جىراقتاعى جاپونياعا قازاقستاننىڭ 20 دزيۋدوشىسى اتتاندى. ارالارىندا وليمپيا مەن ازيا ويىندارى, الەم جانە قۇرلىق چەمپيوناتتارىندا اتوي سالعان ساڭلاقتار دا بولدى. باسقا بالۋانداردى دا وسال دەپ ايتا المايمىز. ولاردىڭ بارلىعى – ۇلتتىق قۇراما ساپىندا تالاي بايراقتى باسەكەدە باق سىناپ, ۇلكەن تاجىريبە مەكتەبىنەن وتكەن تاستۇلەكتەر. سوعان قاراماستان سەنىم ارتقان ت ۇلىمدىلار مەن بۇرىمدىلارىمىزدىڭ ەشقايسىسى دا سەنىم ۇدەسىنەن شىعا المادى. ءسوزىمىز سالماقتى بولۋ ءۇشىن تومەندەگى دەرەكتەرگە نازار اۋدارايىق.
نۇرقانات سەرىكباەۆ (60 كگ), اسقار نارقۇلوۆ (73 كگ), ابىلايحان جۇبانازار (81 كگ), ايدار اراپوۆ پەن ەرماحان انۋاربەكوۆ (90 كگ), بەكارىس سادۋاقاس (100 كگ) جانە عالىمجان قىرىقباي (+100 كگ) تۇساۋكسەكەر كەزدەسۋلەرىندە تىزە بۇكتى. عۇسمان قىرعىزباەۆ پەن نۇرزات سالىمباەۆ (66 كگ), دانيا شامشاەۆ (73 كگ), رۋسلان مۇساەۆ (81 كگ) جانە نۇرلىحان شارحان (100 كگ) ەكىنشى بەلدەسۋىندە ءسۇرىندى. ال ەلدوس سمەتوۆ (60 كگ) برازيليالىق ميشەل اۋگۋستو مەن تۇرىكمەنستاندىق ايبەك ومىروۆتەن باسىم تۇسكەنىمەن, يتاليالىق كارلينو اندرەودان ايلاسىن اسىرا المادى. ەراسىل قاجىباي (+100 كگ) دا ءدال سول مەجەگە جەتتى. الىپتارمەن ايقاسقان قانداسىمىز امەريكالىق فيليپ حوريۋچي مەن يراندىق ياش گانگاستى جىققانىمەن, الەم جانە قۇرلىق چەمپيونى, ەۋرازيا ويىندارىنىڭ جەڭىمپازى, رەسەيلىك ينال تاسوەۆتان جەڭىلدى.
قىزدارىمىز دا قارىق قىلمادى. العاشقى اينالىمدا ءابيبا ابۋجاقىنوۆا (48 كگ) تايپەيلىك لين چەن حاودان, ەكاتەرينا توكارەۆا (70 كگ) رەسەيلىك ءمادينا تايمازوۆادان, نازگۇل ماراتوۆا فرانتسيالىق كورالي حايمنان (+78 كگ) ۇتىلدى. ەكىنشى كەزەڭدە عاليا تىنباەۆا (48 كگ) فرانتسيانىڭ دزيۋدوشىسى بلاندين پونعا, ەسميگۇل كۋيۋلوۆا (63 كگ) رەسەيلىك كاميلا بادۋروۆاعا ەسە جىبەردى. بۇرىمدىلار اراسىنان ەڭ ءتاۋىر ناتيجەگە كاميلا بەرلىقاش قول جەتكىزدى. ول جۇبانىش باسەكەلەرىنە قاتىسىپ, وسى جارىستى جەتىنشى ورىنمەن قورىتىندىلادى.
