بيىل پرەزيدەنتىمىز قاسىم-جومارت توقاەۆ پەن ازەربايجان رەسپۋبليكاسىنىڭ پرەزيدەنتى يلحام اليەۆ ەكى ەلدىڭ مادەنيەت كۇندەرىن وتكىزۋ تۋرالى ۋاعدالاسقان بولاتىن. جەمىستى وي جالعاسىن تاۋىپ, 2-5 جەلتوقسان كۇندەرى ازەربايجان رەسپۋبليكاسىندا ەلىمىزدىڭ مادەنيەت كۇندەرى جوعارى دەڭگەيدە اتالىپ ءوتتى.
باۋىرلاس حالىقتاردىڭ بىرلىگىن نىعايتىپ, بايلانىسىن ارتتىرۋعا باعىتتالعان كۇندەر اياسىندا بىرقاتار مادەني-كوپشىلىك ءىس-شارا ۇيىمداستىرىلدى. 4 جەلتوقساندا باكۋ قالاسىنا ارنايى كەلگەن ەلىمىزدىڭ مادەنيەت جانە اقپارات ءمينيسترى ايدا بالاەۆا قازاق قىلقالام شەبەرلەرى ونەر كورمەسىنىڭ اشىلۋ سالتاناتىن تاماشالاسا, كەيىن ەكىجاقتى كەزدەسۋلەر وتكىزدى. سونداي-اق قازاق ونەرپازدارى ۇيىمداستىرعان گالا-كونتسەرتكە قاتىستى.
ازەربايجان پرەزيدەنتىنىڭ كومەكشىسى – پرەزيدەنت اكىمشىلىگىنىڭ سىرتقى ساياسات ءبولىمىنىڭ باسشىسى حيكمەت گادجيەۆپەن وتكەن ايدا بالاەۆا ەل پرەزيدەنتى قاسىم-جومارت توقاەۆتىڭ ازەربايجانمەن قارىم-قاتىناستى نىعايتۋعا ايرىقشا كوڭىل ءبولىپ وتىرعانىن اتاپ ءوتتى. «بۇعان مەملەكەت باسشىلارىنىڭ ءوزارا ساپارلارى دالەل. سەرىكتەستىك بارلىق سالا بويىنشا جوعارى دەڭگەيدە دامىپ جاتىر. ءتىلىمىزدىڭ, ءدىنىمىزدىڭ, ادەت-عۇرپىمىز بەن داستۇرلەرىمىزدىڭ ۇقساستىعىنا نەگىزدەلگەن ورتاق مادەني مۇرا مەن تۋىستىق بايلانىستار ءبىزدىڭ حالىقتارىمىزدى ەتەنە جاقىن قىلادى. قاسىم-جومارت توقاەۆتىڭ تاپسىرماسى بويىنشا فيزۋلي قالاسىندا قۇرمانعازى اتىنداعى بالالار شىعارماشىلىعى ورتالىعىنىڭ قۇرىلىسى اياقتالىپ كەلەدى. بۇل ازەربايجان حالقىنا دوستىق پەن ءوزارا قولداۋدى بىلدىرەتىن سىيلىق. ونىڭ ەكى حالىق اراسىنداعى باۋىرلاستىق قارىم-قاتىناستىڭ سيمۆولىنا اينالاتىنىنا سەنىمدىمىن», دەپ اتاپ ءوتتى ايدا بالاەۆا. سونداي-اق ول حيكمەت گادجيەۆتىڭ حالىقارالىق مەديافورۋم وتكىزۋ تۋرالى باستاماسىن قولدادى.
بۇدان كەيىن مادەنيەت جانە اقپارات ءمينيسترى كاۆكاز مۇسىلماندارى باسقارماسىنىڭ توراعاسى شەيح ۋل-يسلام اللاشۇكىر پاشازادەمەن كەزدەستى. جيىنعا ازەربايجان رەسپۋبليكاسىنىڭ ءدىني ۇيىمدارىمەن جۇمىس جونىندەگى مەملەكەتتىك كوميتەت توراعاسى مۋباريز گۋربانلى, ازەربايجان پارلامەنتىنىڭ ۆيتسە-سپيكەرى فازايل يبراحيملي, قازاقستاننىڭ ازەربايجانداعى ەلشىسى ءالىم بايەل, دەپۋتاتتار, زيالى قاۋىم مەن ءتۇرلى ءدىني كونفەسسيا وكىلدەرى قاتىستى.
