سۋرەتتەردى تۇسىرگەن – جانگەلدى ابدىعالىم
قاراعاندىلىق كاسىپكەر ساۋلە اقىلبەك «Sauleli Ui» تىگىن تسەحىن وسىدان ءۇش جىل بۇرىن اشقان. كاسىبىن وركەندەتۋ ءۇشىن ەكى گرانت يەلەنگەن.
– العاشقى گرانتىم شامامەن 600 مىڭ تەڭگە بولسا, ال وتكەن جىلى العانىم – 2 ملن تەڭگە. 2020 جىلى قىزىمدى دۇنيەگە اكەلدىم. ول كەزدە مەن جۇمىس ىستەمەيتىنمىن, قولىما جورگەكپۇلعا 157 مىڭ تەڭگەدەي سوما ءتۇستى. مەن بۇل اقشانى بيزنەسكە سالعىم كەلدى. كارانتين ۋاقىتى ەدى, تويحانالار جابىق, توي ۇيدە وتەتىن. سول جولى ارنايى ماتامەن داستارقان تىكتىم. ونىڭ تۋىستارىما ۇناپ, تاپسىرىس السام دەگەن ويمەن قۇلشىنا كىرىستىم, – دەيدى س.اقىلبەك.
ول بالاسى ءبىر جاسقا تولعاندا جۇمىسپەن قامتۋ ورتالىعىنا حابارلاسىپ, تىگىن ءوندىرىسى بويىنشا ءۇش ايلىق وقۋىن ءتامامداپ الادى. ءسويتىپ, قۇجات تاپسىرعان جاس تىگىنشى بيزنەس-جوسپار قۇرىپ, جوباسىن ءساتتى قورعاپ, العاشقى گرانتقا 2021 جىلى قول جەتكىزەدى. گرانت قارجىسىنا ەكى ونەركاسىپتىك تىگىن ماشيناسىن, ۇتىكتەۋ تاقتاسىن, ۇستەل سىندى كەرەك-جاراق الادى. ال وبلىس اكىمىنىڭ 2 ملن گرانتىن وتكەن جىلدىڭ اياعىندا جەڭىپ العان. تۇسكەن قاراجاتقا حالات تىگۋگە ارنالعان وندىرىستىك زات, كەستە تىگۋ ماشيناسىن ساتىپ الىپتى.
بۇگىندە تسەح يەسى ەكى ادامدى جۇمىسپەن قامتىپ وتىر. جۇمىسشىلاردىڭ ورتاشا جالاقىسى 120 مىڭ تەڭگەنى قۇرايدى. تاپسىرىس كولەمى ۇلعايعان. الىس-جاقىن شەتەلدەن دە ونلاين تاپسىرىستار تۇسەدى. ەندى مانساپ ورتالىعىمەن كەلىسىپ, سۋبسيديالاۋمەن ءتورت ادامدى «كۇمىس جاس», تاعى ءبىر تىگىنشىنى «الەۋمەتتىك جۇمىس ورنى» جوباسىمەن 2024 جىلدان باستاپ الاتىنىن جەتكىزدى.
قازىرگى ۋاقىتتا مەملەكەت باسشىسىنىڭ تاپسىرماسىنا سايكەس ءبىلىم سالاسىندا دا وزىق تەحنولوگيانى جەتىلدىرۋ قولعا الىنىپ جاتىر. قاراعاندىدا وسى باعىتتا كاسىپ اشىپ, عىلىمي جاڭالىق اكەلگەن جاستاردى قولداۋ قارقىندى دەسەك تە بولادى. سولاردىڭ ءبىرى وبلىس اكىمىنىڭ 2 ملن تەڭگە گرانتىن العان «NEO» كومپانياسىنىڭ جەتەكشىسى ءادىل حاميت 2021 جىلدان بەرى ءبىلىم بەرۋ سالاسىندا باعدارلامالىق قامتاماسىز ەتۋدى ازىرلەۋمەن اينالىسىپ جاتىر.
ءادىل ءا.ساعىنوۆ اتىنداعى قاراعاندى تەحنيكالىق ۋنيۆەرسيتەتىندە ۆيرتۋالدى الەمگە جەتەلەيتىن (VR) كوزىلدىرىگىن سىناقتان وتكىزىپ ءجۇر.
