بايقاۋدىڭ ءوزى اقان سەرىنىڭ 180 جىلدىعىنا ارنالعاندىقتان ورىنداۋشىلار ءبىر ءاندى ونىڭ شىعارمالارىنان شىرقادى. اقاننىڭ «كوكجەندەت», «قاراتورعاي», «اقتوقتى», «ماقپال», «التىباسار», «اۋدەمجەر», «مايداقوڭىر» سياقتى ونداعان تاماشا ءانى بولسا دا, بايقاۋعا قاتىسقانداردىڭ كوبى سەرىنىڭ «قۇلاگەر» ءانىن ايتتى. قالعان ەكى ءان وزدەرىنىڭ قالاۋىنداعى كومپوزيتورلاردىڭ اندەرى بولدى.
ورىنداۋشىلاردىڭ اراسىنان ادامنىڭ قۇلاق قۇرىشىن قاندىرىپ, تۇلا بويدى تىتىرەتەتىن ارقالى, «قۇلاقتان كىرىپ بويدى الىپ» جان-جۇيەنى تەبىرەنتەتىن انشىلەردى كورە المادىق. ءبارى دە اندەردىڭ نوتاعا جازىلعان كۇيىنە كەپتەلىپ قالعانداي ەكەن. تراگەديالىق اندەردى دە, كوڭىلدى اندەردى دە ءبىر سارىنمەن ايتۋ باسىم. سوندىقتان «قۇلاگەردەن» دە اقاننىڭ تەرەڭ قايعىسىن ەستي المادىق. ءبىز جەرگىلىكتى ايتۋلى ءانشى, وسىنداي تالاي بايقاۋلارعا قاتىسىپ, جەڭىمپاز بولعان داستەن بايمۇقانوۆتى اڭگىمەگە تارتقانىمىزدا, ول دا سونى ايتتى. «انشىلەر قالىپتان شىعا الماي تۇر, ءبارى دە نوتانى بۇزباۋعا تىرىسادى. قازاق انشىلەرى ولاي ايتپاعان. ءاندى شىرقاعان كەزدەرىندە تۇلا بويى بىرگە تولقىپ, كوزى ويناقشىپ, ارقاسى قوزىپ تۇرۋى كەرەك قوي. سوندا عانا ءان تۇرلەنىپ, تىڭداۋشىنىڭ جان-دۇنيەسىن تولقىتادى», دەدى ول.
43 ءانشىنىڭ اراسىنان ءادىل قازىلار جۇيرىك دەپ تانىعان 18 ءانشى ەكىنشى كەزەڭگە شىقتى. ولاردىڭ اراسىنان قازاقستان قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ءانشىسى داۋرەنبەك ىسلامعالي باس جۇلدەنى جەڭىپ الدى. ءبىرىنشى ورىندى قىزىلجارلىق ولجاس سۇراعانوۆ قانجىعاسىنا بوكتەردى. ەكى ەكىنشى ورىننىڭ بايگەسىن اقتاۋلىق اداي ءازىمحان جانە استاناداعى ر.باعلانوۆا اتىنداعى حالىق قازىناسى ۇلتتىق ونەر ورتالىعىنىڭ ءانشىسى اسقار مۇقيات يەلەندى. ال ءۇشىنشى ورىندى ءسۇيىنباي اتىنداعى الماتى وبلىستىق فيلارمونياسىنىڭ ءانشىسى ماعجان ساتىبالدى, جەتىسۋلىق قابدەل قاستەر, ورالدىق ميرلان جامبىلوۆ الدى. سونىمەن قاتار تاڭداۋلى انشىلەرگە قازىلار القاسىنىڭ شەشىمىمەن كاكىمبەك سالىقوۆ, مولداحمەت تىربي ۇلى, يگىباي الىباەۆ, مۇسا اسايىنوۆ اتىنداعى ارنايى جۇلدەلەر بەرىلدى. بايگە العانداردىڭ ءبارى باعالى سىيلىقتارعا يە بولدى. قازىلار القاسىنىڭ قاتارىندا قازاقستاننىڭ ەڭبەك سىڭىرگەن قايراتكەرلەرى, پاۆلودارلىق ەربول ايتباەۆ, الماتىلىق نۇرجان جانپەيىسوۆ, قاراعاندىلىق داۋرەنبەك اركەنوۆ, «قۇرمەت» وردەنىنىڭ يەگەرى قايرات كاكىموۆ, مادەنيەت سالاسىنىڭ ۇزدىگى, قىزىلجارلىق ءبىرجان ەسجانوۆ بولدى. بايقاۋدىڭ ءادىل شەشىمىن شىعارعان ولارعا وبلىس اكىمىنىڭ العىس حاتى جانە «اقان سەرىنىڭ 180 جىلدىعى» مەرەيتويلىق توسبەلگىسى تاپسىرىلدى.
بايقاۋدىڭ سوڭىنان جۇلدەگەرلەر قاتىسقان گالا-كونتسەرت بولدى. ءسويتىپ, قىزىلجار تۇرعىندارى حالىق اندەرىن ەستىپ, ءبىر سەرپىلىپ قالدى.
پەتروپاۆل
