وڭىردە زاعيپ جانداردى قوعام ومىرىنەن قالتارىس قالدىرماۋ ماقساتىندا بىرقاتار جۇمىس اتقارىلىپ جاتىر. ماسەلەن, وبلىستىق كوزى كورمەيتىن جانە ناشار كورەتىن ازاماتتار كىتاپحاناسىنىڭ ۇيىتقى بولۋىمەن العاش رەت جامبىل وبلىسىندا «تيفلومۋزەي» جوباسى قولعا الىندى. جوبا اياسىندا وبلىستىق تاريحي-ولكەتانۋ مۋزەيىنەن «قولمەن ۇستاپ, جۇرەكپەن سەزىن» تاقىرىبىندا ارنايى بۇرىش اشىلدى.
«مۇمكىندىگى شەكتەۋلى جاندارمەن جۇمىس ىستەگەن سوڭ, ولاردىڭ پسيحولوگيالىق جاعدايىنا, ومىرگە بەيىمدەلۋىنە, قوعامنان الىستاماۋىنا ءمان بەرەمىز. بۇل باعىت بويىنشا كىتاپحانادا اتقارىلىپ جاتقان جۇمىس از ەمەس. زاعيپ ادام ءوز قيالىنداعى سيۋجەتتەرمەن ءومىر سۇرەدى. سوندىقتان قازىرگى تاڭدا كىتاپحانا ماماندارى ينكليۋزيۆتى ءبىلىم بەرۋ جانە قولجەتىمدى ورتا قالىپتاستىرۋ, الەۋمەتتىك اقپاراتقا قول جەتكىزۋ جۇمىستارى جانە جاڭا تەحنولوگيانى مەڭگەرۋ ءتارىزدى ءتۇرلى جوبالارعا باسىمدىق بەرىپ وتىر», دەيدى وبلىستىق كوزى كورمەيتىن جانە ناشار كورەتىن ازاماتتار كىتاپحاناسى ديرەكتورىنىڭ ورىنباسارى زارينا دۇكەنباەۆا.
ز.دۇكەنباەۆانىڭ ايتۋىنشا, جوبا اياسىندا اشىلعان بۇرىشقا كونە تارازدىڭ ىقىلىم زاماننان بەرگى تاريحىنان سىر شەرتەتىن ونداعان جادىگەر قويىلعان. ەكسپوزيتسياعا ورنالاستىرىلعان ءار جادىگەرگە برايل قارپىمەن اتاۋى جازىلىپ, QR-كود ارقىلى اۋديوجازبا باستىرىلىپتى. ناتيجەسىندە, زاعيپ جاندار وزدەرىنىڭ جەكە سمارتفونىمەن مۋزەيدى ارالاپ, گيدتىڭ كومەگىنسىز اقپارات الۋ مۇمكىندىگىنە يە بولىپ وتىر. كىتاپحانا قىزمەتكەرلەرى مەن وبلىستىق تاريحي ولكەتانۋ مۋزەيىنىڭ بىرلەسىپ قولعا العان جوباسى ولاردىڭ كوكەيىنە قونادى.
«بۇل جوبا قازىرگى كەزدە اۋدان ورتالىقتارىنداعى مۋزەيلەردە دە جالعاسىن تاۋىپ وتىر. شۋ, مەركى, ت.رىسقۇلوۆ, مويىنقۇم اۋداندىق تاريحي-ولكەتانۋ مۋزەيلەرىندە تاريحي, ارحەولوگيالىق كوللەكتسيالار, نۋميزماتيكا, تاريحي-تۇرمىستىق زاتتار, قولجازبالار مەن باسپا قۇجاتتارى, بەينەلەۋ جانە ساندىك ونەر تۋىندىلارى جانە وزگە قۇندىلىقتار زاعيپ جانداردىڭ نازارىنا ۇسىنىلسا, قورداي اۋداندىق ادەبي-مەموريالدىق مۋزەيى قوردايلىق وقىرماندار ءۇشىن كەنەن ازىرباەۆتىڭ ءومىرى مەن ونەرىنە ارنالعان ارنايى بۇرىش اشتى», دەيدى ز.دۇكەنباەۆا.
ەلىمىز بويىنشا العاش رەت جامبىل وبلىسىندا قولعا الىنعان جوبا مۇمكىندىگى شەكتەۋلى ازاماتتار تاراپىنان زور قىزىعۋشىلىق تۋعىزىپ وتىرعانى انىق. سوعان قاراعاندا «تيفلومۋزەي» جوباسى الداعى ۋاقىتتا دا جالعاساتىن كورىنەدى.
جامبىل وبلىسى
