وقيعا ورنىندا قۇتقارۋ-ىزدەستىرۋ شارالارى ءجۇرىپ جاتىر. اپات باسىندا جۇرگەن وبلىستىق توتەنشە جاعداي دەپارتامەنتىنىڭ باسشىسى, پولكوۆنيك قاسىم قايراتتىڭ ايتۋىنشا, 10 ادام جارىقشاقتان جاراقات العان. بۇعان دەيىن قۇتقارۋشىلاردىڭ قيراندى استىنان ءۇش ادامدى الىپ شىققانىن حابارلاعان بولاتىنبىز. ءبىر ادامنىڭ جاعدايى اۋىر. دارىگەرلەر 13 ادامعا مەديتسينالىق كومەك كورسەتكەن. ولاردىڭ ەكەۋى ۇيلەرىنە جىبەرىلگەن. 7 ادام اۋرۋحانادا جاتىر.
«جۇمىس بەرۋشىنىڭ ءتىزىمى بويىنشا, ءالى ءۇش ادام قيراندى استىندا بولۋى مۇمكىن. بىراق جارىلىس كەزىندە عيماراتتا بۇل مەكەمەگە قاتىسى جوق قانشا ادام بولعانى بەلگىسىز. قازىر قۇتقارۋ-ىزدەۋ شارالارى جالعاسىپ جاتىر. ىزدەۋ جۇمىستارىنا ساقىلداعان سارى اياز بەن سۋىق جەل, عيمارات سۇيەكتەرىنىڭ اۋىرلىعى جانە مەكەمە اۋماعىنداعى قيراعان تەحنيكانىڭ كوپتىگى قيىندىق تۋعىزىپ جاتىر. اۋلاداعى تەحنيكانىڭ ءبىرازى شىعارىلىپ, تازارتۋ جۇمىستارى جۇرگىزىلدى. اسا ساقتىقپەن قيمىلداۋعا تۋرا كەلىپ جاتىر. ءبىر تەحنيكانى شىعارامىز دەپ, ءۇيىندى استىندا جاتقان ادامعا زيان كەلتىرىپ الۋ قاۋپى جوعارى. جارىلىستىڭ نەدەن بولعانى تەرگەۋ بارىسىندا انىقتالادى. بولجام بويىنشا, گاز جارىلۋى مۇمكىن», دەدى وبلىستىق تجد باسشىسى.
جەدەل مەديتسينالىق كومەك كورسەتۋ قىزمەتىنىڭ مالىمەتىنشە, جارىلىستان زارداپ شەككەن 4 ادام قوستاناي وبلىستىق اۋرۋحاناسىنا, 7 ادام قالالىق اۋرۋحاناعا جەتكىزىلگەن. دەنى – ورتا دارەجەدەگى جاراقات العاندار. ءبىرىنشى تابىلعان 40 جاس شاماسىنداعى ەر ادام اۋىر جاعدايدا قالالىق اۋرۋحاناعا جەتكىزىلگەن. دارىگەرلەردىڭ ايتۋىنشا, جابىرلەنۋشى ميىنان جاراقات العان. قازىر مەديتسينالىق تەكسەرۋ شارالارى ءجۇرىپ جاتىر.
«قازىر تاعى ءبىر ادامنىڭ دەنەسىن الىپ شىعۋعا تىرىسىپ جاتىرمىز. ودان بولەك تاعى ەكى ادام جاتۋى مۇمكىن. مىناداي ايازدا قيراندى استىنداعى ادامداردىڭ ءتىرى قالۋى ەندى قيىن», دەدى پولكوۆنيك قاسىم قايرات.
قۇتقارۋ شارالارىنا 200-دەي ادام, 39 تەحنيكا قاتىسىپ جاتىر. ولاردىڭ ىشىندە قۇتقارۋشىلار, دارىگەرلەر, جەرگىلىكتى اتقارۋشى ورگان وكىلدەرى, كوممۋنالدىق, ينجەنەرلىك قىزمەت جۇمىسشىلارى, ۆولونتەرلەر بار.
تجد باسشىسىنىڭ ايتۋىنشا, قۇتقارۋشىلار قيراندى استىنان الىپ شىققان ەكىنشى ادام قالعان ءۇش ادامنىڭ شامامەن قاي تۇستا جاتقانىن كورسەتكەن. پوليتسيا جاساعىنداعى قىزمەتتىك يت تە سول جەردە اينالشىقتاپ ءجۇرىپ العان. قازىر سول تۇستا ارشۋ جۇمىستارى ءجۇرىپ جاتىر.
