بۇل كورمەنىڭ ءبىر ەرەكشەلىگى بار. بيىل سۋرەتشى التى ايعا جۋىق ەلىمىزدىڭ بىرنەشە قالاسىنا ساياحاتقا شىعادى. ونىڭ ساپارى الماتىدان باستالىپ, سودان شىعىس قازاقستان مەن ماڭعىستاۋدى اسىپ, ودان كەيىن تۇركىستان مەن شىمكەنتتى باسىپ, جولاي قاراعاندىعا سوعىپ, استانادا تۇيىندەلەدى. ساپار بارىسىندا فوتوگراف قازاق جەرىنىڭ باي تابيعاتىن كورىپ, تەرەڭ تاريحىمەن تانىسىپ, ساف اۋاسىمەن تىنىستاپ, ەل تۇرعىندارىمەن كەزدەسىپ, كوپ نارسەگە قانىعادى. ا.جەلانسكيدىڭ كورمەگە قويىلعان 45 تۋىندىسىنىڭ دەنى وسى شىعارماشىلىق ساپارىنىڭ جەمىسى دەۋگە بولادى. سۋرەتشىنىڭ قىراعى جانارىنا ىلىككەن قازاق دالاسىنداعى تابيعاتتىڭ عاجايىپ كورىنىستەرى, وتكەن كۇننەن سىر شەرتكەن تاريحي ەسكەرتكىشتەرى, اۋىل ادامدارىنىڭ تىرشىلىگى, الىپ شاھارلاردىڭ بەينەسى – سۇلۋلىعىمەن, شىنايىلىعىمەن تارتىمدى شىققان. سۋرەتتەردەگى تۇستەردىڭ الۋاندىعى وتە كەرەمەت. قاراپايىم ادام بايقاي بەرمەيتىن قۇبىلىستاردى فوتوگراف ءدال بەدەرلەگەن.
ءىس-شارانىڭ اشىلۋىندا مادەنيەت جانە اقپارات ۆيتسە-ءمينيسترى ارمان جۇدەباەۆ اتالعان كورمەنىڭ قازاقستان مەن فرانتسيانىڭ مادەني ىنتىماقتاستىعىنىڭ جارقىن ۇلگىسى ەكەنىن ايتا كەلىپ, وسىنداي ونەر جوبالارى حالىقتاردى ءبىر-بىرىمەن جاقىنداستىراتىن الىپ كۇش ەكەنىن اتاپ ءوتتى. ال فرانتسيانىڭ قازاقستانداعى توتەنشە جانە وكىلەتتى ەلشىسى ديدە كانەسس مىرزا وسى مادەني شارانى وتكىزۋگە قولداۋ كورسەتكەن بارشا ازاماتقا ريزاشىلىعىن جەتكىزدى.
«تسيفرلى كۇز» فەستيۆالىنە ساندىق ونەردىڭ جاڭا فورماسى سانالعان ۆيرتۋالدى شىندىقتىڭ كورنەكى شىعارمالارى ۇسىنىلدى. وعان «On the Morning You Wake (To the End of the World)» جوباسى سەكىلدى سوڭعى جىلدارداعى تانىمال VR جوبالارى ەندى. جوبا اۆتورى – پاريجدە ورنالاسقان Atlas V ستۋدياسى.
فەستيۆال اياسىندا Atlas V ستۋدياسىنىڭ جوباسىنان باسقا, ۆەنەتسيا حالىقارالىق كينوفەستيۆالىندە «ەڭ ۇزدىك يممەرسيۆتى» جوباسى اتالىمىندا 2020 جانە 2021 جىلدارى باس جۇلدە العان «Hangman at Home» جانە «Goliath: Playing with Reality» تۋىندىلارى كورسەتىلدى. 2020 جىلعى جەڭىمپاز كارل ساندبۋرگتىڭ 1922 جىلعى ولەڭىنەن («What does the hangman think about when he goes home at night from work?») شابىتتانعان انيماتسيالىق VR ەسسە «Hangman at Home» بولدى. ال 2021 جىلى باس جۇلدە العان «Goliath: Playing with Reality» تۋىندىسى گولياف ەسىمدى ادام ءومىرىن مىسالعا الا وتىرىپ, دەنساۋلىققا كەرى اسەرى تيەتىن كومپيۋتەرلىك ويىنداردى تالداۋ ارقىلى شىندىق شەكاراسىن زەرتتەيدى.
