9 ايدىڭ قورىتىندىسىندا 2023 جىلى ورنالاستىرۋ ورىندارى قىزمەت كورسەتكەن ىشكى تۋريستەر سانى 2022 جىلدىڭ سايكەس كەزەڭىمەن سالىستىرعاندا 553 مىڭعا ارتىپ, 5,4 ملن ادامعا جەتتى. بۇل كورسەتكىش پاندەمياعا دەيىنگى كەزەڭمەن سالىستىرعاندا 1,3 ميلليون ادامعا كوپ. وسى ورايدا 2019 جىلدىڭ 9 ايىندا ەل ىشىندە 4,1 ملن ادام ساياحاتتاعانىن ەسكە سالا كەتكەن ءجون.
«كەيىنگى جىلدارى شەتەلدىك تۋريستەردىڭ قازاقستانعا دەگەن قىزىعۋشىلىعى ارتا باستاعانى بايقالادى. ماسەلەن, بيىل ەلىمىزگە 800 مىڭنان اسا شەتەلدىك كەلگەن. جىل سوڭىنا دەيىن بۇل كورسەتكىش 1,4 ميلليونعا دەيىن جەتۋى مۇمكىن دەگەن بولجام بار. بۇعان ەلىمىزدىڭ كورسە كوز توياتىن تابيعي سۇلۋلىعى, مادەني باي مۇرامىز جانە قوناقجايلىعىمىز دالەل بولا الادى. ءبىز ەلىمىزدى تۋريستەر ءۇشىن ودان دا تارتىمدى ءارى قىزىقتى ەتۋ جانە بايتاق جەرىمىزگە تابانى تيگەن ءاربىر ساياحاتشىعا ۇمىتىلماس اسەر قالدىرۋ ءۇشىن تىرىسامىز», دەدى تۋريزم يندۋسترياسى كوميتەتى توراعاسىنىڭ مىندەتىن اتقارۋشى نۇرتاس كارىپباەۆ.
