سۋرەتتەردى تۇسىرگەن – دميتري ەروفەەۆ
«ەل ءىشى – ونەر كەنىشى» دەمەكشى, شەبەرلىگىمەن تالايدى تامساندىرعان ونەرپازدار جەر-جەردە بار. ولاردىڭ بۇيىمدارىن كوپكە ۇسىنىپ, ەڭبەكتەرىن باعالاۋ بۇگىندە كەنجەلەپ قالدى. كوركەمونەر – سۇلۋلىقتىڭ سيمۆولى ەمەس پە؟ وكىنىشكە قاراي, ناعىز ونەرلى ادامدار تاسادا قالىپ قويادى. ولاردىڭ ەڭبەگىن ەلەپ, قايتالانباس شىعارمالارىن ناسيحاتتاۋ ەل ءۇشىن ماڭىزدى. وسىنى ەسكەرگەن «جەتىسۋ ولكەتانۋشىلار ورتالىعى» قوعامدىق بىرلەستىگىنىڭ باستاماسىمەن تالدىقورعاندا ۇيىمداستىرىلعان حالىقارالىق كورمە جاڭا ەسىمدەردى ەلگە تانىتۋعا مۇمكىندىك بەرەدى.
ونەر دوداسىنا رەسەي, تۇركيا, تمد ەلدەرى جانە رەسپۋبليكاداعى ءبىلىم شاڭىراقتارىنىڭ كوركەم ەڭبەك ءپانىنىڭ ۇستازدارى قاتىستى. ءىس-شارادا شەتەلدىك, ۇلتتىق بەينەلەۋ, ءسان جانە قول ونەرىنىڭ تۋىندىلارىن كوپشىلىك نازارىنا ۇسىنىپ, ونەر سالاسىنىڭ دامۋ دەڭگەيى, باعىت-باعدارى جايىندا ماماندارمەن, ونەرتانۋشىلارمەن, شەبەرلەرمەن پىكىرلەستى.
شەبەرلەر تۋىندىلارىن قاتار قويىپ, جەتىسۋلىقتارعا تانىستىردى. بىرىنەن-ءبىرى وتكەن قۇندى دۇنيەلەر كوزدىڭ جاۋىن الىپ, تاڭداي قاقتىرادى. تالدىقورعانداعى №10 ورتا مەكتەپ ۇستازى تالعات سۇلەيمەنوۆتىڭ تاسقا سالعان سۋرەتتەرى كوپتى ءسۇيىندىردى. ول مايلى بوياۋمەن كىشكەنتاي تاستارعا تابيعاتتىڭ, اڭ-قۇستىڭ بەينەسىن ادەپتەگەن.
«كەيبىرەۋلەر ءۇيىنىڭ جان-جاعىن كوركەمدەۋ ءۇشىن تاستارعا سۋرەت سالىپ بەرۋىمدى وتىنەدى. ەرەكشە ادەمى كورىنەدى. بۇعان ۇلكەن ىجداعاتتىلىق كەرەك. كىشكەنتاي بولىكتەرىن سالۋ قيىنعا سوعادى. بىراق ونەر دەگەن سونىسىمەن قۇندى, باعالى. ءاربىر تاستىڭ ەنەرگياسىن سەزىنۋ قاجەت, سوندا شىعارماڭىز دا كوركەم بولادى. ناعىز ونەر قيىننان قيىستىرۋدى, ۇيلەستىرۋدى, ۇيقاستى, تۇسكە ءمان بەرۋدى, ادەمىلىكتى تالاپ ەتەدى», دەيدى ت.سۇلەيمەنوۆ.
ونەرپاز وسى كۇنگە دەيىن مۇنداي حالىقارالىق كورمەگە قاتىسىپ كورمەگەن. ونەرىن سىنعا سالاتىن وسىنداي رۋحاني بايگەلەر بۇرىن-سوڭدى قالادا بولماعان. بۇگىن بار تۋىندىسىن ەل الدىنا شىعارىپ, قۇرمەت-قوشەمەتكە بولەنىپ وتىر. وسىنداي مۇمكىندىك سىيلاعان ۇيىمداستىرۋشىلارعا ريزا.