ايدا بالاەۆا ا.پاشازادەنى «دوستىق» وردەنىن الۋىمەن قۇتتىقتاپ, الەمدىك جانە ءداستۇرلى دىندەر كوشباسشىلارى سەزىنىڭ حاتشىلىعىنا قاتىسىپ, بەلسەندىلىك تانىتقانى جانە وسى ماڭىزدى ءىس-شاراعا تۇراقتى قولداۋ كورسەتكەنى ءۇشىن العىسىن ايتتى. مينيستر ءدىني تۇلعانىڭ ايماقتىق جانە جاھاندىق بەيبىتشىلىك پەن كونفەسسياارالىق كەلىسىمدى نىعايتۋداعى ءرولىن ەرەكشە اتاپ ءوتتى. سونداي-اق رۋحاني ىنتىماقتاستىق, كونفەسسياارالىق كەلىسىمدى قامتاماسىز ەتۋ ماسەلەلەرى تالقىلاندى. ايدا بالاەۆا جينالعاندارعا پرەزيدەنت قاسىم-جومارت توقاەۆتىڭ باسشىلىعىمەن قازاقستاندا بولىپ جاتقان وزگەرىستەر تۋرالى ايتىپ, باۋىرلاس حالىقتاردىڭ دوستىعى مەن ىنتىماقتاستىق بايلانىستارىن بارلىق سالادا نىعايتا بەرەتىنىنە سەنىم ءبىلدىردى.
ءوز كەزەگىندە شەيح ۋل-يسلام اللاشۇكىر پاشازادە الەمدىك جانە ءداستۇرلى دىندەر كوشباسشىلارى سەزىنىڭ ماڭىزدىلىعىنا توقتالىپ, استانانىڭ ءدىن, مەملەكەت جانە قوعام قايراتكەرلەرىن بىرىكتىرەتىن ەرەكشە ديالوگ الاڭىنا اينالعانىن اتاپ ءوتتى. ء«وزارا ىنتىماقتاستىعىمىزدى نىعايتۋ ءۇشىن بىرلەسكەن جوبالارىمىزدى جۇزەگە اسىرۋدىڭ ماڭىزى زور. تۇركى مەملەكەتتەرى ۇيىمى شەڭبەرىندە بارلىق سالادا, سونىڭ ىشىندە باۋىرلاس حالىقتار جانە مەملەكەتتەرىمىز اراسىندا ورتاق تۇركى-يسلام ءدىني-مادەني مۇرالارىن ساقتاۋ مەن دامىتۋ بويىنشا تەرەڭنەن ءوزارا ءىس-قيمىل جاسالا بەرەدى. مەن الەمدىك جانە ءداستۇرلى ءدىن كوشباسشىلارى سەزى حاتشىلىعىنىڭ مۇشەسى رەتىندە ءبىزدىڭ پرەزيدەنتتەرىمىزدىڭ ءوزارا جۇمىس ساپارلارى تۋىسقان حالىقتارىمىزدىڭ بايلانىسىن ارتتىراتىنىن اتاپ وتكىم كەلەدى», دەدى اللاشۇكىر پاشازادە. سونىمەن قاتار ول مۇسىلماندار ءدىني باسقارمالارى باسشىلارى كەڭەسىنىڭ كەزەكتى وتىرىسى كەلەسى جىلى قازاقستاندا وتەتىنىن دە تىلگە تيەك ەتتى.
قازاقستاننىڭ مادەنيەت كۇندەرى اياسىندا مادەنيەت جانە اقپارات ءمينيسترى ايدا بالاەۆا ازەربايجاننىڭ مادەنيەت ءمينيسترى ءادىل كارىملىمەن دە كەزدەسۋ وتكىزىپ, ارىپتەسىنە وسىنداي كەلەلى ءىس-شارانى ۇيىمداستىرۋعا كومەك كورسەتكەنى ءۇشىن العىسىن ءبىلدىردى. ء«بىزدىڭ مەملەكەتتەرىمىز بەن حالىقتارىمىز ءارتۇرلى سالالارداعى, اسىرەسە مادەنيەت سالاسىنداعى ءوزارا ءتيىمدى ىنتىماقتاستىقتى تابىستى دامىتىپ كەلەدى. ءبىز بالالارعا ارنالعان انيماتسيالىق فيلمدەر ءتۇسىرۋ, ازەربايجاندىق سۋرەتشىلەردىڭ قاتىسۋىمەن جاس سۋرەتشىلەرىمىزگە شەبەرلىك ساباقتارىن وتكىزۋ, عىلىمي جوبالاردى, جالپى عىلىمي ءتۋريزمدى, مادەني ۆولونتەرلىك قىزمەتتى, كىتاپ شىعارۋدى دامىتۋ جۇمىستارىن كۇشەيتۋگە مۇددەلىمىز», دەدى مينيستر.
