16 جاستاعى بالانىڭ كاسىپ اشۋىنا «تاۋەلسىزدىك ۇرپاقتارى» جوباسى ىقپال ەتكەن. سونىڭ اياسىندا مەكتەپ وقۋشىسى قايتارىمسىز گرانت رەتىندە 1 ملن تەڭگە قارجىعا يە بولىپ, وتباسىلىق كاسىپتى ىلگەرىلەتۋگە ۇلەس قوسقان. قازىرگى تاڭدا بەرىك شاعىن عانا شەبەرحانادا ەرتوقىمنان باستاپ, جۇگەن, نوقتا, ۇزەڭگى سىندى اتقا قاجەتتى جابدىقتاردىڭ ءبارىن دايىنداۋمەن اينالىسادى. سونىڭ ىشىندە ەرتوقىمى كوپتىڭ سۇرانىسىنا يە. ولاردىڭ جالپى 30-40 ءتۇرى بار بولسا, تاپسىرىسقا بايلانىستى كەز كەلگەنىن ازىرلەۋگە ماشىقتانعان.
اتادان بالاعا ميراس بولىپ كەلگەن بۇل كاسىپتىڭ دامۋىنا بەرىكتىڭ اكەسى ماديار نۇربەكوۆ, باسقا دا اعايىندى باۋىرلارى قولداۋ بىلدىرەدى. ءبىر جۇمىستى جۇيەلى تۇردە جۇرگىزىپ جاتقانى ولاردىڭ قانىندا بار ەكەنىن بەرىك ءوز سوزىندە تىلگە تيەك ەتتى.
– بۇل كاسىپپەن اينالىسۋ ءبىزدىڭ قانىمىزدا بار. مەن ەس بىلگەلى اكەم بۇل ونەردى جانىنا سەرىك ەتكەن. ال اكەمە دەيىن مەنىڭ اتالارىم وسى جولدا ەڭبەكتەنگەن جاندار بولىپتى. سوندىقتان اۋلەتىمىز ءۇشىن بۇل – تاڭسىق جۇمىس ەمەس. قازىرگى ۋاقىتتا ەلىمىزدىڭ ءار تۇكپىرىنەن تاپسىرىس كوپ تۇسەدى. ەرتوقىم دايىنداعاندا الدىمەن ساپاسىنا ءمان بەرەمىز. سودان بولار, ءبىز – ەل بويىنشا مىقتى شەبەرلەردىڭ قاتارىندامىز, – دەيدى مەكتەپ وقۋشىسى بەرىك ءاجىباي.
قاننان دارىعان كاسىپتى يگەرگەن جاس شەبەر اكەسىنىڭ قاسىندا ءجۇرىپ ات ابزەلدەرىن ازىرلەۋدىڭ قىر-سىرىن مەڭگەرگەن. كەيىن وسى ءىستى دوڭگەلەتۋدى ءجون ساناپ, جوباسىن «تاۋەلسىزدىك ۇرپاقتارى» باستاماسى ارقىلى دامىتۋدى كوزدەگەن. ناتيجەسى جامان ەمەس. قايتارىمسىز گرانتتىڭ كومەگىمەن بيزنەسى ورگە دومالاپ, تاپسىرىس اۋقىمى ارتا ءتۇسىپتى.
– جوبا اياسىندا ۇتقان 1 ملن تەڭگە قاراجات وتباسىلىق كاسىبىمىزدىڭ دامۋىنا كوپ ىقپال ەتتى. ويتكەنى كوكتەم, جاز مەزگىلدەرىندە تاپسىرىس ازايادى. شىعىن شىعاتىن كەزدەر دە بولادى. وسىنىڭ ورنىن جابۋعا جانە ساپالى بىلعارى الۋىمىزعا گرانتتىڭ كومەگى كوپ ءتيدى. ماتەريالدىڭ جاقسى بولعانى ەرتوقىمدى ساتىپ الۋشىلاردىڭ دا كوڭىلىنەن شىقتى. وسىلايشا, تاپسىرىستىڭ سانى ۋاقىت وتكەن سايىن ارتا ءتۇستى, – دەپ جاس كاسىپكەر مەملەكەتتىڭ قولداۋىن ەرەكشە اتاپ ءوتتى.
بەرىكتىڭ بۇل جوبا تۋرالى قاراساي اۋداندىق جاستار رەسۋرستىق ورتالىعىنان حاباردار بولعان. ورتالىق جاستارى مەملەكەتتىڭ وسىنداي ۇتىمدى باستامالارىن اۋدان كولەمىندە دارىپتەۋدەن قالىس قالعان ەمەس. ولار مەملەكەت ۇسىنعان باعدارلامالاردى جاستار اراسىندا ناسيحاتتاپ, جاڭاشىلدىققا باستايدى.
بەرىك مەكتەپ وقۋشىسى بولعاندىقتان, ءىسىن ساباقتان كەيىن جالعاستىرادى. تۇسكە دەيىن ءبىلىم السا, تۇستەن كەيىن شەبەرحاناداعى مىندەتىن ورىنداپ, اكەسى مەن باۋىرلارىنا كومەكتەسەدى. بەرىكتىڭ ەندىگى ارمانى – اتاسىنىڭ جولىن قۋىپ, وسى كاسىپتى جوعارى دەڭگەيدە دامىتىپ, ۇلكەن تسەح اشۋ.
– جامبىل وبلىسى, مويىنقۇم اۋدانىندا اتامنىڭ اتقا قاجەتتى جابدىقتاردى دايىندايتىن ۇلكەن تسەحى بولىپتى. مەن دە اتام سياقتى وسى بيزنەسىمدى ودان ءارى جەتىلدىرىپ, اۋقىمى كەڭ عيماراتتا جۇمىس ىستەگىم كەلەدى. ءسويتىپ, قولونەر سالاسىن كوپكە تانىستىرىپ, ونى جان-جاقتى دامىتسام دەيمىن. ءبىر جاعىنان ەلدىڭ ەكونوميكاسىن ارتتىرۋعا قوسقان ۇلەسىم بولار ەدى, – دەيدى كەيىپكەرىمىز.
بەرىكتىڭ اتاكاسىپتى جەتىلدىرۋىنە سەبەپكەر بولعان «تاۋەلسىزدىك ۇرپاقتارى» دەپ اتالاتىن جوبا ءالى دە جالعاسىپ جاتىر. بۇل باستاما مەملەكەت باسشىسىنىڭ قولداۋىمەن جۇزەگە اسىپ كەلەدى. رەسمي دەرەككە سۇيەنسەك, بىلتىر اتالعان جوبانىڭ اياسىندا الماتى وبلىسىندا 10 جاس كاسىپكەر 1 ملن تەڭگەدەن قارجىلاي قولداۋعا يە بولعان. قازىرگى ۋاقىتتا ولار ءار سالادا ءوز كاسىبىمەن اينالىسىپ, جەمىسىن كورىپ ءجۇر.
2023 جىلى «تاۋەلسىزدىك ۇرپاقتارى» بويىنشا 3 ملن تەڭگەدەن 30 گرانت بەرىلۋ كوزدەلگەن. جوبانىڭ ماقساتى – بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان جاستاردىڭ جاڭا جانە قولدانىستاعى باستامالارىن مەملەكەت تاراپىنان قولداۋ. كونكۋرسقا 14 جاستان باستاپ, 35 جاسقا دەيىنگى ازاماتتار ۇمىتكەر بولا الادى.
ديدار مالىك ۇلى,
جۋرناليست
الماتى وبلىسى,
قاراساي اۋدانى
