ادەبي كەش وقۋشىلاردى ماعجاننىڭ ومىربايانىمەن, شىعارماشىلىعىمەن تانىستىرۋ, جاستاردىڭ كوركەم شىعارمالاردى وقىپ-ۇيرەنۋگە ىقىلاسى مەن قىزىعۋشىلىعىن ارتتىرۋ ماقساتىندا ۇيىمداستىرىلعان.
ءىس-شاراعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «توپجارعان» اقىندار كلۋبىنىڭ مۇشەلەرى, م.جۇماباەۆ اتىنداعى حالىقارالىق كوللەدجىنىڭ ستۋدەنتتەرى مەن ەلوردالىق مەكتەپتەردىڭ وقۋشىلارى قاتىستى.
جينالعان قاۋىم م.جۇماباەۆتىڭ ولەڭدەرىن, اقىنعا ارناعان جالىندى جىرلارىن وقىدى. ابزال ماقاش باستاعان دومبىرانى جانىنا سەرىك ەتكەن جاس اقىندار ماعجاننىڭ كەستەلى جىرلارىن توگىپ, ارناۋ ورىنداپ بەردى. ال ءا.بوكەيحان اتىنداعى بينوم مەكتەبىنىڭ 1-سىنىپ وقۋشىلارى «مەن جاستارعا سەنەمىن» ولەڭىن وقىپ, جينالعان جۇرتشىلىقتى ءتانتى ەتتى.
اقىندىعىمەن قاتار ماعجاننىڭ وسكەلەڭ ۇرپاقتىڭ تاربيەسىنە قوسقان ۇلەسى زور. №67 ءىلياس ەسەنبەرلين اتىنداعى مەكتەپ-گيمنازيانىڭ مۇعالىمى اقشولپان ءاناپيا اقىننىڭ «پەداگوگيكا» ەڭبەگىنە كەڭىنەن توقتالدى. مۇندا تاربيە ونەرىنىڭ نەگىزگى قاعيداتتارى قازاقى تانىم شەڭبەرىندە تۇسىندىرىلگەن. ۇستاز ماعجان جۇماباەۆتىڭ بۇل ەڭبەگى زامان وزگەرسە دە, وزەكتىلىگى جوعالمايتىن قۇندى دۇنيە ەكەندىگىن اتاپ ءوتتى.
ەرەكشە اتاپ وتەتىن جايت, ۇلتتىق مۋزەيدە بالدىرعانداردان باستاپ ستۋدەنتتەرگە دەيىنگى جاس اۋديتورياعا ارنالعان كەشەندى مادەني-ءبىلىم بەرۋ باعدارلاماسى قاراستىرىلعان.
ماسەلەن, «مەنىڭ قازاقستانىم» ورتالىعىندا بالدىرعاندار مەن وقۋشىلار قازاقتىڭ كيىز ءۇيى, تۇرمىستىق زاتتارى, ءداستۇرلى مۋزىكالىق اسپاپتارمەن تانىسادى, ساداق تارتىپ, اسىق اتادى. «مۋزەيدەگى مەكتەپ كۇنى» جوباسى اياسىندا 5-9 سىنىپ وقۋشىلارى قازاقستان تاريحى بويىنشا بىلىمدەرىن ەكسپوناتتاردى زەرتتەۋ ارقىلى تەرەڭدەتەدى. «دانا» جوباسىنىڭ اياسىندا وتەتىن ادەبي, مۋزىكالىق, پوەزيالىق كەشتەردىڭ ماقساتى – ستۋدەنتتەردىڭ شىعارماشىلىق الاڭىن قالىپتاستىرۋ.
ارنايى ءبىلىم بەرۋ قاجەتتىلىكتەرى بار بالالار دا نازاردان تىس قالمايدى. «قولجەتىمدى مۋزەي» جوباسى اياسىندا زاعيپ جانە ناشار كورەتىن كەلۋشىلەر تاكتيلدى ەكسپوناتتاردى قولىمەن ۇستاپ, اۋديوگيدتەر كومەگىمەن قاجەتتى اقپاراتپەن قامتىلعان. ال «مەيىرىم» جوباسى اياسىنداعى «قولونەر عالامشارى» ۇيىرمەسى ەرەكشە ءبىلىم بەرۋ قاجەتتىلىكتەرى بار بالالاردى ونەرگە باۋلۋ ارقىلى قول موتوريكاسىن دامىتىپ, الەۋمەتتىك ورتاعا بەيىمدەۋگە كومەكتەسەدى.
