شەبەرحانانىڭ اشىلۋ سالتاناتىنا شىعىس قازاقستان وبلىسىنىڭ اكىمى ەرمەك كوشەرباەۆ, قىتايدىن ەلشىسى چجان سياو جانە قازاقستاننىڭ عىلىم جانە جوعارعى ءبىلىم ءمينيسترى سياسات نۇربەك قاتىستى. بۇل شەبەرحانانى قۇرۋ تۋرالى كەلىسىمگە قازاقستان پرەزيدەنتى قاسىم-جومارت توقاەۆتىڭ قىتاي حالىق رەسپۋبليكاسىنا كوكتەمدەگى ساپارى كەزىندە قول قويىلعان بولاتىن.
لۋ بان شەبەرحاناسى قولدانبالى تەحنولوگيا جانە جوعارى تەحنيكالىق ءبىلىم سالاسىنداعى جوبا. ول شىعىس قازاقستان تەحنيكالىق ۋنيۆەرسيتەتى مەن تيانتسزين كاسىپتىك ينستيتۋتى اراسىنداعى ىنتىماقتاستىق اياسىندا جۇزەگە اسىرىلدى.
بۇگىن ەلىمىزدە تۇڭعىش رەت لۋ بان شەبەرحاناسى اشىلىپ جاتىر. مۇنى ەكى ەل اراسىنداعى دوستىقتىڭ نىشانى دەپ ايتۋعا بولادى. بۇل تىكەلەي مەملەكەت باسشىسىنىڭ باقىلاۋىندا ىسكە اسىرىلعان جوبا. عىلىم جانە جوعارى ءبىلىم مينيسترلىگى ەڭ العاش اشىلعاندا ەل اۋماعىندا وسىنداي زەرتحانالار قۇرۋ تۋرالى تاپسىرما بەرگەن بولاتىن. «بۇگىندە شەتەلدىڭ ەڭ مىقتى وقۋ ورىندارىن ەلىمىزگە شاقىرىپ, فيليالدارىن اشىپ جاتىرمىز. الداعى 5 جىلدا ەلىمىزدىڭ تاعى 3-4 قالاسىندا وسىنداي شەبەرحانا اشۋ جوسپارىمىزدا بار», دەدى ساياسات نۇربەك.
«قازاقستاندا شەبەرحانانىڭ اشىلۋى ستۋدەنتتەرىمىزگە قىتايدىڭ زاماناۋي جابدىقتارىن پايدالانا وتىرىپ, اۆتوموبيل تەحنولوگيالارىن مەڭگەرۋگە مۇمكىندىك بەرەدى جانە بولاشاق ينجەنەرلەردى دايىنداۋعا ىقپال ەتەدى. بۇگىنگى تاڭدا الەمنىڭ 19 ەلىندە 20 «لۋ بان شەبەرحاناسى» جۇمىس ىستەيدى», دەدى ەرمەك كوشەرباەۆ.
چجان سياو ءوز سوزىندە بۇل شەبەرحانانىڭ ماڭىزى زور ەكەندىگىن, ەكى ەل اراسىنداعى كوپىر بولاتىندىعىن, قىتاي ەلىنىڭ الداعى ۋاقىتتا دا قازاقستانمەن وسىنداي جوبالاردى قولعا الۋعا نيەتتى ەكەندىگىن جەتكىزدى.
ايتە كەتەيىك, «لۋ بان شەبەرحاناسى» بۇل ەلەكتروموبيلدەرگە قىزمەت كورسەتەتىن ينجەنەرلەردى دايارلايتىن ورتالىق. مۇندا ستۋدەنتتەر ەلەكتر ستانتسيالارى مەن اككۋمۋلياتورلىق باتارەيالاردى جوندەۋگە ماشىقتانادى.
