا بارلىق جانر بويىنشا 300-دەن اسا ءوتىنىم قابىلدانعان. بۇل – قازاق ادەبيەتىنىڭ قانجىعاسى 300 جاڭا تۋىندىمەن تولىعادى دەگەن ءسوز. دەگەنمەن بۇل بىلتىرعى كورسەتكىشپەن سالىستىرعاندا, ءجۇز شىعارماعا از. بايقاۋ تالابىنا سايكەس شىعارمالار بۇرىن-سوڭدى ەش جەردە جاريالانباۋعا ءتيىس جانە سوڭعى ساتكە دەيىن ۇمىتكەر اۆتورلاردىڭ اتى-ءجونى قۇپيا ۇستالدى. بايقاۋعا تورەلىك جاساعان قازىلار القاسى جابىق فورماتتا جۇمىس ىستەپ, اۆتورى بەيمالىم, جۇمباق شىعارمالاردى ساراپتاعان.
«ايبوز» ۇلتتىق ادەبي سىيلىعى 7 اتالىم بويىنشا وتكىزىلدى. ولار – «ۇزدىك پروزا», «ۇزدىك پوەزيا», «ۇزدىك بالالار ادەبيەتى», «ۇزدىك دراماتۋرگيا», «ۇزدىك ادەبي اۋدارما», «ۇزدىك ادەبي سىن» جانە «ۇزدىك كوميكس» اتالىمدارى. ءار اتالىم بويىنشا ۇزدىك اتانعان جەڭىمپازعا 5 ميلليون تەڭگە سىياقى تاعايىندالدى.
«بيىل ۇلتتىق قۇرىلتايدا مەملەكەت باسشىسى ق.توقاەۆ قالامگەرلەردى قولداۋعا بايلانىستى ناقتى تاپسىرمالار جۇكتەگەن ەدى. كۇنى كەشە عانا قالامگەرلەرىمىزدىڭ 24 كىتابىنىڭ تۇساۋكەسەرى ءوتتى. كىتاپ – ادامنىڭ دوسى, بايلىعى. ءتول ادەبيەتىمىزدى سونى دۇنيەلەرمەن تولىقتىراتىن مۇنداي يگى باستامالاردىڭ رۋحانياتقا, كەلەشەك جاستارعا بەرەرى مول», دەدى مادەنيەت جانە اقپارات ۆيتسە-ءمينيسترى ارمان جۇدەباەۆ.
ول كىتاپ ءىسى سالاسىنداعى كەيبىر ماسەلەلەرگە نازار اۋدارىپ, بالالار ادەبيەتىنە باسىمىراق كوڭىل ءبولۋ كەرەگىن ايتقان پرەزيدەنت تاپسىرماسىنا وراي بۇل تاراپتا ناقتى قادامدار جاسالىپ جاتقانىن جەتكىزدى. «ايبوز» ۇلتتىق ادەبي سىيلىعىن تاپسىرۋ سالتاناتى العاشقى جەڭىمپازدىڭ ەسىمىن «ۇزدىك بالالار ادەبيەتى» اتالىمىنان ىزدەپ, انىقتاۋدان باستاۋ الدى. شورت-ليستكە ەنگەن شىعارمالار ىشىنەن «كونتسەرت» تۋىندىسىمەن بەلگىلى جازۋشى سەرىك اسىلبەك ۇلى جەڭىمپاز دەپ تانىلدى. «ۇزدىك دراماتۋرگيا» اتالىمى بويىنشا «ادام اتا, حاۋا انا» شىعارماسىمەن يسرايل ساپارباي توپ ىشىنەن وزا شاۋىپ, دارا كەلدى. 106 شىعارمانىڭ ىشىندە «انامنىڭ قۇربىسى» پوۆەسىمەن توپ جارعان جازۋشى قۋاندىق تۇمەنباي «ۇزدىك پروزا» اۆتورى اتاندى. «كوزىمنەن ءسۇي, كوبەلەك» ولەڭىمەن اقىن جانات جاڭقاش ۇلى «ايبوز» سىيلىعىنىڭ ەڭ ماڭىزدى اتالىمدارىنىڭ ءبىرى «ۇزدىك پوەزيا» جەڭىمپازى بولدى. «ۇزدىك اۋدارما» جۇلدەسى «قاسقىرلار قۇپياسى» شىعارماسىمەن اباي ماۋقاراعا تابىستالدى. «ۇزدىك ادەبي سىن» «اباي ءھام نيتسشە ىلىمىندەگى قۇداي, ادام جانە اۆتور ماسەلەسى: ءۇش سۋپەر ماعىنانىڭ كۇيرەۋى» اتتى ادەبي تالداۋى جوعارى باعالانعان بەلگىلى جازۋشى ديدار امانتاي ءوز توبى ىشىندە جۇلدەگەر اتاندى. ال «ۇزدىك كوميكس» اتالىمىنىڭ جۇلدەسى بەلگىلى انيماتور رەجيسسەر سالىمعالي مىرزاشەۆقا بەرىلدى.
قالامگەرلەردىڭ اراسىنداعى ءادىل باسەكەنى نىعايتىپ, وقىرمانعا وزەكتى, قىزىق ءارى زاماناۋي شىعارمالار ۇسىنۋدى دىتتەگەن بايقاۋ جەڭىمپازدارىنىڭ شىعارمالارى باسپا بەتىنەن جارىق كورىپ, كىتاپحانالارعا تاراتىلادى.
الماتى
