باق وكىلەرىنە بەرگەن سۇحباتتارى نەمەسە الەۋمەتتىك جەلىلەر ارقىلى كوپشىلىك الدىنا شىققاندا «Qazaq Style» دەگەن جاناما ەسىمدى تاڭداعان جانىبەك ۇنەمى قانداي دۇلەي كۇش يەسى بولسا دا, جانىن سالىپ جۇدىرىقتاسۋعا ءار كەز دايار ەكەنىن ايتۋدان جالىقپايدى. ول داڭقى دۇركىرەپ تۇرعان دۇلدۇلدەردىڭ ءبىرازىن جەكپە-جەككە شاقىردى. شىنى كەرەك, قازاقتىڭ قايسار ۇلىمەن بەتپە-بەت كەلۋگە قايمىعا ما, الدە باسقا دا سەبەپتەرى دە بار ما, ايتەۋىر بەلدى بوكسشىلار ءالىمحان ۇلىنىڭ بۇل ۇسىنىسىنا قۇلاق اسار ەمەس. دەسەك تە جۋىردا عانا اقش-تىڭ گۇرزى جۇدىرىقتى جىگىتى دجەرمالل چارلو ورتا سالماققا قايتا ورالىپ, الەم چەمپيونىمەن كەزدەسۋگە «كەت ءارى» ەمەس ەكەنىن مالىمدەدى. ال سول بوكسشى جايىندا ءبىز نە بىلەمىز؟
دجەرمالل چارلو 1990 جىلدىڭ 19 مامىرىندا اقش-تىڭ تەحاس شتاتىنداعى ريچموند قالاسىندا دۇنيەگە كەلدى. جاناما ەسىمى – «تەمىر ادام». ەگىزى دجەرمەللامەن بىرگە ول سپورتتىق مانسابىن اۋەلدە اۋەسقوي بوكستان باستادى. ەكەۋى دە اقش قۇراماسى ساپىندا بىرقاتار حالىقارالىق جارىستاردا تابىستى ونەر كورسەتىپ, بولاشاعىنان زور ءۇمىت كۇتتىرەتىن بىلعارى قولعاپ شەبەرلەرى رەتىندە تانىلدى. دەسەك تە, ولاردىڭ اڭسارى كاسىپقوي رينگكە اۋدى. بۇل رەتتە دە اعايىندىلار تولىمدى تابىستارعا قول جەتكىزدى.
جانىبەكپەن جەكپە-جەككە شىعۋعا كەلىسىمىن بەرگەن دجەرمالل كاسىپقويلار اراسىنداعى ءوزىنىڭ تۇساۋكەسەر كەزدەسۋىن 2008 جىلدىڭ قىركۇيەك ايىندا وتكىزدى. سول كەزدەن بەرى 33 مارتە شارشى الاڭعا شىعىپ, بارلىق قارسىلاسىنان باسىم ءتۇستى. 22 باسەكەلەسىن نوكاۋتقا جىبەردى. 2015 جىلى IBF نۇسقاسىنىڭ ءبىرىنشى ورتا سالماقتاعى جانە 2018 جىلى WBC نۇسقاسىنىڭ ورتا سالماقتاعى چەمپيوندىق بەلبەۋىن يەلەندى. وزىنە تيەسىلى سول اتاقتاردى ول بىرنەشە رەت ءساتتى قورعادى. چارلو كەزىندە كورنەليۋس باندرەيدج, وستين تراۋت, دجۋليان ۋيليامس, حورحە حەيلاند, ماتۆەي كوروبوۆ, برەندون ادامس, دەننيس حوگان, سەرگەي دەرەۆيانچەنكو جانە حۋان ماسياس مونتيەل سىندى ساڭلاقتاردى سابادى.
ەكى جىلدان اسا ۋاقىتقا سوزىلعان ۇزىلىستەن كەيىن دجەرمالل چارلو شارشى الاڭعا قايتا ورالىپ, ۇستىمىزدەگى جىلدىڭ 25 قاراشاسىندا لاس-ۆەگاستا ءوزىنىڭ وتانداسى حوسە بەناۆيدەستى ۇپاي سانىمەن ۇتتى. بارلىق ءۇش تورەشى «تەمىر ادامنىڭ» مىقتىلىعىن ءبىراۋىزدان مويىندادى. بۇل جاعداي دجەرماللدىڭ ءالى دە بابىندا ەكەنىن اڭعارتسا كەرەك.
قازىرگى كەزدە جانىبەك ءالىمحان ۇلىنىڭ ورتا سالماقتا WBO مەن IBF نۇسقالارى بويىنشا الەم چەمپيونى ەكەنىن جوعارىدا ايتتىق. WBC-تىڭ التىن بەلبەۋى دجەرمالل چارلودا. ەگەر وسى جەكپە-جەك جۋىق ارادا وتەتىن بولسا, وندا جەڭىسكە جەتكەن بوكسشى بىردەن ءۇش بىردەي چەمپيوندىق اتاقتى يەلەنەدى. وسى ورايدا ءبىز جانىبەككە زور سەنىم ارتىپ وتىرمىز. قانداسىمىز قارسىلاسىن قاپى قالدىرۋعا ءتيىس. وندا ونىڭ جولىندا تەك ەريسلاندي لارا عانا قالادى. قازىرگى كەزدە كۋبانىڭ قابىلانى WBA-نىڭ تەڭدەسسىزى دەپ تانىلىپ وتىر. بىراق ونى دا ۇتۋعا بولادى. كەزىندە بۇل بوكسشىنىڭ باقىت سارسەكباەۆتان ەكى رەت تاياق جەگەنى جانكۇيەرلەردىڭ ەسىندە. ياعني لارا قازاقتاردىڭ جۇدىرىعى جويقىن ەكەنىن جاقسى بىلەدى. ولاي بولسا, جانىبەك ءالىمحان ۇلىنا اق جول تىلەيىك. الاشتىڭ ءبىر ازاماتى بەكزادا ونەر – بوكستان الەمنىڭ ءابسوليۋتتى چەمپيونى اتانىپ جاتسا, بىزدەر ءۇشىن بۇل ۇلكەن مارتەبە بولار ەدى.
