ءورتتى ءسوندىرۋ جانە ىزدەستىرۋ-قۇتقارۋ جۇمىستارىنا 263 قۇتقارۋشى جانە 61 تەحنيكا جۇمىلدىرىلدى. سونداي-اق ۆولونتەرلەر تارتىلدى.
جارىلىس سالدارىنان 12 ادام زارداپ شەگىپ, 3 ادام قازا تاپتى.
زارداپ شەككەندەردىڭ تورتەۋى وبلىستىق اۋرۋحاناعا, التاۋى قالالىق اۋرۋحاناعا جەتكىزىلدى. مەديتسينالىق كومەككە 1 ادام ءوز بەتىنشە جۇگىنگەن, 1 ادام مەديتسينالىق مەكەمەگە جاتۋدان باس تارتتى. جالپى, زارداپ شەككەندەردىڭ بارىنە قاجەتتى مەديتسينالىق كومەك كورسەتىلگەن.
«قيراعان تەحنيكالىق قىزمەت كورسەتۋ بەكەتى عيماراتىندا گاز-اۋا قوسپاسى جارىلىسىنان 15 ادام زارداپ شەكتى. ونىڭ ۇشەۋى كوز جۇمدى. قۇتقارۋشىلار قيراندىنىڭ استىنان 6 ادامدى الىپ شىقتى. ونىڭ ۇشەۋى ءتىرى. قازىر اۋرۋحانادا 10 ادام ەمدەلىپ جاتىر. ونىڭ بىرەۋىنىڭ جاعدايى اۋىر», دەدى وبلىستىق تجد باسشىسى, پولكوۆنيك قاسىم قايرات.
وقيعا سالدارىنان 7 جەڭىل جانە 5 جۇك تەحنيكاسى, سونداي-اق جاقىن ماڭداعى 12 تۇرعىن ءۇي زاقىمدانعان.
پوليتسيا قر قك 292-بابى 3-ءبولىمى بويىنشا (ابايسىزدا ەكى جانە ودان دا كوپ ادامنىڭ ولىمىنە اكەپ سوققان ءورت قاۋىپسىزدىگى تالاپتارىن بۇزۋ) سوتقا دەيىنگى تەكسەرۋ شاراسىن باستادى.
ەستەرىڭىزگە سالا كەتەيىك, كەشە ساعات 12.36-دا جۇك كولىكتەرىن جوندەيتىن تەحنيكالىق بەكەتتە گاز-اۋا قوسپاسى جارىلىپ, سالدارىنان 280 شارشى مەترلىك عيمارات تولىقتاي قيراعان بولاتىن. ءورت 13:52 ۋاقىتىندا تولىق ءسوندىرىلدى.
