فوتو: Turizm_jane_sport_ministrligi
قازاقستاندا سپورتپەن جۇيەلى تۇردە قانشا ادام شۇعىلدانادى؟ بۇل ساۋالعا تۋريزم جانە سپورت ءمينيسترى ەرمەك مارجىقپاەۆ 7,6 ميلليون ادام دەپ جاۋاپ قاتتى. بۇل حالىقتىڭ 38,5 پايىزى دەگەن بايلام ەكەن.
دەنە شىنىقتىرۋ مەن سپورتتى دامىتۋدىڭ تۇجىرىمداماسىن ىسكە اسىرۋعا سايكەس, 2029 جىلعا قاراي ەل تۇرعىندارىنىڭ جارتىسىن قامتۋ جوسپارلانعان. مەملەكەت باسشىسىنىڭ تاپسىرماسىنا سايكەس, وسكەلەڭ ۇرپاقتىڭ سپورتتىق الەۋەتىن دامىتۋعا باسىمدىق بەرىلەدى. وسىعان بايلانىستى مەملەكەتتىك سپورتتىق تاپسىرىستى ىسكە اسىرۋ بويىنشا جۇمىستار بەلسەندى جالعاسىپ جاتىر. بيىل 250 مىڭنان استام بالا مەن ءجاسوسپىرىمدى قامتۋ ءۇشىن جەرگىلىكتى اتقارۋشى ورگاندار 43,2 ملرد تەڭگە ءبولدى. ناتيجەسىندە 220 مىڭ بالاعا ارنالعان ۆاۋچەرلەر ىسكە قوسىلدى, بۇل 6 مىڭنان استام سپورت سەكتسياcىنا تەگىن قاتىسۋعا جول اشتى.
تۋريزم جانە سپورت ءمينيسترى سپورتتى ودان ءارى دامىتۋ ءۇشىن جاڭا ستراتەگيالىق رەفورمالار ەنگىزىلگەنىن قوسا ايتتى. ماسەلەن, قازىرگى تاڭدا باس جاتتىقتىرۋشىلاردى كونكۋرستىق نەگىزدە تاعايىنداۋ, سونداي-اق ولاردىڭ وكىلەتتىكتەرىن كەڭەيتۋ ارقىلى مەملەكەتتىك جاتتىقتىرۋشىلاردىڭ مارتەبەسىن ارتتىرۋ ماسەلەسى تالقىلانىپ جاتىر. سونىمەن قاتار حالىقارالىق سپورت ۇيىمدارىندا قازاقستان ماماندارىنىڭ وكىلدىگى جانە الەمدىك دەڭگەيدەگى تورەشىلەردى دايارلاۋ بويىنشا جۇمىس كۇشەيتىلەدى. كاسىبي سپورت كلۋبتارىن ۇستاۋعا ارنالعان ليميت جانە سپورتپەن شۇعىلدانۋ ءۇشىن ەڭ تومەنگى جاس بەكىتىلەدى.
«ورتا مەرزىمدى كەزەڭدە سپورتتىڭ نەعۇرلىم باسىم تۇرلەرى ايقىندالادى. بۇگىنگى تاڭدا ەلىمىزدە سپورتتىڭ 180 ءتۇرى دامىپ كەلەدى, ولاردىڭ تەك 59-ى حالىقارالىق وليمپيادا كوميتەتى تاراپىنان مويىندالعان. حالىقارالىق تاجىريبە نەگىزىندە «تىرەك» سپورتى تۇرلەرىنىڭ ءتىزىمىن قايتا قاراۋ قاجەتتىگى تۋىندادى», دەدى ە.مارجىقپاەۆ.
مەملەكەت قارجىلاندىراتىن 180 سپورت ءتۇرىنىڭ ىشىندە 59-ى وليمپيادا ساناتىنا ەنەدى. ءتىزىم قايتا تۇزىلگەندە ۇلتتىق سپورت تۇرلەرى دە سىزىلىپ كەتە مە دەگەن كوپتىڭ ساۋالىنا قاتىستى جاۋابىندا مينيستر ۇلتتىق سپورتقا نۇقسان كەلمەيتىنىن ايتتى.
