ارمەنيانىڭ استاناسى ەرەۆان قالاسىندا تولعاناي قاسىمحان الەم چەمپيونى اتانىپ, كوك تۋىمىزدى كوككە كوتەرىپ, ەلىمىزدىڭ مەرەيىن ۇستەم ەتتى.
سپورت دەسە, ىشكەن اسىن جەرگە قوياتىن بىلعارى قولعاپ شەبەرى تولعاناي بولاتقىزى 2007 جىلى 16 شىلدەدە رايىمبەك اۋدانى نارىنقول اۋىلىندا اقىنوۆتار اۋلەتىندە دۇنيەگە كەلگەن. اتا-اناسى بولات اقىنوۆ پەن جازيرا ءسالىمجانوۆا 5 بالانى دۇنيەگە اكەلگەن. كوپبالالى وتباسىندا ءوسىپ كەلە جاتقان جاس بوكسشى قىز قازىرگى تاڭدا نارىنقول اۋىلىنداعى ب.سوقپاقباەۆ اتىنداعى مەكتەپ-گيمنازيانىڭ 11-سىنىبىندا وقيدى. مەكتەپتەگى ۇلگەرىمى دە وتە جاقسى. قوعامدىق ءىس-شارالار مەن سپورت ۇيىرمەلەرىنە بەلسەنە ارالاسادى. «التىن بەلگىگە» ۇمىتكەر وقۋشىلاردىڭ ءبىرى.
اياداي اۋىلدىڭ عانا ەمەس, ەسىمى ەلىمىزگە تانىلا باستاعان تولعاناي بالا جاستان سپورتپەن شۇعىلدانادى. بۇعان دەيىن دە جەتكەن جەتىستىكتەرى از ەمەس. اتاپ ايتساق, بوكستان رايىمبەك اۋدانىنىڭ 4 دۇركىن, الماتى وبلىسىنىڭ 5 دۇركىن جەڭىمپازى اتانعان. سپورت ساڭلاعى ە.يبرايموۆتىڭ قۇرمەتىنە ارنالعان حالىقارالىق تۋرنيردە 3-ورىندى يەلەنگەن. د.سماعۇلوۆتىڭ جۇلدەسىنە ارنالعان رەسپۋبليكالىق تۋرنيردە 1-ورىننان كورىنىپ, «جىلدىڭ ەڭ ۇزدىك بوكسشىسى» كۋبوگىن جەڭىپ الۋى دا بالعىن بوكسشىنىڭ بولاشاعىنان مول ءۇمىت كۇتتىرگەن ەدى. ءجالاڭتوس ءباھادۇردى ەسكە الۋعا ارنالعان رەسپۋبليكالىق تۋرنيردە 2-ورىنعا تابان تىرەدى. قوستاناي قالاسىنىڭ اشىق چەمپيوناتىندا جۇلدەلى 1-ورىننان بوي كورسەتتى. سونداي-اق د.سماعۇلوۆتىڭ جۇلدەسىنە ارنالعان ازيا چەمپيوناتىنا ىرىكتەۋدەن 1-ورىندى قانجىلاعان. بىرنەشە رەسپۋبليكالىق, حالىقارالىق ءتۋرنيردىڭ جەڭىمپازى اتانعان تولعاناي ەندى مىنە, الەم چەمپيونى اتانىپ وتىر. بۇل جەڭىستەردىڭ ارتىندا ماڭداي تەر مەن قاجىر-قايرات, تاباندى ەڭبەك تۇرعانى تۇسىنىكتى.
ارمەنياداعى اقتىق سىندا تولعاناي رەسەيلىك كيرا لەونوۆانى 3:2 ەسەبىمەن جەڭدى. قارسىلاسىن ز-راۋندتا نوكداۋنعا جىبەرىپ, كۇشىنىڭ باسىم ەكەنىن دالەلدەدى.
الەم چەمپيونى رايىمبەك اۋداندىق «بالالار مەن جاسوسپىرىمدەر سپورت مەكتەبى» كوممۋنالدىق مەملەكەتتىك مەكەمەسىندە بىلىكتى باپكەر ءىزباسار قالقاماننان ءتالىم الادى. شاكىرتتىڭ جەڭىسكە جەتۋىنە باپكەردىڭ قوسقان ۇلەسى وراسان زور.
شەكارا شەبىندە ورنالاسقان نارىنقول اۋلىنان الەم چەمپيونى شىققانىنا اۋدان حالقى ءدان ريزا. بىلەكتى دە جۇرەكتى تولعانايعا الداعى ۋاقىتتا دا جەڭىس تىلەيمىز.
الماتى وبلىسى
