فوتو: mazhilis_kz
«پرەزيدەنت قاسىم-جومارت توقاەۆ ۇكىمەتكە ەلىمىزدىڭ تۇرعىندارىن تۇراقتى جىلۋمەن قامتاماسىز ەتۋ بويىنشا ناقتى تاپسىرمالار جۇكتەدى. دەگەنمەن العاشقى ايازدىڭ وزىنە ەلىمىزدىڭ كوممۋنالدىق ينفراقۇرىلىمىنىڭ سىر بەرە باستاۋى داستۇرگە اينالىپ وتىر. رەسپۋبليكا بويىنشا توزىعى جەتكەن جىلۋ ورتالىقتارى مەن ينفراقۇرىلىم 80 پايىزدان اسىپ كەتتى. ال ولاردىڭ كوبىن ءبىز 50 جىلدان استام ۋاقىت پايدالانىپ كەلەمىز. بۇل قاۋىپتى جاعداي. بىلتىرعى ەكىباستۇز, ريددەر, بالقاش, كوكشەتاۋ, قاراعاندى, تەمىرتاۋ, پەتروپاۆل قالالارىنداعى اپاتتار قوردالانعان ماسەلەلەردىڭ ايقىن كورىنىسى. بۇل تىزىمگە بۇگىن ساران قالاسى قوسىلدى. وسى قالادان ازاماتتار تاڭەرتەڭ حابارلاسىپ بارلىق ۇيلەردە تەمپەراتۋرانىڭ كۇرت تومەندەگەنىن ايتتى. تەحنوگەندىك قاۋىپ-قاتەردىڭ گەوگرافياسى گەومەتريالىق پروگرەسسيمەن ءوسىپ بارادى. سوعان قاراماستان ءبىز جىلىنا بۇل سالانى 5-7%-عا عانا جاڭارتىپ وتىرمىز. بۇل ءتىپتى ەلدەگى ەسكىرۋ ءۇردىسىنىڭ ورنىن تولتىرمايدى. وسىلاي جالعاسا بەرسە, جىلۋ ەنەرگياسىندا كوللاپس ورناۋى ىقتيمال.
ە.سايروۆ شىرىگەن ترۋبا, ەسكىرگەن قازاندىق كەڭەستىك زاماننان قالعان ناسوستى اۋىستىراتىن ۋاقىت كەلگەنى بىلاي تۇرسىن, ءوتىپ كەتكەنىن ايتتى. دەپۋتات بىلتىر جىلۋ سالاسىنداعى ينفراقۇرىلىمنىڭ توزۋىن ازايتۋ ماقساتىندا 160 ميلليارد تەڭگە قارجى بولىنسە دە, سىقىرلاعان ايازعا توتەپ بەرە الماي وتىرعانىمىزدى سىنعا الدى.
وسى جىلدىڭ باسىندا پارلامەنتتە جوعارى اۋديتورلىق پالاتانىڭ جىلۋمەن جابدىقتاۋ سالاسى بويىنشا قورىتىندى ەسەبىندە 100-دەن اسا ناقتى ۇسىنىستار مەن جۇيەلى سىندار ايتىلعانىن جەتكىزدى. ال ۇكىمەتتەن سول ۇسىنىسقا ءلام دەگەن جاۋاپتىڭ كەلمەگەنىن, جۇمىس تا اتقارىلماعانىن ەسكەرتكەن دەپۋتات بۇل سالادا مەنەدجمەنتتىڭ جەتكىلىكسىز ەكەنىن ايتتى.
قىس ايلارىندا جىلۋعا جاۋاپتى مينيسترلىك جىلى كابينەتىنەن شىعىپ, جينالىستاردى قىسقارتىپ, ايازدىڭ قانداي ەكەنىن سەزىنۋ ءۇشىن جىلۋ قازاندىقتارىنىڭ باسى-قاسىندا بولۋى كەرەك دەدى.
