سۋرەتتەردى تۇسىرگەن – تيمۋر ەپوۆ
الماتىداعى «Jusan vibe» الاڭىندا ءوتىپ جاتقان جارمەڭكەدە ەلىمىزدىڭ وڭىرلەرىنەن, قىرعىزستان, وزبەكستاننان كەلگەن 10 گالەرەيا بىرىكتىرىلىپ, ءوز قابىرعالارىنا 30-عا جۋىق زاماناۋي سۋرەتشىنىڭ جۇمىستارىن قويدى. شىن مانىندە, ونەر يەسىنە ءوز جۇمىستارىن ساتۋ وڭاي ەمەس, ابزالى ونىڭ ساۋداسىن ارت-گالەرەيالارعا بەرۋ.
سۋرەت جارمەڭكەسىندە شىندىعىندا ۇيىمداستىرۋشىلاردىڭ وزدەرى دە كۇتپەگەن وقيعالار ورىن الدى. العاشقى ءۇش كۇندە ساتىلىمعا شىعارىلعان جۇمىستاردىڭ 25%-ى ءوتىپ كەتسە, قاراعاندىدان كەلگەن «التىن عاسىر» مەن تاشكەنتتىك «Hlmrdv Gallery» گالەرەيالارىنىڭ كارتينالارى كوللەكتسيونەرلەردى اربادى. بۇلار ەۆگەنيا كازاكوۆا, پەتر كيشكيس, فانيا يسلاموۆا, تەمۋر شەردەمەتوۆ پەن سالامات بابادجانوۆتاردىڭ كارتينالارى بولاتىن. «جارمەڭكە ءدال وسىنداي ناتيجە بەرەدى دەپ كۇتپەگەن ەدىك. بۇل – ءبىزدىڭ تابىس اكەلگەن ەڭ العاشقى تاجىريبەمىز. ءبىرىنشى كۇنى ءبىزدىڭ كارتينالار قويىلعان قابىرعا اينالاسىندا ارت-ساراپشىلار مەن كادىمگى كورەرمەندەر اراسىندا كادىمگىدەي پىكىرتالاس ءجۇردى. كەيبىرەۋلەر بۇرىن مۇنداي سۋرەتتەردى كەزدەستىرمەگەنىن, توسىن جاڭالىق ەكەنىن ايتىپ جاتتى. جارمەڭكەگە اكەلگەن سۋرەتتەردى لوس-اندجەلەستەن كەلگەن كۋراتور, ەۋروپالىق, تۇركيالىق جانە جەرگىلىكتى كوللەكتسيونەرلەر ساتىپ الدى», دەيدى «التىن عاسىر» گالەرەياسىنىڭ وكىلدەرى.
راسىندا دا, جەرگىلىكتى ارت-نارىقتا كاسىبي جارمەڭكەنىڭ پايدا بولۋى – ونەر نارىعىنىڭ قالىپتاسۋى مەن دامۋىنىڭ ماڭىزدى نىشانى عانا ەمەس, ارت-تۋريزم ءۇشىن دە تارتىمدى وقيعا. ويتكەنى ورتالىق ازيا ونەرى بۇگىندە الەمدەگى جەتەكشى ينستيتۋتتاردى, گالەرەيالار مەن ءىرى كوللەكتسيونەرلەردى قىزىقتىرىپ وتىر. ونىڭ ايعاعى 2023 جىلى قازاقستاننىڭ كوممەرتسيالىق گالەرەيالارى «Volta Basel» (شۆەيتساريا), «Art Dubai» ء(باا), «Contemporary Istanbul» (تۇركيا), «Asia Now» (فرانتسيا), «Bazaar Berlin» (گەرمانيا) سىندى بىرنەشە ءىرى حالىقارالىق جارمەڭكەگە
قاتىسقان. ء«بىزدىڭ ايماقتا نەبىر تالانتتى اۆتورلار بار. ءبىز وسىنداي قىلقالام شەبەرلەرىن ونەر كەڭىستىگىندە تانىستىرا وتىرىپ, زاماناۋي نارىق قالىپتاستىرۋ قاجەتتىگىن كورىپ وتىرمىز», دەيدى جوبا كۋراتورى وليا ۆەسەلوۆا.
جەرگىلىكتى جارمەڭكەنىڭ اشىلۋى ۇنەمى جاڭا اتاۋلار مەن جاڭا ونەر تاجىريبەلەرىن ىزدەيتىن ونەر ديلەرلەرىن قىزىقتىرادى. «بيىل سۋرەتشىلەرىمىزدى ءارتۇرلى حالىقارالىق كورمەلەرگە شىعارا العانىمىزدى ۇلكەن جەتىستىك دەپ سانايمىز. بۇگىن «Ala Art Fair-دە» ءبىز «سontemporary Istanbul» جانە «Asia Now» جارمەڭكەلەرىندە كەزدەسكەن قوناقتارمەن قاۋىشساق, ولار دا قازاقستاننىڭ ونەرى, مادەنيەتىمەن تانىسادى», دەيدى «Kazakh Tourism» ۇك» اق كرەاتيۆتى تۋريزم دەپارتامەنتىنىڭ ديرەكتورى يرينا حاريتونوۆا.
قورىتا ايتقاندا, حالىقارالىق جارمەڭكە ورتالىق ازيانىڭ ارت-نارىعى تۋرالى كاسىبي جيىنعا ۇلاستى. ارت-كونفەرەنتسيادا ماماندار ءتۇرلى تاقىرىپتا پىكىر الماستى. ال زاماناۋي تالانتتى سۋرەتشىلەردىڭ كارتينالارى 70$ باستاپ 7000-8000$ دەيىن باعالاندى. تالاي جۇمىس سۋرەت كوللەكتسيونەرلەرىنىڭ قىزىعۋشىلىعىن تۋعىزدى.
الماتى