جالپى كوماندالىق ەسەپتە ەرلەر اراسىندا جاپونيا قۇراماسى الدىنا جان سالمادى. جارىس قوجايىندارى 3 التىن, 3 كۇمىس جانە 1 قولا مەدالدى ولجالادى. ەكىنشى ورىندا – رەسەي. ولار 2 التىن مەن 4 قولانى قورجىنعا سالدى. ءتورتىنشى جانە بەسىنشى ساتىعا وڭتۇستىك كورەيا (1+1+0) مەن ازەربايجان (1+0+2) جايعاستى. ۇزدىك بەستىكتى گرۋزيا (0+1+1) تۇيىندەدى. ايەلدەر سايىسىندا دا كۇنشىعىس ەلىنىڭ (4+3+2) قىزدارى قارسىلاس شاق كەلتىرمەدى. ەكىنشى ورىندى برازيليا (1+1+0) يەلەندى. ءۇشىنشى جانە ءتورتىنشى ورىندى كانادا مەن نيدەرلاند (1+0+1) ءوزارا بولىسسە, فرانتسيا قۇراماسى (0+2+0) بەسىنشى ساتىعا تۇراقتادى. ال توكيودا تاس-تالقان بولىپ ۇتىلعان قازاقستاننىڭ بالۋاندارى قالىڭ توپتىڭ اراسىندا قالىپ قويدى. وتاندىق دزيۋدوشىلارىمىزدىڭ جاپون جەرىندە وتكەن جارىستاعى كۇرەسىنە قاراپ, ولاردىڭ جەر-جاھاننىڭ مىقتىلارى جينالعان ءدۇبىرلى دودالارعا دايار ەمەس ەكەنىن اڭعاردىق. ءدال وسىنداي جىگەرسىز ءارى سۇرەڭسىز ونەرمەن الىسقا بارمايتىنىمىز انىق. ال پاريج وليمپياداسىنىڭ باستالۋىنا بار-جوعى جەتى ايدان اسا ۋاقىت قالدى. بۇل ماسەلە ەل سپورتىنىڭ باسشىلارى مەن رەسپۋبليكالىق فەدەراتسيانىڭ تىزگىنىن ۇستاعان ازاماتتارعا وي سالۋعا ءتيىس. ايتپەسە, فرانتسيانىڭ استاناسىندا دا جەر سيپاپ قالۋىمىز ابدەن مۇمكىن.
توكيوداعى «Grand Slam» ءتۋرنيرى جاپون بالۋاندارىنىڭ جەڭىسىمەن اياقتالعانىن جوعارىدا ايتتىق. ماسەلەن, ەكى سالماق دارەجەسىنىڭ باس جۇلدەسىن جەرگىلىكتى دزيۋدوشىلار ءوزارا ساراپقا سالدى. اقتىق سىندا الەم چەمپيوناتىنىڭ ەكى دۇركىن قولا جۇلدەگەرى ريۋدزيۋ ناگاياما (60 كگ, ەرلەر) توكيو وليمپياداسىنىڭ جەڭىمپازى, ريو وليمپياداسىنىڭ قولا جۇلدەگەرى, ءتورت دۇركىن الەم چەمپيونى ناوحيسا تاكاتوعا تىزە بۇكتىرسە, ميكۋ تاكاشي (63 كگ, ايەلدەر) كيراري ياماگۋچيدەن باسىم ءتۇستى. ال 60 كگ سالماقتا وليمپيا ويىندارىنىڭ جەڭىمپازى, ءتورت دۇركىن الەم چەمپيونى حيفۋمي ابە قارسى كەلگەندەردى قوعاداي جاپىرسا, 52 كگ سالماقتا سايىسقا تۇسكەن ونىڭ تۋعان قارىنداسى ۋتا ابە دە التىننان القا تاقتى. 23 جاستاعى ۋتانىڭ قول جەتكىزگەن تابىستارى اعاسىنان ەش كەم ەمەس.
ازەربايجان قۇراماسىنا جالعىز التىندى سىيعا تارتقان حيدايات گەيداروۆقا دا ارنايى توقتالا كەتسەك, ەش ايىبى جوق. سەبەبى 26 جاستاعى بالۋان بىزگە بوتەن ەمەس. ول قاراعاندىدا دۇنيەگە كەلدى. عاسىرلار توعىسىندا اكە-شەشەسى تاريحي وتانىنا قونىس اۋداردى. كاسپي جاعالاۋىندا ءجۇرىپ, دزيۋدونىڭ قىر-سىرىنا قانىققان حيدايات ۋاقىت وزا كوپتەگەن بيىك بەلەستەردى باعىندىردى. ونىڭ الەم چەمپيوناتىنىڭ ءۇش دۇركىن قولا جۇلدەگەرى, ەۋروپانىڭ ءۇش دۇركىن چەمپيونى, ەۋروپا ويىندارى مەن دۇنيەجۇزىلىك ۋنيۆەرسيادانىڭ جۇلدەگەرى دەگەن اتاقتارى بار. سونىمەن قاتار قازىرگى كەزدە گەيداروۆ 73 كگ سالماق دارەجەسى بويىنشا دۇنيەجۇزىلىك رەيتينگتە جەكە-دارا كوش باستاپ تۇر.
