اشىق دەرەككوز
ۇلتتىق مۋزەيدە وتكەن كىتاپتىڭ سالتاناتتى تۇساۋكەسەرىنە قايراتكەردىڭ ۇزەڭگىلەستەرى, ءماجىلىس دەپۋتاتتارى, باق وكىلدەرى قاتىستى. كىتاپتىڭ اۆتورى سانجار كەرىمباي وزبەكالى جانىبەكوۆتىڭ مادەني مايدان جولىنداعى جانىن جالاۋ ەتە ءجۇرىپ اتقارعان, ۇلتتىق قۇندىلىقتارىمىزدى قىزعىشتاي قورىعان ساتتەرىن يىقتاسا قىزمەت ەتكەن قاتارلاستارىنان, وكشەباسار شاكىرتتەرىنەن ارنايى بارىپ جازىپ العانىن ايتتى.
«وزبەكالى جانىبەكوۆتىڭ سوقتىقپالى-سوقپاقتى ومىرىنە تەرەڭدەي بويلاپ, «تاعدىر تاعىلىمى» دەگەن كىتابىن وقىدىم. بىراق بۇل كىتاپتا اۆتور وراسان قاتەلىك, كەمشىلىك جىبەرگەن. قازاق مادەنيەتى مەن رۋحانياتىنا ولشەۋسىز ۇلەس قوسىپ, كەڭەستىك يدەولوگيانىڭ قىلىشى قىلپىپ تۇرعان تاۋمەندى تار كەزەڭنىڭ وزىندە ۇلتتىق قۇندىلىعىمىزدى قىزعىشتاي قورىعانىن, باسىن قالاي بايگەگە تىككەنى تۋرالى جازباعان. ونىڭ ەڭ ۇلكەن قاتەلىگى وسى. كەلەر ۇرپاق وزبەكالى جانىبەكتىڭ الاش ارىستارىنىڭ ەسىمى قايتا اتالىپ, ەڭبەگى حالىققا ورالۋىنا, ناۋرىز مەيرامىنىڭ جاڭعىرىپ, جالپىحالىقتىق سيپات الۋىن بىلگەنى ءجون. ء تول مادەنيەتىمىزدىڭ وركەن جايۋىنا سىڭىرگەن ەڭبەگىن, وندا دا مادەني مايدانداعى قيدالاسۋلارىن وقىپ ءبىلسىن دەگەن تاۋەكەلمەن وسى كىتاپتى قولعا الدىق. ەلىمىزدەگى ءار مەكتەپتىڭ سورەسىندە تۇرۋى ءتيىس كىتاپتىڭ جازىلۋىنا سەبەپكەر بولىپ, ۇلكەن اماناتتى ارقالاتقان – قازاقستاننىڭ رۋمىنياداعى توتەنشە جانە وكىلەتتى ەلشىسى قىزمەتىن اتقارعان نۇرباح رۇستەموۆ. وسى ازامات وزبەكالى جانىبەكپەن قانجىعالاسا قاتار قىزمەت اتقارعان تۇستاستارىمەن, شاكىرتتەرىمەن ديدارلاسۋىما مۇمكىندىك تۋدىردى», دەدى سانجار كەرىمباي.
مەملەكەت جانە قوعام قايراتكەرىنىڭ ونەگەلى ءومىر جولىندا ۇلتقا قىزمەت ەتۋدەگى باتىلدىعى مەن ادالدىعى قاتار ورىلە سيپاتتالاتىن كىتاپتىڭ تۇساۋى وزبەكالى جانىبەكتىڭ ءوزى پايدالانعان قايشىمەن كەسىلدى.
كىتاپ اۆتورلارى ايبەك ءنابي مەن سانجار كەرىمبايعا سەنات توراعاسى ماۋلەن اشىمباەۆتىڭ, استانا قالاسىنىڭ اكىمى جەڭىس قاسىمبەكتىڭ قۇتتىقتاۋ حاتى تاپسىرىلىپ, سىي-سياپات كورسەتىلدى.