«ازەربايجان جانە قازاقستان پرەزيدەنتتەرى يلحام اليەۆ پەن قاسىم-جومارت توقاەۆتىڭ دوستىق جانە باۋىرلاستىق قارىم-قاتىناسى, ولار جولعا قويعان ستراتەگيالىق سەرىكتەستىك مادەنيەت سالاسى مەن باسقا دا سالالارعا ءوزىنىڭ وڭ ىقپالىن تيگىزىپ جاتىر. ءبىز ەكى ەلدىڭ ىنتىماقتاستىعىن جان-جاقتى ارتتىرا بەرۋگە مۇددەلىمىز», دەپ اتاپ ءوتتى ءادىل كارىملى.
سونداي-اق ايدا بالاەۆا ازەربايجان رەسپۋبليكاسىنىڭ جاستار جانە سپورت ءمينيسترى فاريد گايبوۆپەن كەزدەسىپ, تاراپتار جاستار ساياساتى سالاسىنداعى ىنتىماقتاستىق كەلەشەگىن تالقىلادى.
مادەنيەت كۇندەرى اياسىندا «HasSak» فولكلورلى-ەتنوگرافيالىق ءانسامبلىنىڭ جەكە كونتسەرتى ءوتتى. شىعارماشىلىق ۇجىم سوڭعى 10 جىل ىشىندە قازاقتىڭ ءداستۇرلى مۋزىكاسىنىڭ قايتالانباس جانرلارىن زامان اعىمىنا ساي جاڭعىرتىپ, ۇلتتىق اسپاپتاردا ورىنداۋ ارقىلى ءداستۇرلى ونەردى دارىپتەپ كەلەدى. سونداي-اق باكۋ قالاسىنىڭ تۇرعىندارى مەن قوناقتارى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ «قاراگوز» قويىلىمىن تاماشالادى.
مادەنيەت كۇندەرىن قازاقستان ونەر مايتالماندارىنىڭ ۇلتتىق ناقىشتاعى گالا-كونتسەرتى قورىتىندىلادى. وسى ورايدا, 2024 جىلى قازاقستاندا ازەربايجاننىڭ مادەنيەت كۇندەرىن وتكىزۋ جوسپارلانىپ وتىرعانىن ايتا كەتۋ كەرەك.
قازاقستاننىڭ ازەربايجانداعى مادەنيەت كۇندەرى اياسىنداعى ءىس-شارالارعا قاتىسقان بىرقاتار ازەربايجاندىق قوعام قايراتكەرلەرى ەكى ەلدىڭ دوستىعى مەن بايلانىسى جايىندا ءوز پىكىرلەرىن بىلدىرگەن بولاتىن. ازەربايجاننىڭ حالىق جازۋشىسى انار رزاەۆ ءتۇبى ءبىر تۇركى جۇرتتارىنىڭ قارىم-قاتىناس تاريحى تىم تەرەڭدە جاتقانىن ايتادى. «سوندىقتان ءبىزدىڭ ەلىمىزدە قازاقستان رەسپۋبليكاسى مادەنيەت كۇندەرىنىڭ ءوتۋى تەگىننەن-تەگىن ەمەس. مەن ءوزىم وسى ءىس-شارا اياسىندا ۇيىمداستىرىلعان گالا-كونتسەرتكە ارنايى قاتىستىم. قازاق ونەرپازدارىنىڭ ورىنداۋىنداعى تۋىندىلار ەرەكشە اسەر قالدىردى. ولار تەك قازاقتىڭ ەمەس, ازەربايجاننىڭ دا حالىق اندەرىن ناقىشىنا كەلتىرە ورىندادى. وسى كەش بارىسىندا