الەۋمەتتىك جەلىدەگى ەكى بەينەجازبانى كورىپ, ەرىكسىز ەگىلدىك ءارى ريزا بولدىق. اۋەلگىسىندە سەمەيدەگى شاكارىم اتىنداعى ۋنيۆەرسيتەتتىڭ ستۋدەنتتەرى وقۋ ورنىنىڭ كۇزەتشىسىن تۋعان كۇنىمەن قۇتتىقتاپ, توسىنسىي جاسايدى. جۇمىس ورنىندا تۇرعان ەگدە كىسى تاڭعالىسىن جاسىرا الماعان. ستۋدەنتتەر جاپپاي جامىراسىپ قۇتتىقتاعاننان كەيىن بارىپ, ەس جيىپ, قۋانىپ, تورت ۇستىندەگى مايشامدارىن ۇرلەيدى. سوسىن كوزىنە جاس الادى.
كۇزەتشىنىڭ اتى-ءجونى مامىربەك تاشكەنباەۆ ەكەن. وسى وقۋ ورنى قاۋىپسىزدىگىنە جاۋاپتى بولىپ كەلە جاتقانىنا ءۇش جىلعا جۋىقتاپتى. «ول كىسى وتە ادال جانە جاۋاپتى. ۇجىم دا, باسشىلىق تا تەك جاقسى قىرىنان بىلەدى. سۇيىكتى كۇيەۋ, اكە جانە اتا», دەيدى ۋنيۆەرسيتەت ۇجىمى.
ستۋدەنتتەر مۇنداي ەرەكشە سىيدى ۇيىمداستىرۋ ءۇشىن ادەيى ساباق بولمايتىن دەمالىس كۇنىن تاڭداپ الىپتى. ءبىر عانا اياۋلى ءسات ءوز قىزمەتىن ءۇنسىز عانا اتقارىپ جۇرگەن ادامنىڭ مەرەيىن تاسىتتى, ەكراننىڭ بەر جاعىندا قاراپ وتىرعان قانشاما جاننىڭ كوڭىلىنە مەيىرىم ءدانىن سەپتى.
ەكىنشى كەيىپكەر – تولەگەن اعا قانشاما جىلدان بەرى پاۆلودار قىلمىستىق اتقارۋ جۇيەسى دەپارتامەنتى مەكەمەسىنىڭ اۋلاسىن تازالايدى. قاق-سوقپەن ءىسى جوق, ىجداعاتتى جان ەكەن. وسى مەكەمەدە جۇمىس ىستەيتىن قۇقىق قورعاۋ سالاسىنىڭ وكىلدەرى ول كىسىمەن ەتەنە جاقىن بولىپ كەتكەن. ايتۋىنشا, تولەگەن اعا ونداعىلاردىڭ ءبارىن ءوزىنىڭ جۇيەلى جۇمىسىمەن, سىپايىلىعىمەن جانە ادامگەرشىلىگىمەن ءتانتى ەتكەن. رەسەيدە تۋىپ, كەيىن قازاقستانعا كوشىپ كەلىپ, ۇزاق جىل بويى اناسىمەن بىرگە تۇرعان. بىرەر جىل بۇرىن اناسى دۇنيەدەن وتكەن. قازىر جالعىز. قالاي دەگەندە دە تاعدىرلى ادام. مەكەمە قىزمەتكەرلەرى اعانى تۋعان كۇنىمەن قۇتتىقتاۋ جيىنىن ۇيىمداستىرىپ, كەڭ ءدالىزدى مەرەكەلىك كوڭىل كۇيگە بولەپ, اينالانى اسپەتتەپ, بەزەندىرەدى. سوسىن بارىپ كەيىپكەردىڭ ءوزىن شاقىرادى. دەپارتامەنت اۋلاسىنىڭ تازالىعىمەن شاپقىلاپ جۇرگەن تولەگەن اعا مىناداي ەرەكشە قۇرمەتكە اڭ-تاڭ. سەنەر-سەنبەسىن بىلمەيدى. بىراق اقيقات بەينەلەر وزىنە قاراپ جىميىسىپ, القالايدى.
