دەلەگاتسيانىڭ ءبىرىنشى بولىپ اياق باسقان نىسانى – قۋاتى ءبىر مەزگىلدە 35 مىڭ باس ءىرى قارا مالدى جايلاۋعا جەتەتىن Southern Cross Feedlot زاماناۋي بورداقىلاۋ الاڭى ەدى. وتاندىق اگراريلەر زاماناۋي جابدىقتارمەن, ينفراقۇرىلىممەن, ازىقتاندىرۋ ادىستەرىمەن, ديىرمەنمەن, سونداي-اق وسىنداي ءىرى الاڭدى باسقارۋ قاعيداتتارىمەن تانىستى.
«بىزبەن بىرگە قازاقستاننىڭ مول تاجىريبەسى بار مال وسىرۋشىلەرى كەلدى. ءبىز راتسيون قۇرامىن, بورداقىلاۋ ادىستەرىن زەرتتەدىك, فەرمەرلەرىمىز سەرىكتەستىك جولدارىن جانە قازاقستاندا مال شارۋاشىلىعىن قالاي دامىتۋ كەرەكتىگىن تالقىلادى. اۋستراليا جەرىندە ەگىن ەگىلگەنىن نەمەسە مال جايىلىپ جاتقانىن كوردىك, بىزدە دە وسىلاي بولعانىن قالايمىز», دەدى پارلامەنت ءماجىلىسىنىڭ دەپۋتاتى ايداربەك قوجانازاروۆ.
35 مىڭ باستى باعاتىن مۇنداي فەرماعا ينۆەستيتسيا كولەمى شامامەن 25-30 ملن دوللاردى قۇرايدى, قايتارىمى ءبىر-ەكى جىلدا بولادى, سودان كەيىن بارىپ قانا فەرمەر تازا پايدا الا باستايدى. اۋستراليالىق فەرمەرلەردىڭ ايتۋىنشا, 5 مىڭ باسقا ارنالعان بورداقىلاۋ الاڭى سالىنعاننان كەيىن قۋاتتى ودان ءارى كەڭەيتۋ ءۇشىن قوسىمشا ينۆەستيتسيالار قاجەت ەمەس.
«مۇندا بۇكىل قىزمەت كورسەتۋ جۇيەسى باسقاشا. مىسالى, مالدى ءبولۋ – ءبارى تولىعىمەن اۆتوماتتاندىرىلعان. ءتىپتى ءبولۋ كونسترۋكتسيالارى دا باسقاشا. بىزدەگى كونسترۋكتسيالار ءتۇزۋ, ال مۇندا جانۋارلاردى قورقىتپاس ءۇشىن ءيىلىپ جاسالعان. الاڭ بيىك ورنالاسقان, سوندىقتان وندا ىلعال تۇراقتامايدى, تومەن قاراي اعىپ, ارنايى درەناجدارعا جينالادى. وسىلايشا, جانۋارلاردىڭ تۇياقتارى لاستانبايدى. ءمىنسىز تازالىق», دەپ «اتامەكەن اگرو» اق باسقارما توراعاسى كينتال يسلاموۆ ءوز شارۋاشىلىعىندا اتالعان ءادىستى ەنگىزۋگە قىزىعۋشىلىق تانىتتى.
جانۋاردى مال بورداقىلاۋ الاڭىنا اكەلگەن كەزدە قۇلاعىنداعى بيركا ارقىلى ونى ەسەپكە الۋ ۇدەرىسى, پارامەترلەرى مەن تاريحى اۆتوماتتى تۇردە وقىلادى. مال ساتىلاتىن ەل ستاندارتتارىنا سايكەس ءارتۇرلى بورداقىلاۋ باعدارلامالارى بويىنشا بولىنەدى. بۇل فەرمادا 4 بورداقىلاۋ باعدارلاماسى بار: ەو ەلدەرى ءۇشىن, 150, 200 جانە 350 كۇنگە. 25 تۇراقتى جۇمىسشى جۇمىلدىرىلعان.
بۇل فەرمادا مال كۇن سايىن 1,5-2 كگ سالماق قوسادى. ءوندىرىستىڭ ارزانداۋى اۋستراليالىق فەرمەرلەردىڭ نەگىزگى بولىگىندە جايىلىمنىڭ كەزەكتەسۋ ادىسىنە, بورداقىلاۋدىڭ ءۇش كەزەڭىنە, قالدىقتاردى تولىق وڭدەۋگە بايلانىستى بولىپ وتىر. ءار كەزەڭدەگى شىعىنداردى ازايتۋ جانە بيرجادا جاقسى ۇيىمداستىرىلعان مال ساۋداسى سالىنعان ينۆەستيتسيادان مەيلىنشە تەز پايدا الۋعا مۇمكىندىك بەرەدى.
قويلاردى بورداقىلاۋعا دا ۇقساس ەكونوميكالىق ءتاسىل قولدانىلادى. ءبىزدىڭ ماماندار ونىمەن Bakersfield Feedlot بورداقىلاۋ الاڭىنا بارعان كەزدە تانىستى. تولىق اۆتوماتتاندىرىلعان جەم بەرۋ جۇيەسى ءبىر مەزگىلدە 16 مىڭ قوزىنى بورداقىلاۋعا مۇمكىندىك بەرەدى, جىل سايىنعى اينالىم – 65 مىڭنان استام باس.
ء«بىزدىڭ ونەركاسىپ الاڭىنىڭ اۋدانى – شامامەن 11 مىڭ گا. فەرماداعى ءبىر جىلدىق مال سانى – 60-تان 90 مىڭعا دەيىن. مەن ەتتىڭ ونىمدىلىگىنە, مارمارلىگىنە, جۇمساق بولۋىنا جاۋاپ بەرەمىن», دەدى بورداقىلاۋ الاڭىنىڭ يەسى اارون پرەتتەدجون.
قوي كلاستەرىندە جۇمىس ىستەيتىن «الاكول اگرو» جشس وكىلى ءىلياس جانانوۆتىڭ ايتۋىنشا, وتاندىق ءوندىرىستىڭ الەۋەتى جاقسى جانە وسىنداي جارتىلاي اۆتوماتتاندىرىلعان جەم بەرۋ جۇيەسى بىزگە دە پايدالى بولار ەدى.
