الەمدەگى ەڭ قىمبات سۋرەتشىنىڭ كارتينالارى ءالى دە اتاعىن ايعا جەتكىزىپ, اۋكتسيونداردا سۇمدىق اقشاعا ساتىلىپ جاتىر. ەسكە سالساق, 2015 جىلى كوكتەمدە نيۋ-يوركتە ونىڭ «الجير ايەلدەرى» تۋىندىسى 179 ميلليون دوللارعا باعالانىپ, پابلونىڭ شىعارماشىلىعىن سۇيەتىن ءبىر جاننىڭ قولىندا كەتە باردى. سونداي-اق 2008 جىلى پيكاسسو تۋىندىلارىنىڭ ونەر نارىعىنداعى باعا يندەكسى 262 ميلليون دوللاردى قۇرادى.
ال جۋىردا عانا «Financial Times» باسىلىمى پيكاسسونىڭ تاعى ءبىر كارتيناسى رەكوردتىق باعامەن ساتىلعانىن جازدى. «مونترەدەگى ايەل» كارتيناسى نيۋ-يوركتەگى Sotheby's اۋكتسيونىندا 139,4 ميلليون دوللارعا ساتىلدى. وسى تۇستا ونەردىڭ شىن باعاسى شەكسىز ەكەنىنە كۇمانىڭ قالمايدى. پابلونىڭ وسى ۋاقىتقا دەيىن ساتىلعان ەكىنشى قىمبات تۋىندىسى «ساعات ۇستاعان ايەل» دەگەن اتاۋمەن دە بەلگىلى.
1932 جىلى مايلى بوياۋمەن كەنەپتە سالعان تۋىندىدا يسپاندىق سۋرەتشى ءوزىنىڭ سۇيىكتىسى جانە مۋزاسى ماري-تەرەزا ۆالتەردى بەينەلەگەن. ءيا, پابلونىڭ ومىردە مۋزالارى كوپ بولدى. ارينە, سۋرەتشىنىڭ بىرنەشە ماحاببات حيكاياسى ەشكىمگە جاڭالىق ەمەس. وسى ورايدا مارسەل ۋمبەر ەسىمى ونەرتانۋشىلارعا تاڭسىق ەمەس. لاقاپ اتى – ەۆا. پيكاسسو ەۆانى شىن ءسۇيدى, مۋزاسى سانادى دەسەدى. ءتىپتى ەۆا بەينەلەنگەن كارتيناسىن «جالاڭاش ايەل, ەۆا, مەن سەنى سۇيەم!» دەپ اتاعان. الايدا ەۆامەن سۋرەتشىنىڭ باقىتتى ءومىرى ۇزاققا سوزىلعان جوق. ەركە ەۆا اۋىر دەرتتەن كوز جۇمادى. ال ءبيشى ولگا حوحلوۆامەن باس قوسىپ, ۇلى دۇنيەگە كەلگەندە سۋرەتشى شىعارماشىلىعىندا ءبىر وزگەرىس بايقالدى. كارتينالارىندا كۇڭگىرت بوياۋ ازايىپ, جارىق پەن جىلىلىق كورىنە باستادى.
ال رەكوردتىق كارتينانىڭ كەيىپكەرى – ماريا ۆالتەر ەسىمدى بويجەتكەننىڭ پيكاسسو ومىرىنە قاتىسى از ەمەس. ماريا سۋرەتشىنىڭ كوپتەگەن كارتيناسىنىڭ «كەيىپكەرىنە» اينالدى. «اينا», «اينا الدىنداعى قىز» كارتينالارىنىڭ كەيىپكەرى – ءدال وسى ماريا. پيكاسسو قابىرىنىڭ جانىنا قويىلعان «قۇمىرا ۇستاعان ايەل» مۇسىنىندە بەينەلەنگەن ايەل دە – ماريا.
ماريادان كەيىن فرانتسۋازا («ايەل-گۇل» كارتيناسى فرانتسۋازاعا ارنالعان), ودان سوڭ جاكلين روك. ءومىرىنىڭ سوڭعى جىلدارىندا اۆتور نەگىزىنەن وسى جاكليننىڭ سۋرەتىن سالادى.
پابلو قولىنا قىلقالامىن العاش العان ساتتەن باستاپ, قوشەمەتكە بولەنىپ, قالتاسى اقشاعا تولا قويعان جوق. وتپەلى ءبىر كەزەڭدەردە ول دا سۋرەتىن ساتىپ, تەگىن تاماق ءىشتى. وعان ىلعي جۇلدىزى جانۋ ءۇشىن تەك پاريج جەتپەي تۇرعانداي كورىنەتىن. پاريجگە بارسا, ەلگە تانىلىپ, بايىپ كەتەتىندەي سەزىنەتىن. بارسەلونا ءدامحانالارىندا ءىشىپ وتىرىپ, پاريج تۋرالى ءجيى ايتاتىن. ءسويتىپ ءجۇرىپ پابلو پاريجگە دە جەتتى. ەڭسەنى باسقان ءبىر مۇڭنان ارىلعانداي ەركىن ءومىر ءسۇردى. تاپقان تابىسىن ايەلدەرگە شاشىپ, ءتىپتى كەيدە نان الۋعا اقشاسى بولمايتىن. پيكاسسونى پاريجدە ەشكىم مەنسىنگەن جوق. كارتينالارى دا وتپەدى. دوسى كاساگەماستىڭ ولىمىنەن سوڭ پابلو تۇبەگەيلى وزگەردى: زياندى ادەتتەرىنەن باس تارتىپ, تاڭنان كەشكە دەيىن تەك سۋرەت سالا بەردى. كارتينا ساتۋمەن اينالىساتىن كوپەس ۆوللار سۋرەتشىنىڭ جولىن اشتى. پيكاسسونىڭ تۋىندىلارىن ۇناتقان ول كورمە ۇيىمداستىرىپ, كارتينالارىن ساتىپ, جاپ-جاقسى تابىس تاپتى.
سۋرەتشىنىڭ كۋبيزم ستيلىمەن كوپ جۇمىس ىستەگەنىن بىلەمىز. ول ەڭ العاش بۇل جانردا «اۆينون قىزدارىن» سالدى. مۇندا جالاڭاش جەڭىل ءجۇرىستى قىزداردى بەينەلەدى. جالاڭاش ايەلدى سالۋ جاڭالىق پا؟ ارينە, جوق. پيكاسسو ايەلدەرىنىڭ كەيبىرىنىڭ باسى جان-جانۋاردىڭ باسىنا ۇقسايتىن. سۋرەت ونەرىندەگى بۇل ەرەكشەلىكتى اركىم ارقالاي قابىلدادى. ءتىپتى كوبىسى شوشىدى.
العاشىندا Sotheby's «مونترەدەگى ايەلدى» 120 ميلليون دوللارعا باعالاعان. بۇعان دەيىن كارتينا 102 جاسىندا قايتىس بولعان مەتسەنات ەميلي فيشەر لانداۋدىڭ كوللەكتسياسىنان الىنعان.