«بىزدە قىرىققا جۋىق ادام ەڭبەك ەتەدى. اعانىڭ اناسى دۇنيەدەن وزعاندا ول ءدام اكەلىپ, اس بەردى. 8 ناۋرىز مەرەكەسىندە شوكولاد سىيلاپ, كوڭىل كۇيىمىزدى كوتەرەدى. جالعىز تۇراتىنىن بىلگەن سوڭ ءبىز ول كىسىگە تالاي كومەكتەسپەك بولدىق. الايدا ءار كەز باس تارتتى. سول سەبەپتى تۋعان كۇنىن اسىعا كۇتتىك», دەيدى مەكەمە قىزمەتكەرلەرىنىڭ ءبىرى.
كۇزەتشى, تازالىقشى سياقتى كاسىپ يەلەرىنىڭ ەلەۋسىز تىرلىك كەشەتىنى تۇسىنىكتى. مىندەتى بولەك بولعان سوڭ, ۇجىممەن دە ارالاسىپ كەتە بەرمەيدى كوپ جاعدايدا. ءارى كوپ رەتتە مۇنداي جۇمىستاردى ەگدە كىسىلەر اتقارادى. ايلىقتارى دا, زەينەتاقىسى دا كوپ ەمەس. بىراق كوڭىلدەرى كول-كوسىر. كوبى بىرتوعا. كوڭىل تۇكپىرىندەگى كوك دونەنگە وتىرىپ, شاپقىلاي جونەلەتىندەرى تىم-تىم سيرەك. ونداي جانداردى ءبىر ءسات قۋانتىپ, مىنا الىپ قوعامنىڭ ءبىر مۇشەسى ەكەنىن سەزىندىرىپ قويۋ, ءسىرا, ادامزاتقا جاسالعان جاقسىلىقتىڭ ۇلكەنى بولار. مەيىرىم – ەنەرگيا. ادامنان ادامعا تارالادى. بىرەۋدەن جان شۋاعىن كورگەن, سەزىنگەن جان ونى مىندەتتى تۇردە باسقامەن بولىسەدى. قازاق قۋانىشتى بولىسسەڭ كوبەيەدى دەپ تەككە ايتپاعان بولار.
مەيىرىم ۇعىمىنىڭ اسىلىندە اياسى تىم كەڭ. جوعارىدا ايتقانداي, بۇل تەك تورت سىيلاپ, تۋعان كۇنىمەن قۇتتىقتاۋ ەمەس. بالالارعا قورعان بولۋ دا – مەيىرىم. ولار وينايتىن اۋلانى قاۋىپسىز ەتىپ سالۋ, ولار وقيتىن باقشا مەن مەكتەپتى ساپالى ەتىپ سالۋ – مەيىرىم. ءار ادامنىڭ قاۋىپسىزدىگىنە كەپىل بولۋ – مەيىرىم. ەلدىڭ اۋزىنان جىرىپ جينالعان قازىنا قارجىسىن جىمقىرماۋ – مەيىرىم. ەرتەلى-كەش الەۋمەتتىك تولەم تولەپ, قاپتىڭ ءتۇبىن قاعا بەرمەي, حالىقتىڭ ءال-اۋقاتىن ارتتىرۋعا كۇش سالۋ – مەيىرىمنىڭ ءتىپتى كوكەسى.
مەيىرىمدى قوعامنىڭ ءادىل, ادال بولاتىنى, ادامي قۇندىلىقتاردى العا وزدىرىپ, ونىڭ ءوز كەزەگىندە ماتەريالدىق قۇندىلىقتارعا دا جول اشاتىنى بەسەنەدەن بەلگىلى. بىراق ءبىز سوڭىرا ايتىپ وتكەن مەملەكەتتىك دەڭگەيدەگى مەيىرىمدەردىڭ قوعامداعى شاعىن قادامداردان قۇرالاتىنىن ۇمىتپاعان ابزال. جابىرقاپ جۇرگەن جاقىنىڭدى جاي عانا قۋانتا سالۋدىڭ ءوزى دۇنيەنىڭ تاعدىرىنا اسەر ەتەر كۇشكە يە ەكەنىن ءبىز بىلە بەرمەيمىز عوي. تالاي ادام ءبىر كەزدە كورگەن مەيىرىمىنىڭ اسەرىنەن جەر-دۇنيەنى قايران قىلارلىق جەتىستىكتەرگە قول سوزدى. ەندى ول كەلەسى تولعامنىڭ تاقىرىبى بولار...
