«زەللونىڭ» قىز-جىگىتتەرى اداسىپ كەتكەن قارتتاردى, ءتۇرلى سەبەپتەرمەن ۇيىنەن كەتىپ قالاتىن جەتكىنشەكتەردى ۋاقىت جوعالتپاي تاۋىپ بەرۋگە جاقسى ماشىقتانعان. وسى ارقىلى ولار قوعامدىق قاۋىپسىزدىكتى ساقتاۋدا جەرگىلىكتى قۇقىق قورعاۋشىلاردىڭ جۇمىسىن جەڭىلدەتىپ ءجۇر.
ء«بىزدىڭ ۆولونتەرلىك توبىمىزدىڭ الەۋمەتتىك پاراقشاسىنداعى 70 مىڭداي جازىلۋشى – جوعالعان جاندارعا ىزدەۋ سالعان كەزدە كومەكتەسەتىن ۇلكەن كۇش. ادامنىڭ جوعالۋى تۋرالى پوليتسيادان حابار تۇسكەن بويدا ونىڭ سۋرەتىن, بايلانىس تەلەفوندارىن الەۋمەتتىك جەلىگە سالامىز. مۇنىمەن ءبىر كەزدە توبىمىزدىڭ قىز-جىگىتتەرى وزدەرى بەكىتىلگەن اۋداندا ىزدەستىرۋ شارالارىن جۇرگىزەدى. سونىڭ ارقاسىندا جىل باسىنان بەرى حابار-وشارسىز كەتكەن 150 ادامعا ىزدەۋ سالىپ, كوبىن امان-ەسەن تاۋىپ بەردىك», دەيدى ىزدەۋ توبىنىڭ ۇيىمداستىرۋشىسى ەكاتەرينا گولوتينا.
وبلىستىق پوليتسيا دەپارتامەنتىنىڭ باسشىسى اباي ءجۇسىپوۆ قوعامدىق قاۋىپسىزدىكتى قامتاماسىز ەتۋگە ەرەكشە ۇلەس قوسىپ جۇرگەن 16 ەرىكتىنى قۇتتىقتادى. ماراپاتقا يە بولعانداردىڭ الدىڭعى قاتارىندا «زەللو» ىزدەۋ توبىنىڭ بەلسەندىلەرى دە بار.
ەلىمىزدە كەيىنگى جىلدارى ۆولونتەرلىك قوعالىس كەڭ جايىلىپ, ۆولونتەردىڭ قاتارىنا قوعامداعى كۇيىپ تۇرعان ماسەلەلەرگە بەيجاي قارامايتىن جاستار كوپ قوسىلىپ جاتىر. قازىر ۆولونتەر ساپىندا كاسىپكەر, قۇرىلىسشى, مەديتسينا قىزمەتكەرلەرى, ينجەنەر, زەينەتكەرلىككە شىققان مۇعالىمدەر دە كوپ. ولار كوبىنە بالا تاربيەسى, مۇقتاج جاندارعا قايىرىمدىلىق جاساۋ ىسىندە بەلسەندى.
اقتوبە وبلىسى