اتاپ وتەرىم, باياعىدا وزىمە ەتەنە تانىس روزا رىمباەۆانىڭ ءانى ەرەكشە كوڭىلىمنەن شىقتى. ساحناعا شىققان ونەرپازداردىڭ داۋىستارى دا, شەبەرلىكتەرى دە جوعارى دەڭگەيدە ەكەنىن پاش ەتتى. جالپى مەن ءوزىم كوپ جىلدان بەرى قازاقستانمەن, قازاق باۋىرلارىممەن بايلانىسىمدى ۇزبەي كەلەمىن. مەنىڭ بىرنەشە كىتابىم قازاق تىلىنە اۋدارىلدى. وسى جىلدىڭ باسىندا عانا «بەس قاباتتى ءۇيدىڭ التىنشى قاباتى» دەپ اتالاتىن رومانىم قاينار ولجايدىڭ اۋدارماسىمەن جارىق كوردى. ال وعان دەيىن بەرىك شاحان ۇلى «اق جاعالاۋ» اتتى حيكاياتىم مەن بىرنەشە اڭگىمەمدى قازاقشا سويلەتتى. سونىمەن قاتار ءوزىم دە بۇعان دەيىن ازەربايجان باسپاسوزىندە قازاقتىڭ ۇلى تۇلعالارى اباي قۇنانباي ۇلى, ولجاس سۇلەيمەنوۆ, مۇحتار شاحانوۆ تۋرالى ماقالالار جازىپ, جەرگىلىكتى كوزى قاراقتى جۇرتشىلىققا تانىستىرۋعا ۇلەسىمدى قوستىم. بۇنىڭ ءبارى تاريحى, ءتىلى, ءدىنى, ءداستۇرى جاعىنان ءبىر تۋعان باۋىر بولىپ كەلەتىن قازاق جانە ازەربايجان حالىقتارىنىڭ قارىم-قاتىناسى الداعى ۋاقىتتا دا نىعايا بەرەتىنىنە تەرەڭ سەنىم ۇيالاتادى. كەلەسى جىلى قازاقستاندا ازەربايجان رەسپۋبليكاسىنىڭ مادەنيەت كۇندەرى وتەدى ەكەن. بۇنىڭ ءوزى ەكىجاقتى بايلانىستىڭ كەلەشەگى جارقىن ەكەنىن ايشىقتاسا كەرەك», دەدى ول.
ال ازەربايجان ۇلتتىق عىلىم اكادەمياسىنىڭ پرەزيدەنتى, اكادەميك يسا گابيببەيلي ازەربايجاندا وتكەن قازاقستان مادەنيەتىنىڭ كۇندەرى ءبىزدىڭ حالىقتارىمىز بەن باۋىرلارىمىز اراسىنداعى كوپعاسىرلىق تاريحي-مادەني بايلانىستاردىڭ تاۋەلسىزدىك جىلدارىنداعى قايتا جاڭعىرۋى مەن دامۋى تۇرعىسىنان وتە ماڭىزدى ءىس-شارا سانالاتىنىن اتاپ ءوتتى. «بۇل كۇندەر باۋىرلاس ەلدىڭ كونە دە باي مادەنيەتىنىڭ, ادەبيەتىنىڭ جانە ونەرىنىڭ ۇلكەن مۇمكىندىكتەرى مەن جوعارى دەڭگەيىن كورسەتىپ بەردى. مادەنيەت كۇندەرىن قورىتىندىلاعان گالا-كونتسەرتتە قازاقستان رەسپۋبليكاسىنىڭ بەلگىلى ارتىستەرى ازەرجايجان اندەرىن ازەربايجان تىلىندە ورىنداپ, بۇل ءبىزدىڭ حالىقتارىمىزدىڭ بىرلىگى مەن ىنتىماعىنىڭ ۇلكەن مەرەكەسى ەكەنىن دالەلدەدى.
