جەلىنىڭ وتكىزۋ قابىلەتىن ارتتىرۋ جانە قازاقستاننىڭ باتىس ايماعىنداعى تۇتىنۋشىلاردى تۇراقتى ەنەرگيا قۋاتىمەن قامتاماسىز ەتۋ ماقساتىندا «KEGOC» اق «باتىس قازاقستان ەنەرگەتيكالىق تورابى – اتىراۋ – ماڭعىستاۋ» باعىتى بويىنشا جالپى ۇزىندىعى 780 شاقىرىمعا جۋىق 220 كۆ بەس ەلەكتر بەرۋ جەلىسىن سالدى. جۇمىس بارىسىندا 4,2 مىڭنان اسا ەلەكتر باعانالارى ورناتىلىپ, «ۋرالسكايا», «پراۆوبەرەجنايا», «يندەر», «قۇلسارى», «تەڭىز» قوسالقى ستانسالارىن كەڭەيتۋ قامتاماسىز ەتىلدى, سونداي-اق «قاراباتان» جاڭا تاراتۋشى قوسالقى ستانساسى ىسكە قوسىلدى.
جوبانى ىسكە اسىرۋ ناتيجەسىندە ەلەكتر جەلىسىنىڭ قۋاتى ايتارلىقتاي ۇلعايدى: «باتىس قازاقستان ەنەرگەتيكالىق تورابى – اتىراۋ» ۋچاسكەسىندە 100 مۆت-تان 200 مۆت-قا دەيىن; «اتىراۋ – ماڭعىستاۋ» ۋچاسكەسىندە 50 مۆت-تان 200 مۆت-قا دەيىن. ناتيجەسىندە, باتىس ايماق جەلىسىنىڭ سەنىمدىلىگى ەكى ەسەگە ارتىپ, اپات ىقتيمالدىعى تومەندەدى.
ءا.سمايىلوۆ ءوز سوزىندە بۇل ستراتەگيالىق ماڭىزدى جوبانىڭ باتىس ايماعىنىڭ ەنەرگەتيكالىق قاۋىپسىزدىگىن قامتاماسىز ەتۋ جانە ەكونوميكالىق دامۋى ءۇشىن ماڭىزى زور ەكەنىن اتاپ ءوتتى.
«مۇنىڭ بارلىعى ەلەكتر جەلىلەرىنىڭ وتكىزۋ قابىلەتىن ەكى ەسەگە ۇلعايتۋعا, سونداي-اق ەلىمىزدىڭ باتىس وڭىرىندەگى تۇتىنۋشىلار ءۇشىن ەنەرگوبلوكتاردا, ونىڭ ىشىندە ماەك ستانساسىندا اۆاريالىق جاعدايلاردىڭ سانىن ەداۋىر ازايتۋعا مۇمكىندىك بەرەدى», دەدى پرەمەر-مينيستر.
باتىس ايماقتىڭ ەلەكتر جەلىسىن نىعايتۋ, سونىمەن قاتار ونىڭ ءارى قاراي قازاقستاننىڭ بىرىڭعاي ەلەكتر ەنەرگەتيكاسى جۇيەسىمەن ينتەگراتسيالانۋىنا نەگىز بولماق.
«KEGOC» اق باسقارما توراعاسى ءنابي ايتجانوۆ قۇرىلىس جۇمىستارى كەزىندە قولدانىلعان زاماناۋي ەلەكتر جەلىسى جابدىقتارى جوعارى ونىمدىلىگىمەن ەرەكشەلەنەتىنىن اتاپ ءوتتى.
«يندەر» قوسالقى ستانساسىندا ورناتىلعان باسقارىلاتىن قوسىمشا رەاكتورلار كەرنەۋدى اۋىستىرماستان تۇراقتاندىراتىن بىرەگەي كەشەن بولىپ سانالادى. سونداي-اق ول بەلسەندى جانە رەاكتيۆتى قۋات اعىنىن جىلدام باسقارۋعا مۇمكىندىك بەرەتىن ۇزاق ەلەكتر بەرۋ جەلىلەرى مەن تاراتۋ جەلىلەرىنىڭ ىسىراپتارىن ازايتىپ, جۇمىسىنىڭ سەنىمدىلىگىن ارتتىرادى», دەدى ن.ايتجانوۆ.
قۇرىلىس جۇمىستارىنا وتاندىق مەتالل جانە تەمىربەتون تىرەكتەرى, سىمدار, وقشاۋلاعىشتار مەن ترانسفورماتورلار پايدالانىلدى. قازاقستاندىق قامتۋ ۇلەسى شامامەن 70%-دى قۇرادى.
