جيىننىڭ باستى ماقساتى – ۋنيۆەرسيتەتتە وزگەرىستەر ەنگىزۋگە جانە جوعارى وقۋ ورىندارىندا جاڭا مودەل قالىپتاستىرۋعا قابىلەتتى ءبىلىم كوشباسشىلارىنىڭ باسقارۋشىلىق مۇمكىندىكتەرىن دامىتۋ. رەكتورلار مەكتەبىندە وقۋ ورىندارىنىڭ جاڭا مودەلدەرى, ءبىلىم بەرۋ جۇيەسىندەگى مەنەدجمەنت, الفا ۇرپاعى ءۇشىن ۋنيۆەرسيتەتتەردىڭ ترانسفورماتسياسى, ەلىمىزدەگى العاشقى روبوت-پەداگوگ, جاساندى ينتەللەكت, HR جانە ادام كاپيتالى, Homelander ۇرپاعىن باسقارۋ جانە ىنتالاندىرۋ سىندى تاقىرىپتار قامتىلدى.
– مەملەكەت باسشىسى قاسىم-جومارت توقاەۆ بيىلعى كوكتەمدە پارلامەنت پالاتالارىنىڭ بىرلەسكەن وتىرىسىندا: ء«بىلىم بەرۋ جۇيەسىندەگى مەنەدجمەنتتى جاقسارتۋعا باسا ءمان بەرىلۋگە ءتيىس. وسى سالاعا ناعىز كاسىبي مامانداردى تارتۋ قاجەت. بىزدە پرەزيدەنتتىك جاستار كادرلىق رەزەرۆى بار. ءدال سول سياقتى ءبىلىم سالاسىنا وزگەرىس اكەلەتىن 1 مىڭ مامان ارنايى دايىندىقتان وتەدى. وسىعان وراي, ءتيىستى باعدارلاما قابىلدانادى. كادر ماسەلەسى جوعارى ءبىلىم بەرۋ جۇيەسى ءۇشىن دە وتە وزەكتى», دەگەن بولاتىن. شىنىمەن دە, ەلىمىزدە ۇلكەن وزگەرىستەردىڭ باسى ءدال وسى جوعارى ءبىلىم سالاسىنىڭ كاسىبي ماماندارىن دايارلاۋعا قاتىستى بولىپ وتىر. وڭتۇستىك افريكاداعى ستەللەنبوش ۋنيۆەرسيتەتىندە مىنانداي تۇسىنىك بار: «كەز كەلگەن ۇلتتى جويۋ ءۇشىن اتوم بومبالارىن نەمەسە الىس قاشىقتىققا ۇشاتىن زىمىرانداردى قولدانۋ قاجەت ەمەس. ول ءۇشىن تەك ءبىلىم ساپاسىن تومەندەتىپ, ستۋدەنتتەرگە ەمتيحان كەزىندە الاياقتىق جاساۋعا مۇمكىندىك بەرسە بولعانى. سونداي الاياقتىقتىڭ سالدارىنان ناۋقاستار دارىگەرلەردىڭ قولىنان قازا تابادى, عيماراتتار تاجىريبەسىز ينجەنەرلەردىڭ كەسىرىنەن قيرايدى, اقشانى دا ءبىلىمسىز ەكونوميستەر يگەرە المايدى, ءبىلىمسىز زاڭگەر مەن ستۋدەنت كەزىندە الاياقتىققا جول بەرگەن سۋديالاردىڭ سالدارىنان ادىلەتسىزدىك ورنايدى. ءبىلىمنىڭ كۇيرەۋى – ۇلتتىڭ كۇيرەۋى». تۇتاس ەلدىڭ بولاشاعى ءدال وسى جوعارى وقۋ ورنىندا بەرىلەتىن بىلىمگە تىكەلەي بايلانىستى دەۋىمىزدىڭ توركىنى وسىندا جاتىر. جاساندى ينتەللەكت, تسيفرلىق جۇيەلەر دامىعان زاماندا, جاھاندانۋ كۇشەيگەن شاقتا ءبىلىم سالاسىنداعى ۇلكەن وزگەرىستەردىڭ نەگىزگى ىرگەتاسى سانالاتىن زاڭداردى وزگەرتۋ ماڭىزدى, – دەدى پارلامەنت سەناتىنىڭ دەپۋتاتى بيبىگۇل جەكسەنباي.
جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆتىڭ پىكىرىنشە, قازىرگى تاڭدا ساياسات, ەكونوميكا, تەحنولوگيا, ءوندىرىس, عىلىم-ءبىلىم سالالارىندا ۇلكەن وزگەرىستەر ورىن الىپ جاتىر. سايكەسىنشە, مامان دايارلاۋ وڭاي ەمەس. سول سەبەپتى باسشىلار مەن رەكتورلاردىڭ ءوزى اۋەلى وسى وزگەرىستەرگە ساي بولۋى قاجەت. «قازىرگى تاڭدا جوعارى وقۋ ورنىن باسقارۋ ءۇشىن شەت ءتىلىن بىلەتىن, شەتەلدە وقىپ كەلگەن رەكتورلاردى تاڭداپ جاتامىز. ال ەرتەڭگى كۇنى ولار جەرگىلىكتى جاعدايدان حابارسىز بولسا قايتەمىز؟ سوندىقتان ءبىزدىڭ ماقساتىمىز – ەلىمىزدەگى ماسەلەلەردى بىلەتىن, كەز كەلگەن جاعدايعا دايىن مامانداردى دايارلاۋ. بولاشاق مامان وزگەرىستەن قورىقپايتىن, ىشكى ماسەلەلەردى قيىندىقسىز شەشە الاتىن ازامات بولۋعا ءتيىس», دەدى ول.
ءۇش كۇنگە سوزىلعان سەمينارعا ەلىمىزدىڭ جەتەكشى جوعارى وقۋ ورىندارىنىڭ رەكتورلارى, پرورەكتورلار مەن دەكاندار, جوعارى ءبىلىم سالاسىنداعى ماماندار قاتىستى. «وتاندىق جوعارى وقۋ ورىندارى ءبىلىم بەرۋ جۇيەسىن تۇبەگەيلى وزگەرتىپ, باسقارۋدىڭ جاڭا مودۋلىنە كوشۋى قاجەت. سەبەبى ۋنيۆەرسيتەت باعدارلامالارى جاڭا ماماندىقتاردىڭ سۇرانىسىنا ساي ەمەس», دەگەن وي ايتتى ساراپشىلار.
ەركەناز قورداباي,
ل.ن.گۋميلەۆ اتىنداعى ەۇۋ ستۋدەنتى