قازاقستاننىڭ مادەنيەت كۇندەرى كەلەشەكتە ءبىزدىڭ حالىقتارىمىز بەن مەملەكەتتەرىمىز اراسىنداعى بايلانىستار بۇرىنعىدان دا بەرىك بولا بەرەتىنىنە كەپىل بولا الادى. سوڭعى جىلدارى ازەربايجان رەسپۋليكاسىنىڭ پرەزيدەنتى يلحام اليەۆ پەن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ مۇرىندىق بولۋىمەن جۇزەگە اسىپ جاتقان اينىماس بىرلىك پەن ىنتىماق ۇلگىسى ءبىزدىڭ تاۋەلسىز ەلدەرىمىز اراسىنداعى جاقىنداسۋ مەن ءوزارا ىنتىماقتاستىقتىڭ كەڭ كەلەشەگى مەن كوكجيەگىن اشىپ وتىر. قازاقستاننىڭ جانە قازاق حالقىنىڭ ۇلكەن جەتىستىكتەرگە جەتىپ, تۇراقتىلىق پەن دامۋدىڭ جولىندا العا باسا بەرۋىنە تىلەكتەسپىن», دەدى ول.
ء«بىز ءبىر ۇلكەن اعاشتىڭ بۇتاقتارىمىز, تامىرىمىز ءبىر, ءتىلىمىز بەن ءدىنىمىز جاقىن. كاسپي تەڭىزى – ەكى حالىققا ورتاق ايدىن. ورتامىزدا كاسپي جاتقانىمەن, ارامىزدان سۋ وتپەيدى...», دەگەن ار مادەنيەت مينيسترلىگى قوعامدىق كەڭەسى توراعاسىنىڭ ورىنباسارى, حالىقارالىق «الاش» ادەبي سىيلىعىنىڭ يەگەرى اكبار قوشالى ازەربايجان مەن قازاق حالىقتارىنىڭ دوستىعىنا تاريحتان مىسالدار كەلتىردى. ء«جۇز جىل بۇرىن قازاقستاننىڭ الاش وردا قوزعالىسى مەن ازەربايجان رەسپۋبليكاسى ءبىر ماقساتتا جۇمىس ىستەدى. كەڭەس زامانىندا دىنمۇحاممەد قوناەۆ پەن گەيدار اليەۆتىڭ دوستىعى كوپكە ۇلگى ەدى. وسى ورايدا 1986 جىلى كوكپ ورتالىق كوميتەتىندە گەننادي كولبيننىڭ قازاقستانعا باسشى بولىپ بارۋىنا قارسى داۋىس بەرگەن ءبىر عانا ادام گەيدار اليەۆ بولعانىن ايتا كەتكىم كەلەدى. وزدەرىڭىز بىلەسىزدەر, كولبيننىڭ قازاقستانعا كەلۋى ايگىلى جەلتوقسان وقيعاسىنا ۇلاسىپ, الماتىدا قازاقتىڭ قانى توگىلگەن بولاتىن.
بۇگىندە يلحام اليەۆ پەن قاسىم-جومارت توقاەۆتىڭ دوستىعى مەن باۋىرلاستىعى ازەربايجان-قازاق دوستىعىنىڭ دا جاڭا دەڭگەيگە كوتەرىلۋىنە سەپتىگىن تيگىزىپ جاتىر. ازەربايجانداعى قازاقستاننىڭ مادەنيەت كۇندەرى بۇل باۋىرمالدىقتى ودان ءارى نىعايتا ءتۇستى. ازەربايجاننىڭ ونەرپازدارى كاسپيدىڭ ارعى جاعىنان كەلگەن باۋىرلارىنىڭ جاڭا كوركەم جەتىستىكتەرىمەن جانە مادەني مۇراعا دەگەن جاڭاشا سىندارلى كوزقاراسىمەن تانىستى. ءبىز تاۋەلسىزدىك دەپ اتالاتىن قاسيەتتى ۇعىمنىڭ قازاق حالقىنىڭ مادەني ءومىرىن بايىتا تۇسكەنىنە تاعى ءبىر كوز جەتكىزدىك. الداعى ۋاقىتتا دا قازاقتىڭ ماعجان جۇماباي, احمات بايتۇرسىن ۇلى, مۇقاعالي ماقاتاەۆ, تولەگەن ايبەرگەن سىندى دارىندى تۇلعالارىنىڭ ەسىمدەرى مەن شىعارماشىلىعى ءبىزدىڭ حالىقتاردىڭ مادەني بايلانىسى مەن باۋىرلاستىق بىرلىگىنە دانەكەر بولا بەرەتىنىن سەنەمىز», دەپ پىكىر ءبىلدىردى ول.