«جەتىسۋ ولكەتانۋشىلار ورتالىعى» قوعامدىق بىرلەستىگى ۇيىمداستىرعان شاراعا وبلىستىق ءبىلىم باسقارماسى, سونداي-اق مادەنيەت, ارحيۆتەر جانە قۇجاتتاما باسقارماسى قولداۋ كورسەتكەن. ۇلتتىق قۇندىلىقتاردى دارىپتەۋ, قىلقالام شەبەرلەرىنىڭ باسىن قوسۋ, ونى جاس ۇرپاققا ۇلگى ەتۋ قۇپتارلىق ءىس. رۋحاني شاراعا جۇزدەن اسا تۋىندى كەلگەن. ۇيىمداستىرۋشىلاردىڭ ايتۋىنشا, ءوتىنىش بىلدىرگەندەر بۇدان دا كوپ بولعان ەكەن.
«تۇڭعىش رەت ۇيىمداستىرىپ وتىرعاندىقتان قالاي وتەدى دەگەن قوبالجۋ دا بولعانى راس. قولونەرشىلەر كەلمەي قالسا قايتەمىز دەگەن دە قورقىنىش بولدى. بىراق رەسپۋبليكانىڭ تۇكپىر-تۇكپىرىنەن كەلۋگە نيەت بىلدىرگەندەر حابارلاسا باستاعاندا كۇمانىمىز سەيىلدى. سوڭىندا مىنانشا دۇنيەنى قاي جەرگە سىيدىرامىز دەپ الاڭدادىق», دەيدى بىرلەستىكتىڭ توراعاسى قاجەت انداس.
شاراعا كەلۋشىلەردىڭ كوڭىل كۇيى جوعارى. ءبارى ءبىر-بىرىمەن تانىسىپ, ءبىلىسىپ, ونەرلەرىنىڭ سىرى تۋرالى ايتىپ, شۇيىركەلەسىپ قالدى. «جۇيرىكتەن جۇيرىك وزار جارىسقاندا» دەمەكشى, مۇندا كىل جۇيرىكتەردىڭ ىشىنەن سۋىرىلىپ شىققان مىقتىلارىن انىقتاۋ وڭايعا سوققان جوق. قازىلار القاسى ءبىراز ۋاقىت تەر توكتى. بۇرا تارتۋ بولمادى.
قولونەرشىلەر شىنار تەمىرالينا بالا كۇنىنەن اجەسىنىڭ قاسىندا وتىرىپ, ويۋ ويىپ, قۋىرشاقتارعا كيىم تىككەن. 12 جاسىنان باستاپ, ەرەسەك ادامدارعا باس كيىم, قولعاپ توقۋدى ۇيرەنىپتى. بۇگىندە كوركەم ەڭبەك پانىنەن ساباق بەرەدى. «جەتىسۋ ونەرى» كورمەسىنە ارنايى اقتوبە وبلىسىنان كەلگەن.
«جەتىسۋ جەرىنە كەلگەنىمە قۋانىشتىمىن. ارىپتەستەرىممەن تانىسىپ, الداعى كۇندەرگە جوسپار قۇردىق. بىرلەسىپ اتقاراتىن شارالار جايلى اقىلداستىق. ونەرىمىزدى دامىتۋ جولدارىن ويلاستىرىپ, اتقارار جۇمىستاردى ءبىر پىسىقتاپ وتتىك. جۇمىسىن وسىنداي اۋقىمدى شارادان باستاعان قوعامدىق بىرلەستىكتىڭ ىسىنە ساتتىلىك تىلەيمىن. جاقسى ءىستىڭ قانات جاياتىنىنا سەنىم مول», دەيدى قولونەر شەبەرى ش.تەمىرالينا.
كورمەگە قاتىسۋشىلاردىڭ بارىنە ارنايى العىس حات تاپسىرىلىپ, بارلىق جەڭىمپازعا ەستەلىك سىيلىق بەرىلدى.
جەتىسۋ وبلىسى