– جاساندى ينتەللەكت ءبىزدىڭ قوسىمشامىزدا ينتەراكتيۆتى مۇعالىم رەتىندە ارەكەت ەتەدى. بىراق بۇل تولىققاندى مۇعالىمدى الماستىرمايدى. وقىتۋشى جەتىسپەيتىن اۋىلدىق جەرلەردە باعدارلامانىڭ بەرەرى مول. ۆيرتۋالدى وقىتۋعا كەلەتىن بولساق, بۇل قازىردىڭ وزىندە ىسكە قوسىلدى. 13 ءپان بويىنشا وقۋعا جانە ۆيرتۋالدى زەرتحانالارعا بارۋعا بولادى. ازىرلەمە قازاقستاننىڭ 30 مەكتەبىندە جۇزەگە استى, قاراعاندىدا الداعى ۋاقىتتا ەكى مەكتەپ قوسىلماق. سونىمەن قاتار ەلىمىزدەگى بىرنەشە جوعارى وقۋ ورنى بىزبەن وسى باعىتتا جۇمىس ىستەپ جاتىر, ولاردىڭ قاتارىندا قارتۋ دا بار, – دەيدى ءا.حاميت.
جادى 2 گيگابايتتان اساتىن NEO قولدانباسى قازىر Windows جانە Android وپەراتسيالىق جۇيەلەرىندە جۇمىس ىستەي الادى, ونى باسقا جۇيەلەرگە ەنگىزۋ ازىرلەنىپ جاتىر. NEO قولدانباسى – ورىس, اعىلشىن, قىتاي, فرانتسۋز, يسپان جانە قازاق تىلدەرىندە سويلەي الاتىن تولىققاندى ۆيرتۋالدى پلاتفورما.
– ءبىز قوسىمشانى ءالى دە جەتىلدىرۋدەمىز, سونىمەن قاتار قوعامداعى قاۋىپسىزدىككە قاتىستى باسقا جوبالارمەن جۇمىس ىستەپ جاتىرمىز. ماسەلەن, ولاردىڭ ءبىرى مەكتەپ وقۋشىلارىمەن وقىس وقيعالاردىڭ الدىن الۋعا ارنالعان. ياعني مۇندا AI سەنسوردىڭ ءبىر ءتۇرى رەتىندە ارەكەت ەتەدى, ادامدار اراسىنداعى اگرەسسيۆتى مىنەز-ق ۇلىق پەن جاعىمسىز كوزقاراستارعا جاۋاپ بەرەدى جانە مەكتەپ باسشىلىعى مەن قاۋىپسىزدىگىنە سيگنال بەرەدى, – دەيدى جوبا جەتەكشىسى.
نە دەسەك تە مەملەكەتتىڭ قايتارىمسىز گرانتى كوپ جاستاردىڭ كاسىپكەرلىككە بەت بۇرۋىنا سەپ بولىپ وتىر. 2005 جىلدان باستاپ قاراعاندى وبلىسىندا جاستار كاسىپكەرلىگىن دامىتۋ مەن قولداۋعا گرانتتار بولىنە باستاعان. وسى ۋاقىت ارالىعىندا 700-دەن اسا ازامات گرانتقا يە بولعان. بۇل ساننىڭ باسىم ۇلەسى – 20 جاستان اسقان جاستار.
– بۇرىن گرانت سوماسى 500 مىڭ تەڭگە بولسا, كەيىن 1 ملن, قازىر 2 ملن تەڭگە بولدى. بيىل دا بىلتىرعىداي وبلىس اكىمىنىڭ گرانتىن 50 ادام الادى. وتىنىمدەردى قابىلداۋ اياقتالدى, كونكۋرستىق كوميسسيا جۇمىسىنا كىرىستى, جەلتوقسان ايىندا جاڭا يەگەرلەرگە گرانتتار بەرىلەدى. بۇعان دەيىن گرانتقا يە بولعانداردىڭ باسىم بولىگى – مەديتسينالىق, قوعامدىق تاماقتاندىرۋ, ءبىلىم بەرۋ جانە وندىرىستىك جوبالار. وبلىس اكىمىنىڭ جاستار كاسىپكەرلىگى سالاسىنداعى گرانتتارىنا وتىنىمدەر تۋرالى تولىق اقپاراتتى جاستار ساياساتى ماسەلەلەرى جونىندەگى باسقارمانىڭ سايتىندا جاريالايمىز, – دەيدى قاراعاندى وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ ءبولىم باسشىسى ۇلان وماروۆ.
قاراعاندى وبلىسى