«قازاقستاننىڭ مادەنيەت كۇندەرى اسەم باكۋدە دۇركىرەپ ءوتتى دەسەك ارتىق ايتقان بولماس ەدىك», دەيدى قازاقستاننىڭ ازەربايجان رەسپۋبليكاسىنداعى توتەنشە جانە وكىلەتتى ەلشىسى ءالىم بايەل. ول بۇل ءىس-شارالار لەگى پاندەميادان كەيىن ازەربايجاندا وسىنداي دەڭگەيدە وتكەن العاشقى مادەنيەت كۇندەرى ەكەنىن اتاپ ءوتتى. «ازەربايجاندىق تاراپتىڭ قازاق سۋرەتشىلەرىنىڭ كورمەسى مەن ونەر شەبەرلەرىنىڭ گالا-كونتسەرتى ءۇشىن باكۋدىڭ ەڭ بەدەلدى ورنى سانالاتىن گ.اليەۆ اتىنداعى ورتالىقتىڭ كونتسەرتتىك زالىن ۇسىنۋى مەن جالپى جان-جاقتى قولداۋ كورسەتۋى ءبىزدىڭ ەلگە دەگەن ەرەكشە ىقىلاستىڭ بەلگىسى بولدى. مادەنيەت كۇندەرى اياسىندا وتكەن ءىس-شارالارعا ازەربايجان پارلامەنتىنىڭ توراعاسى, مينيسترلەر, كاۆكاز مۇسىلماندارى باسقارماسىنىڭ توراعاسى, دەپۋتاتتار, شەت مەملەكەتتەردىڭ ەلشىلەرى, حالىقارالىق ۇيىمداردىڭ باسشىلارى, كوپتەگەن كورنەكتى قوعام, مادەنيەت, عىلىم جانە ونەر قايراتكەرلەرىنىڭ قاتىسۋى بىرلىككە باستاعان كۇندەردىڭ جوعارى دەڭگەيىن ايشىقتاي ءتۇستى. سول كۇندەرى باكۋدى باۋراعان قازاق مادەنيەتى مەن ونەرى تۋرالى ازەربايجاننىڭ بۇقارالىق اقپارات قۇرالدارىندا دا كوپتەگەن ماقالالار, رەپورتاجدار مەن بەينەسيۋجەتتەر جاريالاندى», دەدى ول.
ءالىم بايەل بۇگىندە قازاق-ازەربايجان ىنتىماقتاستىعى بارلىق سالالاردا قارقىندى دامىپ كەلە جاتقانىن ايرىقشا اتادى. ونىڭ ايتۋىنشا, بۇعان مەملەكەت باسشىلارىنىڭ اراسىنداعى تىعىز ساياسي ديالوگ بەرىك نەگىز بولىپ وتىر. «ەلدەرىمىز وزدەرى ءۇشىن عانا ەمەس, ءوڭىر ءۇشىن ماڭىزدى جوبالاردى بىرگە جۇزەگە اسىرىپ كەلەدى. ولاردىڭ اراسىندا شىعىس پەن باتىستى جالعاعان ترانسكاسپي حالىقارالىق كولىك باعىتىن دامىتۋ, قازاقستان مۇنايىن ازەربايجان ارقىلى تاسىمالداۋ, كاسپي تەڭىزىنىڭ تۇبىمەن بالاما ينتەرنەت جەلىسىن تارتۋ سياقتى ءىرى جوبالار بار. بيىل مەملەكەتتەرىمىز اراسىندا العاش رەت اسكەري-تەڭىز جاتتىعۋلارى ءوتتى. دەگەنمەن, حالىقتارىمىزدى جاقىنداستىراتىن مادەني-گۋمانيتارلىق بايلانىستاردىڭ ورنى بولەك. سوندىقتان ورتاق تۇركىلىك تابيعاتىمىزدىڭ قىر-سىرىن تۋىسقان ازەربايجان حالقىنا تانىستىرا بەرەتىن وسىنداي يگى شارالار ءارى قاراي دا جالعاسىن تابادى. وسى رەتتە مادەنيەت كۇندەرىن تاماشا ۇيىمداستىرعان قوس مينيسترلىگىمىز بەن ونەر يەلەرىنە ايرىقشا العىسىمدى ايتقىم كەلەدى», دەپ ءسوزىن تۇيىندەدى ەلشى.
